Agenda a Chofnodion

Croesawodd y Llywydd yr Aelodau i’r cyfarfod. Cafwyd ymddiheuriadau gan Jane Dodds AS.

Cytunwyd ar gofnodion y cyfarfod blaenorol.

Cytunodd y Pwyllgor Busnes i gynnig newidiadau i'r Rheolau Sefydlog i roi effaith i argymhelliad 1 yn adroddiad y Pwyllgor Safonau Ymddygiad ar ddatganiadau o fuddiant (gan ddileu'r gwaharddiad ar bleidleisio pan fo Aelod wedi datgan buddiant cofrestradwy). Cytunodd y dylai'r adroddiad sy’n cynnig newid y Rheol Sefydlog adlewyrchu'r rhesymau a roddir gan y Pwyllgor Safonau Ymddygiad dros ddileu'r gwaharddiad ar bleidleisio, a oedd yn cynnwys arddeliad y Pwyllgor hwnnw fod natur y gofyniad ynghylch gwaharddiad ar bleidleisio yn golygu mai dim ond mewn amgylchiadau penodol iawn y byddai'n cael ei sbarduno; nad oes unrhyw achosion ohono'n cael ei sbarduno yn y Senedd/Cynulliad; absenoldeb gofyniad o'r fath mewn deddfwrfeydd eraill yn y DU neu Iwerddon; a bod y ddarpariaeth bresennol wedi bod ar waith ers cyn gwahanu'r weithrediaeth a'r ddeddfwrfa yn ffurfiol yn 2007.

Cytunodd y Pwyllgor Busnes i ohirio penderfyniad terfynol ynghylch argymhelliad 2 (datganiadau o fuddiant ar adeg cyflwyno) nes y byddai wedi cael ymateb i'w lythyr at y Pwyllgor Safonau Ymddygiad yn gofyn am sicrwydd y byddai'r canllawiau ar ddatganiadau o fuddiant yn mynd i'r afael â chymhwyso'r gofyniad i Aelodau a oedd yn cyflwyno busnes ar ran eraill (megis Rheolwyr Busnes yn cyflwyno busnes ar ran eu grŵp gwleidyddol, y Trefnydd yn cyflwyno busnes ar ran y llywodraeth, neu gadeiryddion pwyllgorau yn cyflwyno busnes ar ran eu pwyllgor).

Trafododd y Pwyllgor y papur a chytunodd i wneud y canlynol:

• Cynnig y newidiadau i Reolau Sefydlog 26.6, 26A.13, 26B.9 a 26C.9, a newid cysylltiedig i'r adran ddehongli, i'w gwneud yn ofynnol i'r Aelod sy'n gyfrifol am Fil nodi yn y memorandwm esboniadol y rhesymau pam mae’n fodlon bod y Bil yn gydnaws â hawliau'r Confensiwn;
• Peidio â chynnig newidiadau i ofynion y memorandwm esboniadol yn Rheolau Sefydlog 26, 26A, 26B a 26C mewn perthynas ag unrhyw oblygiadau Deddf Marchnad Fewnol y Deyrnas Unedig 2020 ar effeithiolrwydd darpariaethau'r Bil perthnasol, pe bai'n cael ei ddeddfu; ond argymell bod Pwyllgor Busnes y Seithfed Senedd yn cadw'r mater hwn o dan adolygiad.

Trafododd y Pwyllgor yr adroddiad drafft ar y Rheolau Sefydlog a chytunodd arno.

Trafododd y Pwyllgor yr adroddiad drafft ar y Rheolau Sefydlog a chytunodd arno.