Agenda a Chofnodion

Croesawodd y Llywydd yr Aelodau i’r cyfarfod. Ni chafwyd ymddiheuriadau.

Cytunwyd ar gofnodion y cyfarfod blaenorol i’w cyhoeddi.

Dydd Mawrth

Dywedodd Jane Dodds ei bod wedi ysgrifennu at y Trefnydd i ofyn am ddatganiad llafar ar y sefyllfa bresennol gydag Undeb Rygbi Cymru a'r Gweilch. Cadarnhaodd y Trefnydd y byddai'n ystyried y cais.

Nododd y Pwyllgor Busnes y canlynol:

• Caiff y Cyfnod Pleidleisio ei gynnal fel yr eitem olaf o fusnes
• Nid yw'r Cyfarfod Llawn yn debygol o fynd y tu hwnt i 7.10pm.

Dydd Mercher

• Caiff y Cyfnod Pleidleisio ei gynnal cyn y Ddadl Fer.  

• Nid yw'r Cyfarfod Llawn yn debygol o fynd y tu hwnt i 7.00pm.

Rhoddodd y Trefnydd wybod i’r Rheolwyr Busnes am y newidiadau canlynol i amserlen Busnes y Llywodraeth ar gyfer y tair wythnos nesaf:

Dydd Mawrth 10 Chwefror 2026

• Rheoliadau Ardrethu Annomestig (Gwerth Lluosyddion Gwahaniaethol) (Cymru) 2026 (5 munud)
• Rheoliadau Ardrethu Annomestig (Trefniadau Osgoi Artiffisial) (Rhestrau Lleol) (Cymru) 2026 (15 munud)
• Rheoliadau Deddf Treth Trafodiadau Tir a Gwrthweithio Osgoi Trethi Datganoledig (Cymru) 2017 (Diwygio Atodlen 5) 2026 (5 munud)
• Rheoliadau Treth Trafodiadau Tir (Addasu Rhyddhad ar gyfer Caffaeliadau sy'n Ymwneud ag Anheddau Lluosog) (Cymru) 2026 (5 munud)
• Rheoliadau Cau Cynlluniau Amaethyddiaeth Gwaddol yr Undeb Ewropeaidd (Cymru) 2026 (15 munud)
• Rheoliadau Rhentu Cartrefi (Datganiadau Ysgrifenedig Enghreifftiol o Gontract) (Cymru) (Diwygio etc.)  2026 (5 munud)

Cytunodd y Rheolwyr Busnes ar y newidiadau canlynol i amserlen Busnes y Senedd am y tair wythnos nesaf:

Dydd Mercher 04 Chwefror 2026 -

• Dadl ar adroddiad y Pwyllgor Cyfrifon Cyhoeddus a Gweinyddiaeth Gyhoeddus: Teithio Llesol yng Nghymru (60 munud)
• Dadl ar adroddiad y Pwyllgor Iechyd a Gofal Cymdeithasol: Gwasanaethau Offthalmoleg yng Nghymru (60 munud)
• Amser a neilltuwyd i’r Ceidwadwyr Cymreig (60 munud)
• Dadl Fer: Buffy Williams (Rhondda) (30 munud)

Nododd y Rheolwyr Busnes mai'r bwriad yw y bydd y gyfran gyntaf o adroddiadau newid Rheolau Sefydlog i baratoi ar gyfer y Seithfed Senedd yn cael ei chynnig i'r Senedd gytuno arnynt yn y Cyfarfod Llawn ddydd Mercher 25 Chwefror, ac y bydd rhagor o fanylion yn cael eu darparu yng nghyfarfod nesaf y Pwyllgor.

Trafododd y Rheolwyr Busnes opsiynau ar gyfer amserlennu busnes y Senedd ar 4 Mawrth pan gynhelir trafodion Cyfnod 3 ar y Bil Iaith Arwyddion Prydain (Cymru).

Cytunodd y Pwyllgor Busnes ar y canlynol:

• cynnig y lle gwag ar y Pwyllgor Iechyd a Gofal Cymdeithasol i James Evans AS ac, os na fydd yn cymryd y lle hwn, dyrannu'r sedd wag i Grŵp Plaid Cymru;
• addasu dyraniad amser dadl yr wrthblaid i gymhareb 1:1;
• bod y drefn y mae arweinwyr a llefarwyr y Ceidwadwyr a Phlaid Cymru yn cael eu galw i ofyn cwestiynau llafar yn cael ei newid bob yn ail yn wythnosol; a
• nodi bwriad y Llywydd i newid y drefn y mae siaradwr cyntaf y Ceidwadwyr a siaradwr cyntaf Plaid Cymru yn cael eu galw i gyfrannu at ddatganiadau llafar a dadleuon.

Nododd y Pwyllgor Busnes y llythyr. Cadarnhaodd y Trefnydd y byddai'r Cwnsler Cyffredinol yn ymateb i'r llythyr.

Nododd y Pwyllgor Busnes y llythyr. Cadarnhaodd y Trefnydd nad oedd y Llywodraeth yn bwriadu ail-drefnu'r ddadl ar y Cynnig Cydsyniad Deddfwriaethol ar y Bil Oedolion Terfynol Sâl (Diwedd Oes) sydd i ddigwydd ar 24 Chwefror.

Nododd y Pwyllgor Busnes y llythyr a chytunodd i roi gwybod i Bwyllgor Busnes y Seithfed Senedd y gallai fod angen iddo ystyried y goblygiadau gweithdrefnol sy'n deillio o gyfraddau treth incwm eiddo Cymru, a sut y byddai hyn yn gweithredu ochr yn ochr â phenderfyniad cyfraddau treth incwm blynyddol Cymru.

Trafododd y Pwyllgor Busnes ddiweddariad gan y Trefnydd a chytunodd i:

• gyfeirio’r Memorandwm ar y Bil Rheilffyrdd at y Pwyllgor Newid Hinsawdd, yr Amgylchedd a Seilwaith a'r Pwyllgor Deddfwriaeth, Cyfiawnder a’r Cyfansoddiad i graffu arno, gyda dyddiad terfynol o 20 Mawrth i gyflwyno adroddiad arno.

Ystyriodd y Pwyllgor Busnes gyngor gan y Swyddfa Gyflwyno a chytunodd:

• mai'r terfyn amser ar gyfer derbyn Cwestiynau Ysgrifenedig fydd 4pm ddydd Gwener 20 Mawrth;
• mai'r terfyn amser ar gyfer derbyn eitemau eraill o fusnes a gyflwynir, ac eithrio busnes brys yn ymwneud ag unrhyw gyfarfodydd adalw a gynhelir yn ystod toriad y Pasg, fydd 4pm ddydd Gwener 27 Mawrth;
• y bydd y Swyddfa Gyflwyno ar agor rhwng 10am a 3pm yn ystod y toriad, ac eithrio dydd Mawrth 7 Ebrill pan fydd ar agor tan 6pm;
• nad oes modd derbyn dim dogfennau i'w gosod os ydynt yn dod i law ar ôl 6pm ddydd Mawrth 7 Ebrill;
• nad oes modd gwneud unrhyw newidiadau i'r Gofrestr Buddiannau ar ôl 6pm ddydd Mawrth 7 Ebrill; ac
• mai'r dyddiad olaf ar gyfer cyflwyno dogfennau sy'n ymwneud â gweithgareddau Grwpiau Trawsbleidiol yw 6pm ddydd Mawrth 7 Ebrill ac y bydd yr holl Grwpiau Trawsbleidiol yn cael eu dadgofrestru'n awtomatig unwaith y bydd y diddymiad yn dechrau am hanner nos ddydd Mercher 8 Ebrill.

Ystyriodd y Pwyllgor Busnes nodyn ychwanegol ynghylch materion a godwyd yn y cyfarfod blaenorol a chytunodd i ddychwelyd i ystyriaeth bellach o'r argymhellion a wnaed gan y Pwyllgor Safonau Ymddygiad yn ei gyfarfod ddydd Iau 29 Ionawr, yn dilyn ymgynghori â grwpiau.

Cytunodd y Pwyllgor Busnes i ysgrifennu at y Pwyllgor Safonau Ymddygiad er mwyn gofyn i'w ddiwygiadau arfaethedig i'r canllawiau sy'n ymwneud â datgan buddiannau (y 'prawf perthnasedd') ddyfynnu Rheolwyr Busnes neu'r Trefnydd, wrth gyflwyno ar ran eu grŵp neu'r llywodraeth, fel enghraifft o lle na ellid fel arfer feddwl yn rhesymol bod buddiant personol wedi dylanwadu ar eu penderfyniad i wneud hynny.