Atal a gwrthdroi colli natur erbyn 2030

Mae’r Pwyllgor Newid Hinsawdd, yr Amgylchedd a Seilwaith (“y Pwyllgor”) yn cynnal ymchwiliad i atal a gwrthdroi colli natur erbyn 2030.

Cylch gorchwyl

I helpu i lywio ei waith, mae'r Pwyllgor yn gofyn am sylwadau ar:

>>>> 

>>>Effeithiolrwydd polisïau / cyllid / dyletswyddau statudol cyfredol wrth atal a gwrthdroi colli natur erbyn 2030;

>>>Cynnydd tuag at weithredu argymhellion yr Archwiliad Dwfn Bioamrywiaeth;

>>>Trefniadau cyfredol ar gyfer monitro bioamrywiaeth; a

>>>Dulliau newydd sydd eu hangen i atal a gwrthdroi colli natur erbyn 2030.

<<< 

Cyflwyno’ch sylwadau

Hoffai'r Pwyllgor eich gwahodd i gyflwyno tystiolaeth ysgrifenedig i gynorthwyo’i ymchwiliad.

Hoffem i chi gyflwyno’ch sylwadau drwy lenwi’r ffurflen ar-lein hon.

Mae templed ar gael i’w lawrlwytho er mwyn drafftio’ch ymateb cyn ei gyflwyno, os ydych chi’n dymuno gwneud hynny. Fodd bynnag, gofynnwn i chi beidio â chyflwyno eich ymateb i'r ymgynghoriad ar y templed hwnnw drwy’r e-bost. Dylid cyflwyno ymatebion drwy ddefnyddio’r ffurflen ar-lein.

Rydym yn awyddus i glywed gan gymaint o bobl a sefydliadau â phosibl. Os hoffech gyflwyno eich barn ond nad ydych eisiau/na allwch lenwi'r ffurflen ar-lein, ysgrifennwch at y Pwyllgor a gall clercod y Pwyllgor drefnu ffordd wahanol i'ch llais gael ei glywed.

Y dyddiad cau ar gyfer cyflwyniadau i’r ymgynghoriad hwn yw ddydd Gwener, 23 Awst 2024.

Cyfeiriwch at dudalen yr ymchwiliad i gael rhagor o wybodaeth a’r wybodaeth ddiweddaraf am yr ymchwiliad.

Cyflwyno Tystiolaeth Ysgrifenedig

Mae gan y Senedd ddwy iaith swyddogol, sef Cymraeg a Saesneg.

Yn unol â Chynllun Ieithoedd Swyddogol y Senedd, mae'r Pwyllgor yn yn  croesawu cyfraniadau yn y naill neu’r llall o’n hieithoedd swyddogol, neu’r ddwy, a gofynnwn i sefydliadau sy’n ddarostyngedig i Safonau’r Gymraeg neu gynlluniau iaith Gymraeg ymateb yn unol â’u rhwymedigaethau eu hunain. Rhowch wybod i’r Pwyllgor wrth gyflwyno ymatebion os ydych yn bwriadu darparu cyfieithiad yn ddiweddarach.

Gweler y canllawiau ar gyfer y sawl sy’n cyflwyno tystiolaeth I bwyllgor.

Datgelu gwybodaeth

Gwnewch yn saff eich bod wedi ystyried polisi’r Senedd o ran datgelu gwybodaeth cyn cyflwyno gwybodaeth i’r Pwyllgor.