Cynhaliodd y Pwyllgor Cyfrifon Cyhoeddus ymchwiliad yn edrych ar wasanaethau cyhoeddus ar gyfer plant a phobl ifanc sydd wedi bod mewn gofal (sydd wedi, neu sydd wrthi'n 'derbyn gofal' gan awdurdod lleol o dan Ddeddf Plant 1989 a Deddf Gwasanaethau Cymdeithasol a Llesiant 2014) o fewn ei gylch gwaith o ystyried unrhyw fater sy’n ymwneud â pha mor ddarbodus, effeithlon ac effeithiol y caiff adnoddau eu defnyddio wrth gyflawni swyddogaethau cyhoeddus yng Nghymru.

Nododd y Mae'r Pwyllgor pedwar maes a amlinellir isod:

• Gwariant a gwerth am arian gwasanaethau cyhoeddus ar gyfer plant a phobl ifanc sydd wedi bod mewn gofal;
• Effeithiolrwydd trefniadau rhianta corfforaethol awdurdodau lleol;
• Gwerth am arian ac effeithiolrwydd y trefniadau presennol o ran lleoliadau gofal
• Gwerth am arian y Grant Datblygu Disgyblion ar gyfer plant sydd wedi bod mewn gofal

Dechreuodd y Pwyllgor ar yr ymchwiliad hwn yn yr hydref 2017. Fel rhan o’r gwaith, mae Tîm Allgymorth y Cynulliad Cenedlaethol wedi casglu barn a phrofiadau plant a phobl ifanc sydd wedi bod mewn gofal ledled Cymru, drwy grwpiau ffocws. Mae’r canfyddiadau wedi’u crynhoi yn y ddogfen hon ac ar y fideo sydd wedi’i atodi.

Cynhaliodd y Pwyllgor ymchwiliad ar wariant a gwerth am arian gwasanaethau cyhoeddus i blant a phobl ifanc sydd wedi bod mewn gofal yn ystod y gwanwyn a’r haf 2018, a chyhoeddodd adroddiad ym mis Tachwedd 2018. Ystyriodd y Pwyllgor ymateb Llywodraeth Cymru ym mis Ionawr 2019. Cynhaliodd y Pwyllgor sesiwn dystiolaeth gyda Llywodraeth Cymru ym mis Ionawr 2020 ac fe drafodwyd y cynnydd sy’n cael ei wneud o ran gweithredu argymhellion y Pwyllgor. Yn dilyn y sesiwn honno, ysgrifennodd Llywodraeth Cymru at y Pwyllgor ynglŷn â nifer o faterion.

Mae’r Pwyllgor Plant, Pobl Ifanc ac Addysg wedi ystyried y grŵp hwn o bobl ifanc yn ei waith hefyd, yn enwedig yn ystod ei waith craffu blynyddol ar gyllideb Llywodraeth Cymru a’r Grant Datblygu Disgyblion.