Teithio Llesol yng Nghymru

Ym mis Medi 2024, cyhoeddodd Archwilydd Cyffredinol Cymru adroddiad ar deithio llesol yng Nghymru. Ychydig cyn hynny, cyhoeddodd Bwrdd Teithio Llesol Llywodraeth Cymru ei adroddiad blynyddol ar gyfer 2023-24

Mae’r Pwyllgor Cyfrifon Cyhoeddus a Gweinyddiaeth Gyhoeddus yn cynnal ymchwiliad i Deithio Llesol, a hynny wedi’i lywio gan faterion a godwyd yn y ddau adroddiad hyn. Mae’r ymgynghoriad hwn yn gwahodd tystiolaeth bellach ynghylch y themâu a ganlyn isod, gan gynnwys unrhyw enghreifftiau o astudiaethau achos y bydd ymatebwyr efallai am eu hamlygu i gefnogi eu safbwyntiau:

>>>> 

>>>Cynllun cyflawni teithio llesol newydd Llywodraeth Cymru, gan gynnwys unrhyw fylchau ymddangosiadol o ran ei gwmpas.

>>>Cyfleoedd i brif ffrydio ystyriaethau teithio llesol yn well mewn polisïau a rhaglenni ehangach.

>>>Rôl gynyddol Trafnidiaeth Cymru fel rhan o’r trefniadau cyflawni ar gyfer teithio llesol.

>>>Rôl a gweithgareddau Bwrdd Teithio Llesol Llywodraeth Cymru.

>>>Gwariant Llywodraeth Cymru ar deithio llesol a sut y caiff hwn ei ddosbarthu a’i flaenoriaethu rhwng gwahanol gynlluniau a mathau o ymyriadau.

>>>I ba raddau y mae awdurdodau lleol yn blaenoriaethu teithio llesol a buddsoddi cysylltiedig, cyfyngiadau capasiti, ac effeithiau posibl o bwyslais cynyddol ar gynllunio trafnidiaeth rhanbarthol.

>>>A yw Deddf Teithio Llesol (Cymru) 2013 ei hun yn dal i fod yn addas at y diben, gan gynnwys ei gofynion o ran mapio rhwydwaith teithio llesol.

>>>Beth yw’r ffordd orau o ysgogi newid mewn ymddygiad er mwyn cefnogi teithio llesol, a beth yw’r rhwystrau presennol.

>>>Sicrhau bod teithio llesol yn hygyrch ac yn gynhwysol, gan gynnwys o ran dyluniad y cynllun.

>>>Gwella monitro a gwerthuso a chynlluniau Llywodraeth Cymru ar gyfer casglu data gwell drwy Arolwg Teithio Cenedlaethol newydd.

>>>Unrhyw faterion eraill sy’n peri pryder mewn perthynas â chyflawni uchelgeisiau teithio llesol Llywodraeth Cymru.

<<< 

Gwahoddiad i gyfrannu i'r ymchwiliad

Rydym yn annog unrhyw un sydd ag arbenigedd neu brofiad o'r materion hyn i rannu eich safbwyntiau, gan wybod yn iawn y bydd eich barn yn cael ei chroesawu a'i gwerthfawrogi.

I rannu eich barn yn electronig, anfonwch neges e-bost at SeneddCCGG@senedd.cymru, neu drwy'r post at:

Y Pwyllgor Cyfrifon Cyhoeddus a Gweinyddiaeth Gyhoeddus,
Senedd Cymru,
Caerdydd,
CF99 1SN

Ynghyd â’ch cyflwyniad, a fyddech cystal â nodi eich enw a’ch manylion cyswllt fel y person, neu’r sefydliad, sy’n cyflwyno’r dystiolaeth, ac a yw eich tystiolaeth yn cael ei chyflwyno gan unigolyn, neu ar ran sefydliad.

Y dyddiad cau ar gyfer rhannu eich barn yw 16.00 ddydd 28 Mawrth 2025.

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

Gweler y canllawiau ar gyfer y sawl sy’n cyflwyno tystiolaeth I bwyllgor.

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.