Tlodi Tanwydd yng Nghymru

Yn ei gyfarfod ar 30 Medi 2024, cytunodd y Pwyllgor Cydraddoldeb a Chyfiawnder Cymdeithasol i gynnal ymchwiliad dilynol i dlodi tanwydd a'r Rhaglen Cartrefi Clyd.

 

Mae'r ymchwiliad yn dilyn yn sgil ymchwiliad gwaith blaenorol y Pwyllgor a bydd yn edrych ar yr hyn y mae tlodi tanwydd yn ei olygu i bobl yng Nghymru heddiw a pha gynnydd sydd wedi cael ei wneud o ran gweithredu cynllun olynol.

 

Lansiodd Llywodraeth Cymru y Rhaglen Cartrefi Clyd newydd ar 1 Ebrill 2024. Cafodd rhywfaint o wybodaeth gefndir am y rhaglen newydd ei chynnwys mewn datganiad polisi a gyhoeddwyd gan Lywodraeth Cymru ym mis Mawrth 2023.

 

Cylch gorchwyl

Y cylch gorchwyl ar gyfer yr ymchwiliad yw archwilio:

>>> 

>>>A oes darlun cywir o dlodi tanwydd yng Nghymru heddiw, o ystyried bod data yn seiliedig ar Arolwg Byw yng Nghymru 2008 ac Arolwg Cyflwr Tai Cymru 2017-18;

>>>Effaith bosibl newidiadau i feini prawf cymhwysedd y Taliadau Tanwydd Gaeaf ar dlodi tanwydd yng Nghymru;

>>>Manylion am y Rhaglen Cartrefi Clyd newydd, gan gynnwys y mesurau effeithlonrwydd ynni a gynigir, newidiadau i feini prawf cymhwysedd, y dull o ddarparu gwasanaethau cynghori, a datblygu dull sy’n seiliedig ar ardal;

>>>Sut y bydd newidiadau o'r rhaglen flaenorol yn effeithio ar gyflawni, yn enwedig o ran nifer yr aelwydydd a fydd yn cael cymorth;

>>>I ba raddau y mae’r Rhaglen Cartrefi Clyd yn helpu i fynd i’r afael â thlodi tanwydd parhaus yng Nghymru, ac os nad yw, pa gamau pellach sydd eu hangen;

>>>Effeithiolrwydd y cymorth sydd ar gael i aelwydydd mewn tlodi tanwydd neu sydd mewn perygl o fod mewn tlodi tanwydd, yn ogystal â’r Rhaglen Cartrefi Clyd;

>>>Pa mor effeithiol y mae awdurdodau lleol wedi bod o ran cyrchu a defnyddio cyllid ECO Flex;

>>>Sut mae Llywodraeth Cymru yn gweithio gyda Llywodraeth y DU i fynd i’r afael â thlodi tanwydd.

<<< 

 

Mae'r wybodaeth ar y dudalen hon yn rhoi rhagor o fanylion am yr hyn y mae'r Pwyllgor yn edrych arno a sut y gallwch rannu eich barn.

 

Sut i rannu eich barn

Rydym am sicrhau bod ein gwaith yn cael ei lywio gan brofiadau, anghenion a safbwyntiau sy'n adlewyrchu amrywiaeth y bobl a chymunedau y mae'r materion hyn yn effeithio arnynt.

 

Rydym yn annog unrhyw un sydd ag arbenigedd neu brofiad o'r materion hyn i rannu eich safbwyntiau, gan wybod yn iawn y bydd eich barn yn cael ei chroesawu a'i gwerthfawrogi.

 

I rannu eich barn yn electronig, anfonwch neges e-bost i SeneddCydraddoldeb@senedd.cymru, neu drwy'r post i’r:

 

Pwyllgor Cydraddoldeb a Chyfiawnder Cymdeithasol,
Senedd Cymru,
Caerdydd
CF99 1SN.

 

Y dyddiad cau ar gyfer rhannu eich barn yw 16.00, ddydd Iau 7 Tachwedd 2024.

 

Yn ogystal â'ch ymateb, dylech ddarparu'r wybodaeth a ganlyn:

>>>> 

>>>Eich enw a’ch manylion cyswllt fel yr unigolyn neu’r sefydliad sy’n cyflwyno’r dystiolaeth.

>>>A yw eich tystiolaeth yn cael ei chyflwyno gan unigolyn neu ar ran sefydliad.

>>>Os ydych yn cyflwyno tystiolaeth fel unigolyn, cadarnhad eich bod dros 18 oed.

>>>Os ydych o dan 13 oed, cytundeb gan eich rhiant neu eich gwarcheidwad y cewch gymryd rhan (gellir darparu hyn dros e-bost).

>>>Cadarnhad a fyddai'n well gennych i’ch enw beidio â chael ei gyhoeddi ochr yn ochr â'ch tystiolaeth (ni fydd enwau unigolion dan 18 oed yn cael eu cyhoeddi).

>>>Cadarnhad o ran a hoffech i’r Pwyllgor drin eich holl dystiolaeth ysgrifenedig, neu unrhyw ran ohoni, yn gyfrinachol, gyda rhesymau dros y cais.

>>>Os ydych wedi cyfeirio at drydydd parti yn eich tystiolaeth, megis rhiant, priod neu berthynas, cadarnhad ei fod wedi cytuno y cewch rannu gwybodaeth y gellir ei defnyddio i'w adnabod a'i fod yn deall y caiff ei chyhoeddi.

<<< 

 

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

 

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

 

Gweler y canllawiau ar gyfer y sawl sy’n cyflwyno tystiolaeth I bwyllgor.

 

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.