Adolygu Effeithiolrwydd Pwyllgorau yn y Chweched Senedd

Mae Fforwm y Cadeiryddion yn ceisio barn ar effeithiolrwydd pwyllgorau yn y Chweched Senedd er mwyn helpu i lywio strwythur pwyllgorau’r Seithfed Senedd.

Mae Fforwm y Cadeiryddion (“y Fforwm”) yn cynnwys holl Gadeiryddion pwyllgorau'r Senedd ac mae'n gyfrifol am sicrhau effeithlonrwydd ac effeithiolrwydd y pwyllgorau, drwy gydgysylltu, arweinyddiaeth ar y cyd, a chyfnewid gwybodaeth. Mae’n darparu lle i fynd i'r afael â materion craffu trawsbynciol, rhannu arfer da, ac edrych yn fwy strategol ar waith pwyllgorau.

Mae'r Fforwm yn ystyried sut mae pwyllgorau wedi gweithredu yn ystod y Chweched Senedd ac unrhyw newidiadau y gellid eu gwneud i weithdrefnau ac arferion pwyllgorau ar gyfer y Seithfed Senedd er mwyn sicrhau bod y swyddogaeth graffu mor effeithiol â phosibl. Mae'r Fforwm yn awyddus i ystyried materion diwylliannol ehangach ynghylch gweithrediad pwyllgorau'r Senedd, yn ogystal â materion ymarferol fel maint a swyddogaeth.

Gwnaeth Pwyllgor Senedd y Dyfodol nifer o argymhellion i'r Fforwm ynghylch ystyriaethau ar gyfer pwyllgorau yn y Seithfed Senedd, ac mae'r rhain wedi'u hystyried yn y cwestiynau yn yr ymgynghoriad hwn.

Mae rhagor o wybodaeth am waith y pwyllgorau yn y Chweched Senedd ac ystyriaethau ar gyfer strwythurau pwyllgorau yn y dyfodol wedi'i nodi ar y tudalennau a ganlyn, ond mae'r Fforwm yn awyddus i glywed barn ar y meysydd a ganlyn yn benodol:

>>>> 

>>> Diwylliant pwyllgorau

>>> Trefniadaeth busnes y pwyllgorau

>>> Rhyngweithio â phwyllgorau'r Senedd

<<< 

Bwriad yr ymgynghoriad hwn yw casglu ystod o safbwyntiau, ac mae croeso ichi ateb rhai o’r cwestiynau, neu'r cwestiynau i gyd. Dylech gyflwyno eich ymateb erbyn 12 Medi 2025 i FforwmyCadeiryddion@senedd.cymru.

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

Gweler y canllawiau ar gyfer y sawl sy’n cyflwyno tystiolaeth I bwyllgor.

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.