Ymgynghoriad
Atal iechyd gwael - gordewdra
- Mae’r ymgynghoriad hwn wedi dod i ben. Cynhaliwyd yr ymgynghoriad rhwng Dydd Mercher, 6 Mawrth 2024 a Dydd Gwener, 7 Mehefin 2024
- Gwybodaeth gefndir i'r ymgynghoriad
- Gweld yr holl ymgynghoriadau presennol
Diben yr ymgynghoriad
Mae'r Pwyllgor Iechyd a Gofal Cymdeithasol
yn cynnal ymchwiliad i atal iechyd gwael – gordewdra.
Y cefndir
Cydnabyddir gordewdra
fel un o’r heriau iechyd cyhoeddus mwyaf arwyddocaol, yn y DU ac yn
rhyngwladol. Mae nifer yr achosion ar gynnydd yng Nghymru (ac mewn mannau
eraill), gyda chymunedau mwyaf difreintiedig yn gweld lefelau llawer yn uwch o
ordewdra.
Mae gordewdra yn
ffactor risg allweddol ar gyfer ystod eang o glefydau cronig, gan gynnwys
diabetes math 2, pwysedd gwaed uchel, clefyd cardiofasgwlaidd (gan gynnwys
strôc), a rhai canserau. Mae hefyd yn effeithio ar lesiant pobl, ansawdd eu
bywyd, a’u gallu i weithio.
Yn ôl amcangyfrif
blaenorol gan Iechyd Cyhoeddus Cymru, cost gordewdra i’r GIG yng Nghymru yw £73
miliwn. Erbyn 2050, amcangyfrifir y bydd y ffigur yn codi i £465 miliwn. Yr
amcangyfrif yw y bydd y gost ehangach i gymdeithas ac economi Cymru erbyn 2050
yn £2.4 biliwn.
Mae hyrwyddo
ffyrdd iach o fyw a mesurau atal afiechydon ymysg y materion blaenoriaeth a
nodwyd yn strategaeth
y Pwyllgor ar gyfer y Chweched Senedd. Felly, byddai’r Pwyllgor yn croesawu
eich barn am y cylch gorchwyl isod;
Effeithiolrwydd
strategaeth, rheoliadau, a chamau gweithredu cysylltiedig Llywodraeth Cymru i
atal a lleihau gordewdra yng Nghymru, gan gynnwys ystyried:
>>>>
>>>bylchau/meysydd
i'w gwella yn y polisi presennol a'r fframwaith rheoleiddio presennol (gan
gynnwys mewn cysylltiad â bwyd/maeth ac ymarfer corff;
>>>effaith
penderfynyddion cymdeithasol a masnachol ar ordewdra;
>>>ymyriadau
mewn beichiogrwydd a phlentyndod cynnar i hyrwyddo maeth da ac osgoi gordewdra;
>>>y
stigma a'r gwahaniaethu a ddioddefir gan bobl sydd dros bwysau/sy’n ordew;
>>>gallu
pobl i gael mynediad at wasanaethau cymorth a thriniaeth priodol ar gyfer
gordewdra;
>>>y
berthynas rhwng gordewdra ac iechyd meddwl;
>>>enghreifftiau
rhyngwladol o lwyddiant (gan gynnwys perthnasedd posibl i gyd-destun Cymru).
<<<
Casglu
tystiolaeth
Rydym am sicrhau
bod ein gwaith yn cael ei lywio gan brofiadau, anghenion a safbwyntiau sy'n
adlewyrchu teimladau’r amrywiaeth o bobl a chymunedau y mae'r materion hyn yn
effeithio arnynt.
Rydym yn annog
unrhyw un sydd ag arbenigedd neu brofiad o'r materion hyn i roi eu safbwyntiau,
gan wybod yn iawn y bydd eu barn yn cael ei chroesawu a'i gwerthfawrogi.
Y dyddiad cau yw 7
Mehefin 2024.
Ynghyd â'ch
cyflwyniad, dylech ddarparu'r wybodaeth a ganlyn:
>>>>
>>>Eich enw
a’ch manylion cyswllt fel y person neu’r sefydliad sy’n cyflwyno’r dystiolaeth.
>>>A yw
eich tystiolaeth yn cael ei chyflwyno gan unigolyn neu ar ran sefydliad.
>>>Os
ydych yn cyflwyno tystiolaeth fel unigolyn, cadarnhad eich bod dros 18 mlwydd
oed.
>>>Os
ydych o dan 13 mlwydd oed, cytundeb eich rhiant neu warcheidwad y gallwch
gymryd rhan (gellir darparu hyn drwy e-bost).
>>>Cadarnhad
o ran a fyddai'n well gennych i’ch enw beidio â chael ei gyhoeddi ochr yn ochr
â'ch tystiolaeth (ni fydd enwau unigolion o dan 18 oed yn cael eu cyhoeddi).
>>>Cadarnhad
o ran a hoffech i’r pwyllgor drin eich holl dystiolaeth ysgrifenedig, neu
unrhyw ran ohoni, yn gyfrinachol, gyda rhesymau dros y cais.
>>>Os
ydych wedi cyfeirio at drydydd parti yn eich tystiolaeth, er enghraifft rhiant,
priod neu berthynas, cadarnhad eu bod wedi cytuno y gallwch rannu gwybodaeth y
gellir ei defnyddio i'w hadnabod a'u bod yn deall y caiff ei chyhoeddi.
<<<
Sut i roi eich
barn
I roi eich barn
yn electronig, anfonwch neges e-bost at SeneddIechyd@senedd.cymru, neu
drwy'r post at:
Y Pwyllgor Iechyd a Gofal Cymdeithasol,
Senedd Cymru,
Caerdydd,
CF99 1SN.
Cyflwyno
Tystiolaeth Ysgrifenedig
Mae gan y Senedd
ddwy iaith swyddogol, sef Cymraeg a Saesneg.
Yn unol â Chynllun
Ieithoedd Swyddogol y Senedd, mae'r Pwyllgor yn yn croesawu cyfraniadau yn y naill neu’r llall
o’n hieithoedd swyddogol, neu’r ddwy, a gofynnwn i sefydliadau sy’n
ddarostyngedig i Safonau’r Gymraeg neu gynlluniau iaith Gymraeg ymateb yn unol
â’u rhwymedigaethau eu hunain. Rhowch wybod i’r Pwyllgor wrth gyflwyno
ymatebion os ydych yn bwriadu darparu cyfieithiad yn ddiweddarach.
Gweler y canllawiau
ar gyfer y sawl sy’n cyflwyno tystiolaeth I bwyllgor.
Datgelu
gwybodaeth
Gwnewch yn saff
eich bod wedi ystyried polisi’r
Senedd o ran datgelu gwybodaeth cyn cyflwyno gwybodaeth i’r Pwyllgor.
Manylion cyswllt
Pe hoffech siarad â rhywun am yr ymgynghoriad hwn, defnyddiwch y manylion cyswllt isod:
Pwyllgor Iechyd a Gofal Cymdeithasol
Senedd Cymru
Bae Caerdydd
Caerdydd
CF99 1SN
Email: SeneddIechyd@senedd.cymru
Ffôn: 0300 200 6565