Agenda a Chofnodion

Croesawodd y Llywydd yr Aelodau i’r cyfarfod. Cafwyd ymddiheuriadau gan Jane Dodds a David Rees.

Cytunwyd ar gofnodion y cyfarfod blaenorol.

Trafododd y Pwyllgor Busnes y papurau yn ymwneud â throthwyon Rheolau Sefydlog a'r argymhellion a wnaed yn flaenorol gan Bwyllgor Senedd y Dyfodol.

Trafododd yr Aelodau’r trothwy ar gyfer grwpiau a grwpiadau gwleidyddol a chytunwyd i ddychwelyd at hyn mewn cyfarfod yn y dyfodol.

Cytunwyd, at ddibenion rhaglen waith weithdrefnol y Pwyllgor Busnes, y gellir tybio trothwy o bum aelod ar gyfer grwpiau a grwpiadau gwleidyddol am y tro.

Ni fyddwn yn ceisio penderfyniad terfynol ar y trothwy ar gyfer grwpiau a grwpiadau gwleidyddol nes bod ystyriaeth bellach wedi'i rhoi i oblygiadau ehangach, a’n bod wedi ymgynghori â’r grwpiau gwleidyddol.

Cytunodd y Pwyllgor Busnes ar bob newid arall i drothwyon y Rheolau Sefydlog a gafodd eu hargymell gan Bwyllgor Senedd y Dyfodol.

Cytunwyd ar y newidiadau arfaethedig i’r Rheolau Sefydlog, yn amodol ar rai mân welliannau.

Nododd y Llywydd yr angen i gynnal adolygiad golygyddol o’r Rheolau Sefydlog tua diwedd rhaglen waith weithdrefnol y Pwyllgor Busnes, o ystyried nifer y newidiadau sy'n debygol o gael eu cynnig i'r Rheolau Sefydlog.

Dywedodd Paul Davies, er nad oedd grŵp y Ceidwadwyr Cymreig yn cytuno â'r model arfaethedig o rannu swyddi cadeirydd pwyllgor, gan fod grŵp y Ceidwadwyr Cymreig yn ffafrio model Cadeirydd ac Is-gadeirydd, maent yn cydnabod bod y mwyafrif o blaid y cynigion ac felly byddent yn gweithio’n adeiladol i’w datblygu.

Cytunodd y Pwyllgor Busnes ar y cynigion ar gyfer treial rhannu swyddi cadeirydd pwyllgorau, ac y dylai'r Rheolau Sefydlog dros dro er mwyn gweithredu’r treial gyfyngu’r treial i uchafswm o dri phwyllgor.

Ni chytunodd y Trefnydd â'r opsiynau a argymhellwyd yn y papur cysylltiedig, a chynigiodd opsiynau eraill.

Cytunodd yr Aelodau y dylid cynnal trafodaethau pellach rhwng Comisiwn y Senedd a swyddogion Llywodraeth Cymru cyn dychwelyd at yr eitem hon mewn cyfarfod yn y dyfodol.

Cytunodd y Pwyllgor Busnes i gyhoeddi'r dystiolaeth a gyflwynwyd, ochr yn ochr â llythyr a ddaeth i law gan y Cwnsler Cyffredinol a’r Gweinidog Cyflawni.

Ymddiheurodd Paul Davies y bydd yn absennol ar gyfer y cyfarfod nesaf ddydd Iau 26 Mehefin 2025. Bydd Darren Millar yn ymuno â’r cyfarfod fel dirprwy.

Cytunodd y Pwyllgor Busnes y byddai'r cyfarfod nesaf yn cael ei gynnal yn rhithwir.