Cymraeg i bawb?

Mae’r Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol yn cynnal ymchwiliad archwiliadol sy’n edrych ar yr heriau a’r cyfleoedd i gynyddu’r defnydd o’r Gymraeg ledled Cymru, ac yn arbennig mewn ardaloedd sydd â llai o siaradwyr Cymraeg. 

Mae deall y rhwystrau amlwg i ddefnydd iaith, sut i ddatblygu hyder a newid ymddygiad ieithyddol fel bod pobl yn dechrau defnyddio mwy o’r Gymraeg yn eu bywydau bob dydd yn allweddol i hyfywedd yr iaith ym mhob cymuned. Mae’r heriau hynny ar eu mwyaf mewn ardaloedd lle nad yw’r iaith yn cael ei siarad yn eang, a lle mae angen ymyriadau â ffocws.

Nod yr ymchwiliad yw:

>>>> 

>>>Archwilio’r rhwystrau a’r cyfleoedd allweddol i ddefnyddio’r Gymraeg ledled Cymru, ond gan ganolbwyntio ar ardaloedd lle mae llai o siaradwyr Cymraeg;

>>>Archwilio dulliau, technegau ac ymyriadau, gan gynnwys technoleg, a all annog newid ymddygiad a datblygu hyder fel bod mwy o bobl yn defnyddio rhywfaint o Gymraeg bob dydd;

>>>Ystyried effeithiolrwydd mentrau sy’n anelu at greu’r amodau a’r gofodau i annog mwy o ddefnydd o’r Gymraeg, yn enwedig mewn ardaloedd lle mae llai o siaradwyr Cymraeg;

>>>Deall i ba raddau y mae digwyddiadau diwylliannol, fel yr Eisteddfodau a gwyliau Cymraeg, yn effeithio ar ddefnydd iaith mewn ardaloedd lle mae llai o siaradwyr Cymraeg

<<< 

Byddem yn eich annog i gadw eich cyflwyniad yn gryno a chanolbwyntio ar y pwyntiau allweddol yr hoffech dynnu sylw'r Pwyllgor atynt. Nid oes angen ichi ateb bob cwestiwn oni bai eich bod am wneud hynny.

Rydym am sicrhau bod ein gwaith yn cael ei lywio gan brofiadau, anghenion a safbwyntiau sy'n adlewyrchu amrywiaeth y bobl a chymunedau y mae'r materion hyn yn effeithio arnynt.

Rydym yn annog unrhyw un sydd ag arbenigedd neu brofiad o'r materion hyn i rannu eich safbwyntiau, gan wybod yn iawn y bydd eich barn yn cael ei chroesawu a'i gwerthfawrogi.

Hoffem i chi gyflwyno’ch sylwadau drwy lenwi’r ffurflen ar-lein hon.

Mae templed ar gael i’w lawrlwytho er mwyn drafftio’ch ymateb cyn ei gyflwyno, os ydych chi’n dymuno gwneud hynny. Fodd bynnag, gofynnwn i chi beidio â chyflwyno eich ymateb i'r ymgynghoriad ar y templed hwnnw drwy’r e-bost. Dylid cyflwyno ymatebion drwy ddefnyddio’r ffurflen ar-lein.

Y dyddiad cau ar gyfer cyflwyniadau yw dydd Sul, 27 Ebrill 2025.

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

Gweler y canllawiau ar gyfer y sawl sy’n cyflwyno tystiolaeth I bwyllgor.

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.