Agenda a Chofnodion

Croesawodd y Llywydd yr Aelodau i’r cyfarfod. Ni chafwyd dim ymddiheuriadau.

Cytunwyd ar gofnodion y cyfarfod blaenorol i’w cyhoeddi.

Busnes yr Wythnos Hon

Dydd Mawrth 

• Caiff y Cyfnod Pleidleisio ei gynnal cyn Cyfnod 3 y Bil Gwasanaethau Bysiau (Cymru)
• Nid yw'r Cyfarfod Llawn yn debygol o fynd y tu hwnt i 7.50pm.

Nododd y Pwyllgor Busnes y bydd y Llywydd yn galw egwyl rhwng y Cyfnod Pleidleisio a dechrau trafodion Cyfnod 3.

Dydd Mercher

Nododd y Pwyllgor Busnes y newid a ganlyn

• Dadl Fer: Tom Giffard AS (Gorllewin De Cymru) (30 munud) - wedi’i ganslo

• Caiff y Cyfnod Pleidleisio ei gynnal fel yr eitem olaf o fusnes.  

• Nid yw'r Cyfarfod Llawn yn debygol o fynd y tu hwnt i 6.30pm.

Nododd y Pwyllgor Busnes fod Tom Giffard wedi gofyn am ohirio ei ddadl fer ond penderfynwyd peidio â'i haildrefnu i ddyddiad diweddarach.

Gofynnodd Heledd Fychan am ddiweddariad ar y pwynt a godwyd ganddi mewn cyfarfod blaenorol ynghylch pam nad yw Ysgrifennydd y Cabinet dros Iechyd a Gofal Cymdeithasol bellach yn gwneud Datganiad Llafar i nodi dyddiad y cydsyniad tybiedig ar gyfer rhoi organau. Nododd y Trefnydd ei bod wedi trafod y mater hwn gyda’r Ysgrifennydd Cabinet ac y byddai cyfle i Aelodau godi'r mater hwn yn y Cwestiynau Llafar iddo yr wythnos hon. Dywedodd y byddai'n trafod ymhellach â’r Ysgrifennydd Cabinet.

Rhoddodd y Trefnydd wybod i’r Rheolwyr Busnes am y newid a ganlyn i amserlen Busnes y Llywodraeth ar gyfer y tair wythnos nesaf:

Dydd Mawrth 9 Rhagfyr 2025

·       Dadl: Cyfnod 4 y Bil Gwasanaethau Bysiau (Cymru) (15 munud)

Cytunodd y Rheolwyr Busnes i drefnu’r eitemau canlynol ar amserlen Busnes y Senedd ar gyfer y tair wythnos nesaf:

Dydd Mercher 14 Ionawr 2026 -

• Dadl ar ddeiseb P-05-1555 Adolygu’r holl ganllawiau ar gludiant rhwng y cartref a’r ysgol ar gyfer Cymru gyfan. Mynediad am ddim i addysg (30 munud)
• Amser a neilltuwyd i’r Ceidwadwyr Cymreig (60 munud)
• Amser a neilltuwyd i Blaid Cymru (60 munud)
• Dadl fer (30 munud)

Trafododd y Pwyllgor Busnes y llythyr ar y cyd ag eitem 4.2.

Trafododd y Pwyllgor Busnes yr ohebiaeth gan Bwyllgor y Bil Atebolrwydd Aelodau a'r materion a godwyd mewn perthynas ag amserlennu cyfarfodydd y pwyllgor a phryderon a amlygwyd gan randdeiliaid ynghylch yr amserlen ar gyfer ymgynghori ar y Bil a chraffu arno.

Roedd Paul Davies yn cefnogi'r pryder a godwyd ynghylch faint o amser sydd ar gael i'r Pwyllgor, ac eraill, ar gyfer craffu ar y Bil yng Nghyfnod 1.

Dychwelodd y Pwyllgor Busnes i drafod y mater o gyfeirio'r Bil ar gyfer gwaith craffu Cyfnod 2. Ailadroddodd Paul Davies a Heledd Fychan mai eu dewis oedd i drafodion Cyfnod 2 gael eu cynnal gan Bwyllgor o'r Senedd Gyfan. Nododd y Trefnydd mai barn Llywodraeth Cymru o hyd oedd i drafodion Cyfnod 2 gael eu cyfeirio at Bwyllgor y Bil Atebolrwydd Aelodau, gan nodi bod diffyg amser ar gael i Bwyllgor o'r Senedd Gyfan gyfarfod yng ngoleuni trafodion deddfwriaethol eraill a drefnwyd ym mis Chwefror 2026.

Cynigiodd y Llywydd y gallai'r Pwyllgor Busnes ystyried yr opsiwn o roi amser ar gyfer trafodion Cyfnod 2 i gael eu cynnal mewn Pwyllgor o'r Senedd Gyfan ar brynhawn Mercher drwy leihau faint o Fusnes y Senedd a gaiff ei drefnu yn y Cyfarfod Llawn y diwrnod hwnnw.

Cytunodd y Trefnydd i drafod y mater ymhellach gyda'r Gweinidog sy'n Gyfrifol am y Bil. Cytunodd y Rheolwyr Busnes i ddychwelyd at y mater er mwyn gwneud penderfyniad yng nghyfarfod nesaf y Pwyllgor Busnes.

Trafododd y Pwyllgor Busnes ddiweddariad gan y Trefnydd a chytunodd i gyfeirio’r Memorandwm ar y Bil Seiberddiogelwch a Seiberwydnwch (Systemau Rhwydwaith a Gwybodaeth) at y Pwyllgor Newid Hinsawdd, yr Amgylchedd a Seilwaith a'r Pwyllgor Deddfwriaeth, Cyfiawnder a’r Cyfansoddiad i graffu arno, gyda dyddiad cau ar gyfer cyflwyno adroddiad ar 13 Chwefror 2026.

Datganodd Heledd Fychan ddiddordeb ar yr eitem hon: roedd hi wedi cymryd rhan yng nghyfarfod y Pwyllgor Deisebau pan gytunodd i wneud cais am ddadl ar y ddeiseb.

Trafododd y Pwyllgor Busnes y cais a chytunodd i drefnu dadl ar ddeiseb P-06-1555 Adolygu'r holl ganllawiau ar Drafnidiaeth o'r Cartref i'r Ysgol ar gyfer Cymru gyfan. Mynediad am ddim i addysg ar 14 Ionawr 2026.

Trafododd y Pwyllgor Busnes y cais i Aelodau gael eu hesgusodi o fusnes y Cyfarfod Llawn ar 24 a 25 Chwefror 2026, a chytunwyd iddo.