Adolygiad o weithrediad y Cytundeb Masnach a Chydweithredu rhwng y DU a’r UE

Ers mis Ionawr 2021, mae’r berthynas rhwng y DU a’r UE wedi bod yn seiliedig ar gytundeb y daethpwyd iddo ym mis Rhagfyr 2020, y Cytundeb Masnach a Chydweithredu. Rhaid i’r DU a’r UE adolygu gweithrediad y cytundeb erbyn 2026, gyda thrafodaethau’n debygol o gael eu cynnal drwy gydol 2025.  

 

Mae pwyllgorau’r Senedd am glywed gan y cyhoedd, sefydliadau, a rhanddeiliaid yng Nghymru am sut mae trefniadau’r DU a’r UE ar ôl Brexit wedi effeithio arnynt hyd yn hyn, a’u blaenoriaethau ar gyfer y dyfodol. 

 

Mae'r wybodaeth ar y dudalen hon yn rhoi mwy o fanylion am yr hyn y mae'r Pwyllgor yn edrych arno a sut y gallwch rannu’ch barn. Mae'r holl wybodaeth hefyd ar gael i'w lawrlwytho fel dogfen Microsoft Word. Mae gwybodaeth am sut i ddefnyddio'r opsiynau hygyrchedd yn y fersiwn Microsoft Word ar gael mewn dogfen eglurhaol.

 

Gan adeiladu ar waith y maent eisoes wedi'i wneud, mae'r pwyllgorau a restrir isod yn casglu tystiolaeth ar sut mae'r cytundeb yn gweithio yng Nghymru i sicrhau bod safbwynt Cymru yn cael ei gynnwys yn y broses adolygu.

>>>> 

>>>Y Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol; 

>>>Y Pwyllgor Newid Hinsawdd, yr Amgylchedd a Seilwaith; 

>>>Pwyllgor yr Economi, Masnach a Materion Gwledig; 

>>>Y Pwyllgor Deddfwriaeth, Cyfiawnder a’r Cyfansoddiad.

 

Cylch gorchwyl

Byddai’r pwyllgorau’n croesawu eich barn ar: 

>>>> 

>>>eich profiadau o’r Cytundeb Masnach a Chydweithredu ers iddo ddod i rym; 

>>>meysydd cydweithredu rhwng y DU a’r UE a gaiff eu cynnwys yn y Cytundeb Masnach a Chydweithredu, a meysydd na chânt eu cynnwys; 

>>>effeithiolrwydd y Cytundeb Masnach a Chydweithredu yn ymarferol, gan gynnwys a yw unrhyw faterion gweithredu wedi effeithio arnoch; 

>>>rhannau o’r Cytundeb Masnach a Chydweithredu nad ydynt wedi’u gweithredu’n llawn, er enghraifft, cyfranogiad y DU yn rhaglenni’r UE neu gydnabod cymwysterau proffesiynol gan y ddwy ochr; 

>>>canlyniadau anfwriadol yr ydych wedi'u profi; a 

>>>newidiadau i’r berthynas rhwng y DU a’r UE yr hoffech eu gweld.  

<<< 

 

Gallwch ddod o hyd i ragor o wybodaeth gefndirol am y Cytundeb Masnach a Chydweithredu a Chymru ar wefan Ymchwil y Senedd.

 

Sut i rannu’ch barn

Rydym am sicrhau bod ein gwaith yn cael ei lywio gan brofiadau, anghenion a safbwyntiau sy'n adlewyrchu amrywiaeth y bobl a chymunedau y mae'r materion hyn yn effeithio arnynt.

 

Rydym yn annog unrhyw un sydd ag arbenigedd neu brofiad o'r materion hyn i rannu’’ch barn, gan wybod yn iawn y bydd eich barn yn cael ei chroesawu a'i gwerthfawrogi.

 

I rannu eich barn yn electronig, dylech ei anfon at CytundebMasnachaChydweithredu@senedd.cymru neu drwy'r post at:

 

Uned Gydgysylltu,
Senedd Cymru,
Caerdydd,
CF99 1SN

 

Mae’r dyddiad cau ar gyfer cyflwyno sylwadau wedi ei ymestyn i 16.00 ar ddydd Gwener 8 Tachwedd 2024.

 

Ynghyd â'ch cyflwyniad, dylech ddarparu'r wybodaeth a ganlyn:

>>>> 

>>>Eich enw a’ch manylion cyswllt fel y person neu’r sefydliad sy’n cyflwyno’r dystiolaeth.

>>>A yw’ch tystiolaeth yn cael ei chyflwyno gan unigolyn neu ar ran sefydliad.

>>>Os ydych yn cyflwyno tystiolaeth fel unigolyn, cadarnhad eich bod dros 18 mlwydd oed.

>>>Os ydych o dan 13 mlwydd oed, cadarnhad bod eich rhiant neu’ch gwarcheidwad yn caniatáu i chi gymryd rhan (gellir gwneud hyn drwy’r e-bost).

>>>Gallwch nodi y byddai'n well gennych i’ch enw beidio â chael ei gyhoeddi ochr yn ochr â'ch tystiolaeth (ni fydd enwau unigolion dan 18 oed yn cael eu cyhoeddi).

>>>Gallwch nodi yr hoffech i’r Pwyllgor drin eich holl dystiolaeth ysgrifenedig, neu unrhyw ran ohoni, yn gyfrinachol, gan roi rhesymau dros hynny.

>>>Os ydych wedi cyfeirio at drydydd parti yn eich tystiolaeth, fel rhiant, priod neu berthynas, rhaid i chi gadarnhau eu bod wedi cytuno y cewch rannu gwybodaeth y gellir ei defnyddio i'w hadnabod a'u bod yn deall y caiff ei chyhoeddi.

<<< 

 

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

 

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

 

Gweler y canllawiau ar gyfer y sawl sy’n cyflwyno tystiolaeth I bwyllgor.

 

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.