Ar 28 Hydref 2021, cyhoeddodd Llywodraeth Cymru ei Chynllun 'Cymru Sero Net' ('y Cynllun'). Hwn yw ail gynllun datgarboneiddio statudol Llywodraeth Cymru ac mae’n canolbwyntio ar ei hail gyllideb carbon (2021 – 2025). Mae’n adeiladu ar Ffyniant i Bawb: Cymru Carbon Isel, a gyhoeddwyd yn 2019.

Bydd y Pwyllgor Newid Hinsawdd, yr Amgylchedd a Seilwaith ('y Pwyllgor') yn cynnal sesiwn graffu ar y Cynllun gyda'r Gweinidog Newid Hinsawdd yn ei gyfarfod ddydd Iau 25 Tachwedd 2021. Bydd y sesiwn hon yn cael ei defnyddio i helpu i lywio blaenoriaethau’r Pwyllgor ar gyfer tymor y Senedd hon, a pharatoi'r ffordd ar gyfer gwaith yn y dyfodol ar newid hinsawdd a lleihau allyriadau carbon.

Er mwyn llywio’r sesiwn graffu gyda’r Gweinidog Newid Hinsawdd, fe wnaeth y Pwyllgor wahodd rhanddeiliaid i gynnig eu safbwyntiau cychwynnol ar y Cynllun (ymatebion i'w cyhoeddi).

Ar 11 Tachwedd 2021, ysgrifennodd y Gweinidog at y Pwyllgor i amlinellu manylion pellach ynghylch y Cynllun.