Cyhoeddodd Archwilydd Cyffredinol Cymru adroddiad ar Raglen Cefnogi Pobl Llywodraeth Cymru (PDF 1MB) ym mis Awst 2017.

Buddsoddodd Llywodraeth Cymru £124.5 miliwn yn ei Rhaglen Cefnogi Pobl (y Rhaglen) yn 2016-17, i gefnogi pobl agored i niwed mewn amrywiaeth eang o amgylchiadau i fyw mor annibynnol â phosib. Mae'r Rhaglen yn darparu cyllid grant i awdurdodau lleol i ddarparu gwasanaethau cymorth sy'n gysylltiedig â thai yn uniongyrchol, neu drwy ddarparwyr trydydd parti, i amrywiaeth o bobl; o'r rheini ag anableddau dysgu neu anableddau corfforol ac anhwylderau datblygu i ddioddefwyr cam-drin domestig, pobl â salwch cronig, materion iechyd meddwl neu gamddefnyddio sylweddau, hanes troseddol a phobl â statws ffoaduriaid.

Yn ôl adroddiad Archwilydd Cyffredinol Cymru, er gwaethaf rhai gwelliannau, nid yw'r camau a gymerwyd i fynd i'r afael â phryderon hirsefydlog gyda'i ddyluniad a'i gyflwyno wedi bod yn effeithiol bob amser, mae'r cynnydd wedi bod yn araf mewn meysydd allweddol ac mae anghysonderau o ran rheolaeth y Rhaglen yn lleol ac yn rhanbarthol.

Fodd bynnag, canfu'r adroddiad nad yw amcanion cyfredol yn cydnabod yn benodol rôl y Rhaglen o ran atal digartrefedd a mynd i'r afael â thlodi. Mae'r adroddiad hefyd yn adlewyrchu pryderon ynghylch sut y mae Llywodraeth Cymru wedi cyfleu goblygiadau newid polisi ar y Rhaglen, gan gynnwys deddfwriaeth ar wasanaethau cymdeithasol, cenedlaethau'r dyfodol a thai, a pholisi Llywodraeth y DU ar ddiwygio lles. Mae Llywodraeth Cymru wedi ymgynghori'n ddiweddar ar amcanion diwygiedig fel rhan o newidiadau ehangach i ganllawiau'r Rhaglen, ond mae wedi cymryd mwy o amser na'r disgwyl i ddatblygu'r trefniadau newydd hyn, yn rhannol oherwydd cyfyngiadau o ran adnoddau.

Trafododd y Pwyllgor Cyfrifon Cyhoeddus yr Adroddiad a chynhaliodd ymchwiliad yn ystod tymor yr hydref 2017- gwanwyn 2018. Yn dilyn cyhoeddi ei adroddiad ym mis Mai 2018, bu’r Pwyllgor yn monitro gweithredu Llywodraeth Cymru ar argymhellion yr adroddiad.