Bil Senedd Cymru (Atebolrwydd Aelodau ac Etholiadau)

Mae Pwyllgor y Bil Atebolrwydd Aelodau yn ceisio barn ynghylch Bil Senedd Cymru (Atebolrwydd Aelodau ac Etholiadau).

Y cylch gorchwyl y cytunwyd arno yw i’r Pwyllgor drafod y canlynol:

>>>> 

>>>Egwyddorion cyffredinol Bil Senedd Cymru (Atebolrwydd Aelodau ac Etholiadau) (Cymru) ac a oes angen deddfwriaeth arnom i gyflawni amcanion polisi datganedig y Bil, sef gwella atebolrwydd Aelodau o'r Senedd drwy:

>*>*>*

***gryfhau'r systemau sy'n bodoli ar hyn o bryd i reoleiddio ymddygiad yr Aelodau ac i benderfynu ar unrhyw gosbau;

***darparu mecanwaith ar gyfer adalw Aelodau etholedig, a’u diswyddo yn ystod eu cyfnod fel Aelod, ar sail ewyllys penodol pleidleiswyr yn yr etholaeth berthnasol;

***cryfhau proses safonau’r Senedd fel y’i hystyriwyd gan y Pwyllgor Safonau Ymddygiad, gan gynnwys drwy ei gwneud yn ofynnol i bob Senedd sefydlu Pwyllgor Safonau Ymddygiad gorfodol a thrwy benodi aelodau lleyg;

***rhoi mwy o hyblygrwydd i'r Comisiynydd Safonau ystyried yn rhagweithiol bryderon ynghylch ymddygiad ac ymarweddiad Aelodau o'r Senedd; a

***diwygio pŵer Gweinidogion Cymru yn Neddf Llywodraeth Cymru 2006 i wneud darpariaeth ynghylch cynnal etholiadau’r Senedd, yn benodol drwy osod dyletswydd ar Weinidogion Cymru i wneud darpariaeth sy’n gwahardd gwneud neu gyhoeddi datganiadau ffug.

<*<*<*

>>>Unrhyw rwystrau posibl i weithredu darpariaethau’r Bil, ac a yw’r Bil, yn ogystal â’r Memorandwm Esboniadol ac Asesiad Effaith Rheoleiddiol sy’n cyd-fynd ag ef, yn rhoi ystyriaeth ddigonol i’r rhwystrau posibl hyn.

>>>A oes unrhyw ganlyniadau anfwriadol yn deillio o'r Bil, gan gynnwys goblygiadau posibl ar gyfer cynnal busnes y Senedd.

>>>Asesiad Llywodraeth Cymru o effeithiau ariannol ac effeithiau eraill y Bil, fel y’u nodir yn Rhannau 2 a 3 o'r Memorandwm Esboniadol.

>>>Priodoldeb y pwerau yn y Bil i Weinidogion Cymru wneud is-ddeddfwriaeth (fel y’u nodir yn Rhan 1: Pennod 5 o’r Memorandwm Esboniadol).

>>>Materion sy’n ymwneud â chymhwysedd y Senedd, gan gynnwys a yw'r Bil yn gydnaws â’r Confensiwn Ewropeaidd ar Hawliau Dynol.

>>>Y cydbwysedd rhwng y wybodaeth sydd wedi’i chynnwys ar wyneb y Bil a’r hyn sydd i’w gynnwys drwy is-ddeddfwriaeth.

>>>Unrhyw faterion yn ymwneud ag ansawdd y ddeddfwriaeth.

>>>Unrhyw fater arall sy’n ymwneud â goblygiadau cyfansoddiadol neu oblygiadau eraill y Bil.

<<< 

Er mwyn i’ch barn lywio ein gwaith craffu ar y Bil, byddem yn ddiolchgar o gael unrhyw ymateb ysgrifenedig yr ydych am ei gyflwyno erbyn dydd Mercher, 19 Tachwedd 2025.

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

Gweler y canllawiau ar gyfer y sawl sy’n cyflwyno tystiolaeth I bwyllgor.

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.