Agenda a Chofnodion

Croesawodd y Llywydd yr Aelodau i’r cyfarfod.

Cytunwyd ar gofnodion y cyfarfod blaenorol i’w cyhoeddi.

Rhoddodd y Trefnydd wybod i’r Rheolwyr Busnes am y newidiadau a ganlyn i agenda dydd Mawrth:

• Datganiad gan Weinidog yr Economi: Y Diwydiant Dur (30 munud)
• Datganiad gan y Gweinidog Cyfiawnder Cymdeithasol a’r Prif Chwip: Diweddariad ar Cenedl Noddfa (30 munud)

Nododd y Llywydd y byddai'r datganiad ar y Diwydiant Dur yn debygol o ennyn cryn ddiddordeb gan yr Aelodau ac nad oedd yr amseru dangosol yn debygol o fod yn ddigonol. Dywedodd y Trefnydd y byddai'n ystyried ymestyn yr amseru gyda Gweinidog yr Economi.

·       Caiff y Cyfnod Pleidleisio ei gynnal fel yr eitem olaf o fusnes.

·       Nid yw'r Cyfarfod Llawn yn debygol o fynd y tu hwnt i 6.15pm.

Dydd Mercher

Diolchodd y Trefnydd i'r Rheolwyr Busnes am gytuno i ail-drefnu dadleuon y gwrthbleidiau yr wythnos hon er mwyn hwyluso'r Gweinidog Cyllid a Llywodraeth Leol i ymateb i ddadl y Ceidwadwyr.

• Caiff y Cyfnod Pleidleisio ei gynnal cyn y Ddadl Fer.
• Nid yw'r Cyfarfod Llawn yn debygol o fynd y tu hwnt i 6.40pm.

Rhoddodd y Trefnydd wybod i’r Rheolwyr Busnes am y newidiadau canlynol i amserlen Busnes y Llywodraeth am y tair wythnos nesaf.

Dydd Mawrth 26 Medi 2023 -

• Datganiad gan y Gweinidog Iechyd a Gwasanaethau Cymdeithasol: Cydnerthedd y System Iechyd a Gofal Cymdeithasol (30 45 munud)
• Datganiad gan Ddirprwy Weinidog y Celfyddydau, Chwaraeon a Thwristiaeth: Cadw: ymgysylltu cymunedau â threftadaeth (30 munud)

Dydd Mawrth 3 Hydref 2023 -

• Datganiad gan y Cwnsler Cyffredinol a Gweinidog y Cyfansoddiad: Y Bil Etholiadau a Chyrff Etholedig (Cymru) (60 munud)
• Datganiad gan y Dirprwy Weinidog Newid Hinsawdd: Diweddariad ar y Bil Tacsis a Cherbydau Hurio Preifat (Cymru) (30 munud)
• Datganiad gan Weinidog y Gymraeg ac Addysg: Diweddariad ar Taith – Rhaglen Cyfnewid Dysgu Rhyngwladol Cymru (30 munud)

Gofynnodd Heledd Fychan eto am ddiweddariad llafar ar newidiadau posibl i Gyllideb 2023-24. Cadarnhaodd y Trefnydd y byddai'r Gweinidog Cyllid a Llywodraeth Leol yn gwneud datganiad llafar yn ystod yr wythnosau nesaf.

Cytunwyd ar y newidiadau canlynol i amserlen Busnes y Senedd ar gyfer y tair wythnos nesaf:  

Dydd Mercher 27 Medi -

• Cynnig i ddiwygio Rheolau Sefydlog - Gwneud offerynnau statudol ar ôl gadael yr UE (5 munud)

Dydd Mercher 11 Hydref 2023 –

• Dadl ar Gynnig Deddfwriaethol gan Aelod (30 munud)
• Amser a neilltuwyd i’r Ceidwadwyr Cymreig (60 munud)
• Amser a neilltuwyd i Blaid Cymru (60 munud)
• Dadl Fer: John Griffiths (Dwyrain Casnewydd) (30 munud)

Trafododd y Pwyllgor Busnes y cynnig arfaethedig ar gyfer dadl a chytunwyd i’w amserlennu ar 27 Medi:  

Rhys ab Owen

NNDM8274  

Mae’r Senedd hon: 

Yn galw ar Lywodraeth Cymru i ofyn yn ffurfiol i Lywodraeth y DU gychwyn adran 48(1) o Ddeddf Cymru 2017, a fyddai'n alinio'r ffin cymhwysedd deddfwriaethol ar gyfer dŵr gyda'r ffin genedlaethol. 

Yn galw ar Lywodraeth Cymru i ofyn yn ffurfiol am y pwerau i drwyddedu cyflenwad dŵr neu drwyddedai carthffosiaeth a thrwy hynny ddatganoli dŵr yn llawn i Gymru. 

Amserlen ar gyfer y Bil Etholiadau a Chyrff Etholedig (Cymru)

Cytunodd y Pwyllgor Busnes i ysgrifennu at y Pwyllgor Llywodraeth Leol a Thai i esbonio ei fod yn bwriadu cyfeirio'r Bil Etholiadau a Chyrff Etholedig (Cymru) at y Pwyllgor i graffu ar egwyddorion cyffredinol, a gofyn am farn y Pwyllgor Llywodraeth Leol a Thai ar y pwynt hwnnw ac ar yr amserlen arfaethedig. Cytunodd y Pwyllgor Busnes hefyd i anfon copi o'r llythyr at y Pwyllgor Biliau Diwygio i roi cyfle iddo wneud unrhyw sylwadau y mae'n dymuno eu gwneud mewn perthynas â chyfrifoldeb dros graffu ar y Bil.

Trafododd y Pwyllgor Busnes gynnig gan y Trefnydd i addasu'r amserlen ar gyfer Cyllideb 2024-25 a chytunodd i ymgynghori â'r Pwyllgor Cyllid ar y cynigion diwygiedig a dychwelyd  at y mater mewn cyfarfod yn y dyfodol.

Nododd y Pwyllgor Busnes y llythyr a bodlonrwydd y Pwyllgor Deddfwriaeth, Cyfiawnder a'r Cyfansoddiad â'r diwygiadau arfaethedig i'r Rheolau Sefydlog. 

Trafododd y Pwyllgor Busnes adroddiad drafft yn cynnwys newidiadau arfaethedig i'r Rheolau Sefydlog yn ymwneud â gwneud offerynnau statudol ar ôl gadael yr UE a chytunodd arno. Cytunodd y Pwyllgor y bydd cynnig i'r Senedd gytuno ar y newidiadau arfaethedig yn cael ei gyflwyno i'w drafod ddydd Mercher 27 Medi.