Trafnidiaeth Gyhoeddus

Mae’r Pwyllgor Newid Hinsawdd, yr Amgylchedd a Seilwaith (“y Pwyllgor”) yn cynnal digwyddiad i randdeiliaid ar ddydd Iau 17 Mawrth, er mwyn clywed gan grwpiau sy'n cynrychioli teithwyr a grwpiau eraill am wasanaethau bysiau a rheilffyrdd yng Nghymru.

Mae’r Pwyllgor yn awyddus i drafod:

>>>> 

>>> Eich barn am gyflwr gwasanaethau bysiau a rheilffyrdd Cymru ar hyn o bryd a'r effaith y mae'r pandemig wedi'i chael;

>>> Beth ddylid ei flaenoriaethu wrth adfer bysiau a rheilffyrdd yng Nghymru ar ôl y coronafeirws, a sut y gellir annog teithwyr i ddychwelyd i sicrhau bod Llywodraeth Cymru yn cyrraedd ei thargedau o ran newid dulliau teithio a newid yn yr hinsawdd; a

>>> Beth ydych chi’n ei feddwl am y cynigion o ran diwygio bysiau a rheilffyrdd – gan gynnwys cynlluniau Llywodraeth y DU i ddiwygio'r diwydiant rheilffyrdd, a chynlluniau Llywodraeth Cymru ar gyfer rheoleiddio gwasanaethau bysiau, a Bil Bysiau Cymru sydd i ddod.

Bydd y trafodaethau hyn yn llywio gwaith y Pwyllgor wrth graffu ar Drafnidiaeth Cymru a'i waith craffu ar bolisïau trafnidiaeth gyhoeddus a'r Bil Bysiau maes o law.

Ochr yn ochr â hyn, bydd y Pwyllgor yn gwneud rhagor o waith ymgysylltu â'r cyhoedd er mwyn ystyried profiadau a safbwyntiau defnyddwyr trafnidiaeth gyhoeddus ledled Cymru.