Meddygon Ymgynghorol yng Nghymru: Cynnydd o ran Sicrhau’r Manteision a Fwriadwyd

Cyflwynwyd y contract cyntaf i feddygon ymgynghorol yn y DU ym 1948 ac arhosodd yn ddigyfnewid i raddau helaeth hyd nes i drafodaethau contract newydd ddechrau yn 2000.  Yn sgil trafodaethau amrywiol, daeth contract i Gymru yn gyfrwymol ar bob meddyg ymgynghorol yng Nghymru ar 1 Rhagfyr 2003.  

Cyhoeddwyd adroddiad Archwilydd Cyffredinol Cymru, sef Contract Meddygon Ymgynghorol yng Nghymru: Cynnydd o ran Sicrhau’r Manteision a Fwriadwyd, ym mis Chwefror 2013. Canfu’r adroddiad fod prosesau recriwtio a chadw meddygon ymgynghorol wedi gwella ers i’r contract diwygiedig gael ei gyflwyno yn 2003, gyda nifer y meddygon ymgynghorol llawn amser yn cynyddu 37 y cant rhwng 2004 a 2011. Fodd bynnag, canfu’r adroddiad y canlynol hefyd:

• bod rhai meddygon ymgynghorol yn dal i weithio oriau hir iawn, gydag un o bob chwech yn gweithio o leiaf 46.5 awr ac yn aml yn mynd y tu hwnt i derfyn 48 awr Cyfarwyddeb Oriau Gwaith yr UE; ac
• nad oedd y contract diwygiedig wedi ysgogi proses o foderneiddio’r gwasanaeth yn y ffordd a ragwelwyd yn wreiddiol.

Hefyd, nododd yr adroddiad fod llai na hanner y meddygon ymgynghorol a ymatebodd i arolwg yn teimlo bod y contract diwygiedig a gwaith cynllunio swyddi wedi arwain at arfer clinigol gwell a bod llai byth o’r farn ei fod wedi gwella gofal cleifion a dulliau gweithio meddygon ymgynghorol.

Cynhaliodd y Pwyllgor Cyfrifon Cyhoeddus ymchwiliad byr i faterion a godwyd yn adroddiad Archwilydd Cyffredinol Cymru.