Agenda a Chofnodion

Croesawodd y Llywydd yr aelodau i'r cyfarfod.

Cytunwyd ar gofnodion y cyfarfod blaenorol i’w cyhoeddi.

Dydd Mawrth

Tynnodd y Trefnydd sylw'r Rheolwyr Busnes at y newidiadau a ganlyn:

• Datganiad gan y Gweinidog Newid Hinsawdd: Diogelwch Adeiladau (30 munud)
• Cynnig Cydsyniad Deddfwriaethol ar Fil Cyfraith yr EU a Ddargedwir (Dirymu a Diwygio (30 munud) – Gohiriwyd tan 28 Mawrth

• Caiff y Cyfnod Pleidleisio ei gynnal fel yr eitem olaf o fusnes.
• Nid yw'r Cyfarfod Llawn yn debygol o fynd y tu hwnt i 7.15pm.

Dydd Mercher

• Caiff y Cyfnod Pleidleisio ei gynnal cyn y Ddadl Fer.
• Nid yw'r Cyfarfod Llawn yn debygol o fynd y tu hwnt i 7.10pm.

Tynnodd y Trefnydd sylw'r Rheolwyr Busnes at yr ychwanegiadau a ganlyn:  

Dydd Mawrth 28 Mawrth 2023

·       Cynnig Cydsyniad Deddfwriaethol ar Fil Cyfraith yr EU a Ddargedwir (Dirymu a Diwygio (30 munud)

·       Dadl: Cyfnod Terfynol Bil yr Amgylchedd Hanesyddol (Cymru) (15 munud)

Dydd Mawrth 25 Ebrill 2023

·       Gorchymyn Contractau Adeiladu (Eithrio) (Cymru) 2023 (15 munud)

Cytunwyd ar y newidiadau canlynol i amserlen Busnes y Senedd am y tair wythnos nesaf:  

Dydd Mercher 29 Mawrth 2023 –  

·       Cynnig i ddiwygio Rheolau Sefydlog: Pleidleisio drwy Ddirprwy (15 munud)  

·       Cynnig i ddiwygio Rheolau Sefydlog: Newidiadau Amrywiol (5 munud) 

Dydd Mercher 3 Mai 2023 –  

·       Dadl ar adroddiad y Pwyllgor Iechyd a Gofal Cymdeithasol: Cysylltu’r dotiau: mynd i’r afael ag anghydraddoldebau iechyd meddwl yng Nghymru (60 munud) 

·       Dadl ar adroddiad y Pwyllgor Newid Hinsawdd, yr Amgylchedd a Seilwaith: Datgarboneiddio’r sector tai preifat (60 munud) 

·       Amser a neilltuwyd i’r Ceidwadwyr Cymreig (60 munud) 

·       Dadl Fer: Carolyn Thomas (Gogledd Cymru) (30 munud) 

Trafododd y Pwyllgor Busnes y cynigion a gyflwynwyd a chytunwyd i amserlennu’r cynnig canlynol i’w drafod ar 29 Mawrth: 

Tom Giffard

NNDM8232

Cynnig bod y Senedd:

1. Yn nodi cynnig i greu Bil twristiaeth Cymru.

2. Yn nodi mai pwrpas y Bil hwn fyddai:

a) dirymu Gorchymyn Bwrdd Croeso Cymru (Trosglwyddo Swyddogaethau i Gynulliad Cenedlaethol Cymru a Diddymu'r Bwrdd) 2005;

b) creu bwrdd twristiaeth newydd i Gymru;

c) trosglwyddo swyddogaethau Croeso Cymru a grymoedd Llywodraeth Cymru cysylltiedig i'r bwrdd newydd, gan gynnwys, ond heb fod yn gyfyngedig i:

i) annog pobl i ymweld â Chymru a phobl sy'n byw yng Nghymru a'r Deyrnas Unedig i fynd ar eu gwyliau yno;

ii) annog darparu a gwella mwynderau a chyfleusterau twristiaeth yng Nghymru;

iii) hyrwyddo cyhoeddusrwydd;

iv) darparu gwasanaethau cynghori a gwybodaeth; a

v) sefydlu pwyllgorau i'w cynghori ynghylch perfformiad ei swyddogaethau.

Cytunodd y Pwyllgor Busnes ar yr amserlen arfaethedig ar gyfer craffu ar Fil yr Amgylchedd (Ansawdd Aer a Seinweddau) (Cymru). Wrth wneud hynny, nododd y Pwyllgor Busnes y pwyntiau a godwyd yn y llythyr ynghylch y potensial i gyflwyno Biliau eraill mewn meysydd o fewn cylch gwaith y Pwyllgor Newid Hinsawdd, yr Amgylchedd a Seilwaith yn ystod yr un cyfnod.

Cydnabu’r Trefnydd yr angen i roi eglurder ar y materion hyn a hysbysodd y Rheolwyr Busnes fod y Llywodraeth yn bwriadu cyflwyno Bil Cydsynio Seilwaith cyn diwedd tymor yr haf, ac y bydd y Gweinidog Newid Hinsawdd yn rhoi’r diweddaraf am ddiogelwch tomenni glo ar ffurf datganiad ysgrifenedig yn ddiweddarach yr wythnos hon.

Nododd y Pwyllgor Busnes y llythyr. 

Nododd y Pwyllgor Busnes y llythyr a chytunodd i ymestyn y dyddiad cau ar gyfer cyflwyno adroddiadau ar y Memorandwm Cydsyniad Deddfwriaethol atodol (Memorandwm Rhif 4) ar Fil Cyfraith yr UE a Ddargedwir (Dirymu a Diwygio) i 27 Mawrth 2023, a hynny yn sgil symud y ddadl i 28 Mawrth.

Nododd y Pwyllgor Busnes y llythyr. 

Cadarnhaodd y Pwyllgor Busnes y dyddiadau ar gyfer toriad hanner tymor yr hydref a thoriad y Nadolig 2023, a chytunodd ar y dyddiadau dros dro ar gyfer toriad hanner tymor y gwanwyn a thoriad y Pasg 2024.  

Wrth wneud hynny, trafododd y Pwyllgor Busnes argymhelliad 14 yn adroddiad y Pwyllgor Deddfwriaeth, Cyfiawnder a’r Cyfansoddiad ar Femoranda Cydsyniad Deddfwriaethol ar Fil Cyfraith yr UE a Ddargedwir (Dirymu a Diwygio), a gynigiodd y dylai’r Pwyllgor Busnes “ystyried ar fyrder a ddylid ymestyn tymor yr hydref i 22 Rhagfyr 2023, er mwyn darparu ar gyfer cyfarfodydd ychwanegol o’r Pwyllgor hwn ac eisteddiadau Cyfarfod Llawn ychwanegol a allai fod yn ofynnol ar gyfer ystyried rheoliadau sy’n deillio o’r Bil”.

Daeth y Pwyllgor Busnes i’r casgliad na fyddai’n gwneud newidiadau i’r trefniadau ar gyfer toriad Nadolig 2023 ar hyn o bryd, o ystyried nad yw ffurf derfynol y Bil na sut y byddai Llywodraeth Cymru yn ymateb i’w ddarpariaethau yn hysbys eto, ond y byddai’n ystyried ailedrych ar y mater hwn yn nes ymlaen yn y flwyddyn yn ôl yr angen.

Trafododd y Pwyllgor Busnes y papur a:

• chytunodd ar y trefniadau ar gyfer cyflwyno busnes y Cyfarfod Llawn, cwestiynau ysgrifenedig a gwelliannau i Filiau yn ystod toriad y Pasg, a nodyn drafft i’r Aelodau;
• nododd y newidiadau i’r trefniadau cyflwyno, sy’n ofynnol o ganlyniad i Ŵyl Banc Calan Mai, Gŵyl Banc Coroni’r Brenin Charles III a Gŵyl Banc y Sulgwyn.

Trafododd a chytunodd y Pwyllgor Busnes ar ei adroddiad, a diwygiadau cysylltiedig i’r canllawiau, o’i ystyriaethau a’i gynigion ar ddarpariaethau pleidleisio drwy ddirprwy. Cytunodd y Pwyllgor Busnes i gyflwyno cynnig ar gyfer dadl yn y Cyfarfod Llawn ddydd Mercher 29 Mawrth. 

Cytunodd y Pwyllgor Busnes ar ei adroddiad ar nifer o newidiadau amrywiol i’r Rheolau Sefydlog, ac i gyflwyno cynnig ar gyfer dadl yn y Cyfarfod Llawn ddydd Mercher 29 Mawrth.