10 Cyfle i Ailosod ac Ailgychwyn System Gofal wedi’i Gynllunio y GIG

Cyhoeddodd Archwilydd Cyffredinol Cymru yr Adroddiad hwn ym mis Medi 2020

Pan gyflwynwyd y cyfyngiadau symud yn y DU ym mis Mawrth 2020, roedd Archwilio Cymru yn cwblhau gwaith ar ddilyn y cynnydd a wnaed ers cyhoeddi adroddiadau ar amseroedd aros am ofal wedi’i gynllunio a gwasanaethau orthopedig yn 2015. Mae’r adroddiad hwn yn defnyddio canfyddiadau’r gwaith archwilio hwnnw ac yn ail-fframio’r negeseuon allweddol i lywio cynlluniau sy’n dod i’r amlwg ar gyfer ailgychwyn gwasanaethau gofal wedi’i gynllunio, yn ogystal â thrafodaethau ehangach ar sut siâp fydd ar y GIG ar ôl COVID-19.

Mae’r adroddiad yn awgrymu deg cyfle a allai helpu i greu newidiadau cynaliadwy i system gofal wedi’i gynllunio y GIG, mewn ffordd sy’n cyd-fynd â’r pum ffordd o weithio a nodir yn Neddf Llesiant Cenedlaethau’r Dyfodol (Cymru) 2015.

Mae gofal wedi’i gynllunio, sydd hefyd yn cael ei alw’n ofal dewisol, yn cynnwys diagnosis a thriniaeth i gleifion mewn ffordd sydd wedi’i chynllunio o ran gofal eilaidd, ar ôl iddynt gael eu hatgyfeirio gan feddyg teulu neu gan weithiwr iechyd proffesiynol arall. Un o nodweddion allweddol gofal wedi’i gynllunio yw bod cleifion fel arfer yn aros wythnosau neu fisoedd am eu diagnosis a’u triniaeth. Mae gofal wedi’i gynllunio yn cael ei gyferbynnu â gofal heb ei drefnu, sy’n cwmpasu gofal brys nad yw wedi’i gynllunio, er enghraifft drwy adrannau damweiniau ac achosion brys.

Nododd y Pwyllgor Cyfrifon Cyhoeddus yr Adroddiad hwn ym mis Tachwedd 2020.