Agenda item
Archwiliad beirniadol o un risg a nodwyd neu sy'n dod i'r amlwg - pontio i'r Chweched Senedd
- Cyfarfod Pwyllgor Archwilio a Sicrwydd Risg Comisiwn y Senedd, Dydd Gwener, 18 Mehefin 2021 10.00 (Item 9.)
- Gwybodaeth gefndir i eitem 9.
Eitem lafar
Cofnodion:
Y wybodaeth ddiweddaraf, ar
lafar
9.1
Gwahoddodd y Cadeirydd
Siwan i gyflwyno'r eitem hon, a chroesawodd Sulafa Thomas, Pennaeth Cymorth y
Comisiwn a’r Aelodau i'r cyfarfod. Atgoffodd Siwan y Pwyllgor fod y risg wedi'i
hychwanegu at y Gofrestr Risg Gorfforaethol i adlewyrchu effaith bosibl
pandemig y Coronafeirws a'r ansicrwydd ynghylch dyddiad yr etholiad, cyfnod y
diddymiad a phontio i’r Chweched Senedd. Dywedodd y byddai'r risg bellach yn
cael ei chau gyda risgiau gweddilliol o ran darparu a phontio parhaus yn cael
eu rheoli ar lefel gwasanaeth.
9.2
Disgrifiodd Siwan sut
roedd ymgysylltu effeithiol â chyrff a oedd yn cynnwys y Comisiwn, y Pwyllgor
Busnes a'r Bwrdd Taliadau wedi llywio'r gwaith o gynllunio senarios a
phenderfyniadau a chanllawiau ynghylch cyfnod yr etholiad a'r diddymiad.
Anfonwyd canllawiau wedi'u diweddaru at yr Aelodau a'r staff mewn modd
cydgysylltiedig ac amserol.
9.3
Amlinellodd Siwan sut
yr oedd y gwahanol elfennau o waith wedi'u cyflawni. Roedd hyn yn amrywio o
gynllunio ar gyfer diddymu; cyfathrebu ynghylch yr etholiad, yn enwedig ar
gyfer pobl ifanc 16 ac 17 oed a oedd yn pleidleisio am y tro cyntaf; darparu
canllawiau i Aelodau nad oeddynt yn dychwelyd a gwybodaeth gynefino ar gyfer
Aelodau newydd ac Aelodau a oedd yn dychwelyd; a chefnogi busnes cynnar y
Senedd. O ran llywodraethu, ychwanegodd Siwan fod cynllunio cynnar, sefydlu
gweithgorau a chynllunio senarios a chydgysylltydd penodol ar gyfer y prosiect
wedi bod yn ffactorau allweddol ar gyfer cyflawni'n llwyddiannus. Ychwanegodd
fod strwythurau llywodraethu presennol wedi'u defnyddio i gynnal asesiadau risg
ar gyfer gweithgareddau fel tyngu’r llw, a oedd wedi'u cynnal yn bersonol ac yn
rhithiol yn unol â dewisiadau'r Aelodau.
9.4
Er gwaethaf yr heriau
a ddaw yn sgil y pandemig, roedd y trefniadau i gefnogi busnes cynnar yn
llwyddiannus. Roedd hyn yn cynnwys Cyfarfod Llawn ar 12 Mai i benodi Llywydd,
Dirprwy Lywydd ac enwebu'r Prif Weinidog, yn ogystal â chymorth i Aelodau
gyflogi staff a chael trefn ar swyddfeydd. Roedd 100 y cant hefyd wedi cymryd
rhan mewn digwyddiadau cynefino Aelodau. Roedd y rhan fwyaf o'r adborth gan
Aelodau wedi bod yn gadarnhaol iawn ac roedd rhai gwelliannau wedi'u gwneud ar
unwaith mewn ymateb i faterion a nodwyd.
9.5
Roedd y gwaith o
bontio i'r Chweched Senedd yn parhau o ran penodi deiliaid swyddi, ffurfio
Pwyllgorau newydd y Senedd a chynlluniau ar gyfer yr agoriad Brenhinol.
Cynigiodd Siwan rannu adroddiadau cau, a fyddai'n cynnwys manylion y gwersi a
ddysgwyd, gyda'r Pwyllgor maes o law. Byddai'r rhain yn ystyried adolygiad
arfaethedig gan y Comisiwn Etholiadol.
9.6
Mewn ymateb i gwestiwn gan y Cadeirydd am gynllunio ar
gyfer adalw'r Senedd a'i Phwyllgorau yn ystod cyfnod yr etholiad, amlinellodd
Siwan sut yr oedd swyddogion wedi gweithio gyda'r Pwyllgor Busnes, y Comisiwn a
Llywodraeth Cymru i sefydlu meini prawf clir ar gyfer y sefyllfa hon. Roedd yn
amlwg mai'r unig amgylchiadau lle byddai hyn yn angenrheidiol fyddai ar gyfer
materion yn ymwneud â Covid ac unrhyw oedi i ddyddiad yr etholiad. Rhoddwyd
eglurder hefyd ynghylch rheolau o ran defnyddio staff ac adnoddau mewn
amgylchiadau o'r fath. Esboniodd Siwan fod rhai swyddogion wedi bod wrth gefn
dros gyfnod yr etholiad pe bai wedi bod angen adalw’r Senedd.
9.7
Cafodd y swyddogion eu llongyfarch gan y Cadeirydd ac
aelodau'r Pwyllgor ar eu llwyddiant, yn enwedig o dan amgylchiadau heriol. Pan
ofynnwyd a ellid bod wedi gwneud unrhyw beth yn wahanol, awgrymodd Siwan y
gallai’r gwaith cynllunio fod wedi dechrau'n gynharach efallai o ran rhai
materion technegol megis archifo deunydd y Pwyllgorau. Cydnabu hefyd fod
cyfathrebu cynnar ac aml ag Aelodau a'u staff, yn enwedig o ran canllawiau
diddymu, yn hollbwysig pan oedd newidiadau'n digwydd mor gyflym. Mewn ymateb i
gwestiynau am gasglu adborth, ychwanegodd fod Manon wedi cwrdd ag Aelodau a
oedd yn ymadael a byddai hynny’n cael ei ddefnyddio i lywio'r gwersi a
ddysgwyd.
9.8
Rhoddodd Arwyn fanylion ymchwil a gomisiynwyd gan
asiantaeth farchnata allanol adroddodd fod targedau ar gyrhaeddiad y cyfryngau
o ran yr etholiad wedi rhagori ar dargedau. Esboniodd hefyd fod swyddogion wedi
bod yn gweithio gyda Phrifysgol Caerdydd ar astudiaeth o Etholiadau Cymru i
sicrhau ymchwil briodol i farn pleidleiswyr, megis rhesymau dros bleidleisio, gan
gynnwys pobl ifanc 16 a 17 oed. Nododd hefyd effaith y cyfyngiadau Covid-19 ar
gynlluniau i annog pobl ifanc i bleidleisio. Amlinellodd sut y byddai'r ymchwil
yn darparu ffynhonnell gyfoethog o wybodaeth a chynigiodd rannu adroddiadau
gyda'r Pwyllgor. Rhoddodd Aled wybod i'r Pwyllgor am astudiaeth sydd hefyd yn
cael ei chynnal gan Ofcom o ran sylw ar y newyddion rhwydwaith yn ystod y
pandemig a fyddai o ddiddordeb i Gomisiwn y Senedd.
9.9
Mewn ymateb i gwestiwn
gan Ann ynghylch cymariaethau ag etholiadau yn yr Alban, dywedodd Arwyn, er bod
gwahaniaethau yn y pwysoliad o ran pleidleiswyr ifanc, y dylai rhai
cymariaethau fod yn bosibl unwaith y byddai holiaduron cyn ac ar ôl yr etholiad
wedi'u dadansoddi.
9.10
Gofynnodd y Cadeirydd
am ddiweddariad llafar ar y pontio i'r Chweched Senedd yng nghyfarfod yr
hydref.
Cam i’w gymryd: Y tîm clercio i ychwanegu eitem agenda ar y gwersi a
ddysgwyd o'r pontio i'r Chweched Senedd ar yr agenda ar gyfer cyfarfod yr
hydref.