Agenda a Chofnodion

Nid oedd unrhyw ymddiheuriadau.

Gwnaed y datganiadau o fuddiant a ganlyn o dan Reol Sefydlog 17.24A – datganodd Vaughan Gething fuddiannau perthnasol mewn perthynas â geiseb P-06-1373 – Eitem 3.3 – oherwydd ei fod wedi gwneud penderfyniadau fel Gweinidog i gefnogi'r prosiect hwnnw – ac mewn perthynas â deiseb P-06-1488 – Eitem 3.4 – oherwydd ei fod wedi gwneud cyfres o benderfyniadau fel y Gweinidog Iechyd yn ystod y pandemig COVID-19. Nid oedd o’r farn y dylai gymryd unrhyw ran yn y trafodaethau na'r penderfyniadau ar y ddwy eitem hynny.

Diolchodd y Pwyllgor i'r deisebydd am dynnu sylw at fater yr oedd yr Aelodau yn ei gefnogi. Ymddengys bod Llywodraeth Cymru yn bwrw ymlaen â chynigion mewn sawl un o'r meysydd a amlinellir yn y ddeiseb, a bydd y mater hefyd yn parhau’n destun gwaith craffu gan y Senedd. Felly, cytunwyd y byddai'r Aelodau'n parhau i gadw llygad ar y mater, ond y byddai’r ddeiseb yn cael ei chau.

Yn dilyn trafodaeth, cytunwyd y dylid cau'r ddeiseb, ond hefyd y dylid ysgrifennu at Gymdeithas Seryddol Caerdydd ac Archifau Morgannwg i ofyn am leoliad y cynlluniau gwreiddiol ar gyfer yr arsyllfa, ac i sicrhau bod yr ymatebion i’r ohebiaeth hon ar gael i'r cyhoedd.

Cytunwyd y dylid cau'r ddeiseb, o ystyried y proffil uchel sydd gan y mater hwn eisoes yn y Senedd. Wrth wneud hynny, cytunodd yr Aelodau i dynnu sylw'r Pwyllgor Iechyd a Gofal Cymdeithasol at y ddeiseb, o ystyried gwaith blaenorol y Pwyllgor hwnnw ar y mater hwn.

Cytunodd y Pwyllgor i gyfeirio'r ddeiseb at y Pwyllgor Iechyd a Gofal Cymdeithasol, sy’n gyfrifol am graffu ar berfformiad a chyllid y GIG, ac wrth wneud hynny i gynnwys yr ohebiaeth gysylltiedig a ddaeth i law gan Russell George AS. Hefyd, cytunodd y Pwyllgor i ysgrifennu at Ysgrifennydd y Cabinet dros Iechyd a Gofal Cymdeithasol yn nghyd-destun ei gyhoeddiad y bydd £120 miliwn yn cael ei ddarparu i helpu i leihau amseroedd aros, gan ofyn faint o'r apwyntiadau a grybwyllwyd i leihau maint cyffredinol y rhestr aros fydd ar gael i gleifion yn ardal Bwrdd Iechyd Addysgu Powys, a sut y bydd y cyllid hwn o fudd i gleifion ym Mhowys sydd ar y rhestr aros. Cytunodd y Pwyllgor hefyd i ysgrifennu at Fwrdd Iechyd Addysgu Powys i ofyn pa asesiad a wnaed ganddynt o effaith y penderfyniad i gymhwyso targedau GIG Lloegr. Cytunwyd y byddai'r ddeiseb yn cael ei chau ac y byddai’r ymatebion i’r ohebiaeth yn cael eu hanfon ymlaen at y Pwyllgor Iechyd a Gofal Cymdeithasol.

Nododd y Pwyllgor y gwaith sy'n mynd rhagddo i ddatblygu cynllun gweithlu, a chytunodd i dynnu sylw'r Pwyllgor Plant, Pobl Ifanc ac Addysg at y ddeiseb er mwyn codi ymwybyddiaeth o’r mater hwn, yn ogystal â diolch i'r deisebydd a chau'r ddeiseb.

Cytunodd y Pwyllgor i dynnu sylw Ysgrifennydd y Cabinet dros Newid Hinsawdd a Materion Gwledig at bryderon ac argymhellion y deisebwyr a gofyn am ei ymateb iddynt. Byddai'r ddeiseb yn cael ei chadw ar agor tra'n disgwyl ymateb ganddo. Bydd y Pwyllgor Newid Hinsawdd, yr Amgylchedd a Seilwaith yn cael copi o'r ohebiaeth i godi ymwybyddiaeth o’r materion perthnasol.

Cytunodd y Pwyllgor ei fod wedi ymdrin â'r materion sydd o fewn cwmpas derbyniadwyedd y ddeiseb ac y byddai’n cau'r ddeiseb o ganlyniad i hynny. Wrth wneud hynny, cytunwyd y dylid ysgrifennu at y pum Aelod lleol o’r Senedd i dynnu sylw at y gohebiaeth ddiweddaraf er mwyn i'r Aelodau hynny fynd ar drywydd y mater hwn yn y dyfodol.

Wrth drafod y ddeiseb, nodwyd bod y materion perthnasol yn cael eu cyfeirio atynt yn rheolaidd yn y Senedd, ond na allai'r Pwyllgor Deisebau eu dwyn ymlaen. Cytunwyd i anfon yr ymatebion a gafwyd ymlaen at y Pwyllgor Iechyd a Gofal Cymdeithasol, fel y pwyllgor arbenigol, ac i ddiolch i'r deisebwyr cyn cau'r ddeiseb. 

Yn dilyn trafodaeth, o gofio ei bod yn annhebygol y byddai unrhyw bwyllgor arall yn gallu edrych ar y mater hwn, cytunodd y Pwyllgor y dylid cadw llygad ar y mater cyn trafod y ddeiseb eto, yn ogystal ag unrhyw gynnydd a wnaed yn erbyn y cynlluniau presennol, yn gynnar yn y flwyddyn newydd.

Nododd yr Aelodau y papur.

Nododd yr Aelodau y papur.

Cynigiwyd y dylid gwahardd y cyhoedd o weddill y cyfarfod. Derbyniwyd y cynnig.