Lliniaru newid yn yr hinsawdd

Yn ystod tymor y Senedd hon bydd y Pwyllgor Newid Hinsawdd, yr Amgylchedd, a Seilwaith ("y Pwyllgor") yn craffu'n barhaus ar gynnydd Llywodraeth Cymru tuag at leihau allyriadau carbon.

Gwybodaeth gefndirol

Ffyniant i Bawb: Cymru carbon isel, a gyhoeddwyd yn 2019, oedd cynllun cyflawni carbon isel cyntaf Llywodraeth Cymru a oedd yn nodi sut yr oedd Cymru yn anelu at gyflawni ei chyllideb garbon gyntaf (2016-2020). Ym mis Rhagfyr 2022, cyhoeddodd Llywodraeth Cymru ei datganiad terfynol ar gyfer y gyllideb garbon gyntaf (2016-20) a tharged allyriadau interim 2020.

Cymru Sero Net Cyllideb Garbon 2 (2021-2025), a gyhoeddwyd ym mis Hydref 2021, yw ail gynllun Llywodraeth Cymru sy’n canolbwyntio ar ei hail gyllideb garbon (2021–2025). Ym mis Tachwedd 2021, cynhaliodd y Pwyllgor waith cychwynnol ar Gymru Sero Net. Mae rhagor o wybodaeth am hyn, gan gynnwys barn rhanddeiliaid ar gael ar dudalen we’r Pwyllgor, Cymru Sero Net - ystyriaeth cychwynnol.

Mae mwy o wybodaeth gefndirol am waith graffu’r Pwyllgor ar gynnydd tuag at gyflawni ymrwymiadau newid hinsawdd ar gael ar y dudalen we, Cynnydd tuag at gyflawni ymrwymiadau newid hinsawdd.

Casglu tystiolaeth

Ar 9 Chwefror 2023, cynhaliodd y Pwyllgor sesiwn dystiolaeth gyda Phwyllgor Newid Hinsawdd y DU (CCC) ar y datganiad terfynol ar gyfer y gyllideb garbon gyntaf a tharged 2020, ac ar y cynnydd tuag at gyflawni Cymru Sero Net.

Cynhaliodd y Pwyllgor sesiwn graffu gyda'r Gweinidog Newid Hinsawdd ddydd Mercher 1 Mawrth. Cyn y cyfarfod, cyflwynodd y Gweinidog bapur, Craffu ar gynnydd tuag at gyflawni ymrwymiadau newid hinsawdd (PDF 337KB). Mae'r papur yn rhoi gwybodaeth ar Ddatganiad Terfynol y Gyllideb Garbon Gyntaf a Tharged Interim 2020, ac yn rhoi'r wybodaeth ddiweddaraf am y cynnydd tuag at gyflawni Cymru Sero Net Cyllideb Garbon 2 (2021-25).