Gwasanaethau gofal sylfaenol y tu allan i oriau

Inquiry5

Gwnaeth Archwilydd Cyffredinol Cymru gyhoeddi ei adroddiad ar “Gwasanaethau gofal sylfaenol y tu allan i oriau” ym mis Gorffennaf 2018.

Mae gwasanaethau y tu allan i oriau yn darparu gofal sylfaenol brys pan fydd meddygfeydd ar gau. Maent yn rhan o gyfundrefn gofal brys ehangach sy’n cynnwys Adrannau Damweiniau ac Achosion Brys, Galw Iechyd a’r gwasanaeth 111 sydd ar ddod.

Dengys yr adroddiad fod gwasanaethau y tu allan i oriau o dan gryn straen. Ymddengys fod cleifion, ar y cyfan, yn fodlon a’r gwasanaethau a ddarperir iddynt, ond mae lefelau isel o forâl ymhlith y staff ac anawsterau wrth lenwi sifftiau yn bygwth cadernid gwasanaethau yn sawl rhan o Gymru, ac mae angen ymateb mwy cynaliadwy i’r heriau hyn.

Canfu’r adroddiad nad oedd safonau cenedlaethol ar brydlondeb yn cael eu bodloni a bod angen gwella’r wybodaeth a ddarperir i gleifion ynghylch sut i gael mynediad at wasanaethau. Mae diffyg gwybodaeth hefyd am ansawdd a pherfformiad gwasanaethau, ac mae hynny’n amharu ar drefniadau i’w rheoli’n effeithiol ar raddfa leol a chenedlaethol.

Fel arfer, bydd gwasanaethau y tu allan i oriau yn cael eu cynllunio ar wahân i wasanaethau eraill, er eu bod yn rhan o gyfundrefn gofal brys ehangach.

Cynhaliodd y Pwyllgor Cyfrifon Cyhoeddus ymchwiliad yn ystod tymor y gwanwyn 2019 a bu'r Aelodau hefyd yn ymweld â chyfleusterau y tu allan i oriau fel rhan o'r ymchwiliad hwn. Cyhoeddodd y Pwyllgor ei adroddiad ym mis Gorffennaf 2019.

Cyhoeddodd Llywodraeth Cymru ddiweddariad cynhwysfawr ym mis Awst 2020 yn nodi’r cynnydd a wnaed o ran gweithredu argymhellion y Pwyllgor (yn yr adroddiad a gyhoeddwyd ym mis Gorffennaf 2019) a’r argymhellion a wnaeth yr Archwilydd Cyffredinol yn ei adroddiad, Y Tu Allan i Oriau, a gyhoeddwyd ym mis Gorffennaf 2018. Daeth diweddariad arall i law ym mis Chwefror 2021.