Offeryn Data Cyllid GIG Cymru - hyd at fis Mawrth 2021

Cyhoeddodd Archwilydd Cyffredinol Cymru fersiwn wedi'i diweddaru o'r offeryn data ym mis Mehefin 2021. Nodwyd bod cyllid ar gyfer gwasanaethau iechyd yng Nghymru wedi cynyddu £1.7 biliwn, gyda llawer ohono ar gyfer talu costau COVID-19. Ar ôl cynnwys chwyddiant, roedd hynny'n golygu cynnydd o 12.8 y cant mewn termau real, ac yn cyfateb i gyllid o £2,620 ar gyfer pob person yng Nghymru ar gyfer 2020-21.

Er gwaethaf y cyllid uwch, erys gorwariant ar draws GIG Cymru. Methodd pedwar bwrdd iechyd â bodloni eu dyletswydd i fantoli’r gyllideb dros gyfnod o dair blynedd. Fodd bynnag, ceir cynnydd cadarnhaol. Gostyngodd cyfanswm y diffyg o £89 miliwn yn 2019-20 i £48 miliwn eleni, a gostyngodd y gorwariant cronnol tair blynedd ar draws y GIG o £352 miliwn i £233 miliwn.

Roedd dau o'r pedwar corff a fethodd â bodloni eu dyletswydd ariannol i fantoli’r gyllideb dros dair blynedd – Bwrdd Iechyd Prifysgol Hywel Dda a Bwrdd Iechyd Prifysgol Bae Abertawe – hefyd wedi methu â mantoli eu cyllidebau yn ystod y flwyddyn.

Er bod Bwrdd Iechyd Prifysgol Hywel Dda yn parhau i ddangos tuedd sy'n gwella o ran ei sefyllfa ariannol, mae cyllid Bwrdd Iechyd Prifysgol Bae Abertawe wedi dirywio unwaith eto.

Mae'r ddau gorff arall sy'n methu â bodloni eu dyletswydd ariannol i fantoli’r gyllideb dros dair blynedd – Bwrdd Iechyd Prifysgol Caerdydd a'r Fro, a Bwrdd Iechyd Prifysgol Betsi Cadwaladr – ill dau wedi gwneud cynnydd ariannol sylweddol, gan fantoli’r gyllideb yn ystod y flwyddyn.

Cymhwysodd yr Archwilydd Cyffredinol ei farn archwilio ar reoleidd-dra gwariant y pedwar corff hwn ar gyfer 2020-21, gan fod methu â bodloni’r ddyletswydd hon yn golygu eu bod i gyd wedi gwario y tu hwnt i’w hawdurdod.

Buodd y Pwyllgor Cyfrifon Cyhoeddus a Gweinyddiaeth Gyhoeddus yn trafod a nodi y fersiwn ddiweddaraf o’r offeryn data yn nhymor yr Hydref 2021.