Agenda item
Archwiliad beirniadol o un risg neu fater amserol sydd wedi'i nodi neu sy'n dod i'r amlwg - Diweddariad Corfforaethol - Ffyrdd o Weithio
- Cyfarfod Pwyllgor Archwilio a Sicrwydd Risg Comisiwn y Senedd, Dydd Llun, 13 Chwefror 2023 10.00 (Item 7.)
- Gwybodaeth gefndir i eitem 7.
Cofnodion:
ARAC (23-01)
Papur 6 – Diweddariad ynghylch Ffyrdd o Weithio
7.1 Rhoddodd Ed
drosolwg o'r rhaglen Ffyrdd o Weithio (WoW). Cynlluniwyd y strwythur hwn fel un
strwythur rheoli rhaglen, a fyddai’n caniatáu i strategaethau presennol y Comisiwn
ynghylch ystadau, pobl a chynaliadwyedd presennol, a'i gynlluniau ar gyfer
adolygu capasiti a Dyfodol Ystwyth, gael eu halinio o dan fframwaith strategol.
7.2 Cyfeiriodd at
nifer o weithgareddau sydd i’w cyflawni yn y ffrydiau gwaith amrywiol, a soniodd
am benderfyniad y Comisiwn, ym mis Tachwedd 2022, i gymeradwyo achos busnes
parthed arfer y cymal terfynu sydd wedi’i gynnwys yn y brydles ar gyfer
swyddfa’r Comisiwn yng ngogledd Cymru, sydd ar hyn o bryd ym Mae Colwyn. Byddai
symud i drefniant cydleoli yn swyddfeydd Llywodraeth Cymru yng Nghyffordd
Llandudno, sef swyddfeydd Sarn Mynach, yn arbed mwy na £100,000 dros gyfnod o
bedair blynedd.
7.3 Nodwyd y
byddai ffrwd waith benodol yn y rhaglen Ffyrdd o Weithio yn gyfrifol am lunio
opsiynau a chyngor manwl mewn perthynas â phrydles Tŷ Hywel, a fydd yn dod i ben yn 2032. Roedd
y Comisiwn hefyd wedi cytuno i ddatblygu Strategaeth Rheoli Adnoddau er mwyn
pennu paramedrau o ran adnoddau a chynllunio'r gweithlu. Yr allbwn a fyddai’n deillio o'r Strategaeth fyddai
Fframwaith Adnoddau Tymor Canolig, a fyddai’n cynnwys Cynllun Ariannol Tymor
Canolig a Chynllun Gweithlu.
7.4 Roedd y
Pwyllgor yn gwerthfawrogi maint y rhaglen hon, sy’n ymwneud â nifer o wahanol
feysydd. Gofynnodd y Pwyllgor a oedd Ed – yn y cyd-destun hwnnw, ac o ystyried
yr angen am gydgysylltu agos a pharhaus â rhaglen Diwygio’r Senedd – o’r farn
bod y cymysgedd cywir o sgiliau, capasiti a gallu ar waith i reoli’r risgiau a
chyflawni’r allbynnau disgwyliedig a’r canlyniadau disgwyliedig.
7.5 Cadarnhaodd
Ed fod yr adnoddau sydd wedi’u neilltuo ar y gyfer y rhaglen ar hyn o bryd wedi
rhoi sicrwydd iddo, ond ychwanegodd ei fod yn y broses o fapio gofynion manwl
at y dyfodol. Roedd y Pwyllgor yn ymwybodol o faterion diwylliannol a oedd yn
bodoli yn y Swyddfa Rhaglen a Newid yn flaenorol. Nododd y Pwyllgor, er bod y
materion hyn bellach wedi’u datrys, fod nifer o swyddi gwag ar gyfer
dadansoddwyr busnes o fewn y Comisiwn o hyd.
7.6 Roedd cryn
dipyn o waith wedi'i wneud i adolygu'r cyllidebau. Roedd hyn yn cynnwys
systemau a phrosesau cynllunio ar gyfer materion ariannol, materion gweithlu a
materion corfforaethol amrywiol ar gyfer y flwyddyn ariannol gyfredol, cyfnod
ariannol 2023-24, a’r cyfnod o dair blynedd y tu hwnt i hynny. Bwriad y gwaith
hwn oedd sefydlu Fframwaith Adnoddau Tymor Canolig (gan gynnwys cynllun
ariannol tymor canolig manwl a chynllun gweithlu llawn) erbyn mis Mehefin 2023.
Nodwyd y byddai’r broses ar gyfer blaenoriaethu prosiectau yn cael ei
chysylltu'n agos â phrosesau cynllunio corfforaethol, ac y byddai adnoddau ar
gyfer rheoli prosiectau yn cael eu dyrannu i brosiectau craidd yn unig, a
hynny’n seiliedig ar yr offeryn blaenoriaethu.
7.7 Mae’r wasg
wedi datgelu bod defnydd swyddfeydd Llywodraeth Cymru ar lefel o oddeutu 20 y cant.
Cadarnhaodd Ed fod defnydd Tŷ
Hywel ar lefel o oddeutu 50 y cant ar ddiwrnodau busnes ond, yn ôl y disgwyl, yn llawer is ar ddiwrnodau
nad ydynt yn ddiwrnodau busnes. Nododd fod y duedd hon wedi bod yn sefydlog am
beth amser. Nododd Ed hefyd fod gweithgarwch staff y Comisiwn, fel gweithlu,
wedi'i drefnu o amgylch gweithgarwch yr Aelodau – hynny yw, diwrnodau busnes.
Mae’r ffaith bod gennym adegau prysur ac adegau llai prysur wedi creu problemau
o ran datblygu cynlluniau ar gyfer defnyddio gweithleoedd yn fwy effeithlon.
Serch hynny, mae prosiect Tŷ
Hywel 2026, o fewn y rhaglen Ffyrdd o Weithio, yn rhan o’r gwaith cynllunio manwl sy’n cael ei wneud i fynd i’r afael â hyn. Roedd y gwaith o adleoli swyddfa Bae
Colwyn yng ngogledd Cymru hefyd yn brosiect ynddo'i hun.
7.8 Eglurodd Ed
hefyd fod trafodaethau pellach wedi'u cynnal ynghylch creu 'presenoldeb
rhanbarthol' ar gyfer staff y Comisiwn, ond nad oedd unrhyw benderfyniadau
wedi'u gwneud. Teimlai’r Pwyllgor y gallai’r garfan newydd o Aelodau ar gyfer y
Seithfed Senedd wthio am fwy o bresenoldeb rhanbarthol. Cadarnhaodd Ed fod y
cam o adleoli swyddfa Gogledd Cymru wedi'i gynllunio’n rhannol er mwyn
galluogi'r Comisiwn i ragweld unrhyw alw yn y dyfodol yn hynny o beth, ac
ymateb iddo.
7.9 Roedd y
Pwyllgor yn ymwybodol o’r angen i sicrhau bod cynhwysiant yn cael ei hyrwyddo
bob amser yn y gwaith o ddatblygu strategaethau, a hynny er mwyn ceisio
diogelu’r gweithlu at y dyfodol ac er mwyn sicrhau nad yw’r rhaglen Ffyrdd o
Weithio yn canolbwyntio gormod ar Fae Caerdydd. Roedd y Pwyllgor yn falch o
weld y datblygiadau parthed y rhaglen a gofynion y gweithlu, ac yn cydnabod y
pryderon sy’n bodoli ynghylch yr angen am gyfathrebu clir i wahaniaethu rhwng y
Senedd a Llywodraeth Cymru mewn unrhyw gynlluniau i gydleoli.
7.10 Yn olaf, yn
dilyn dyrchafiad mewnol, cadarnhaodd Ed fod angen rheolwr ar y rhaglen Ffyrdd o
Weithio, ond bod cynllun interim yn ei le i lenwi’r rôl hon yn fewnol.