Agenda a Chofnodion

Croesawodd y Llywydd yr Aelodau i’r cyfarfod. Ni chafwyd ymddiheuriadau.

Cytunwyd ar gofnodion y cyfarfod blaenorol i’w cyhoeddi.

Dydd Mawrth 

Rhoddodd y Trefnydd wybod i’r Rheolwyr Busnes y bydd y datganiad ar Atal Afiechyd yn cael ei gyhoeddi nawr fel datganiad ysgrifenedig a bydd Cwestiynau Llafar i Ysgrifennydd y Cabinet dros Iechyd a Gofal Cymdeithasol ddydd Mercher yn cael eu hateb gan y Gweinidog Plant a Gofal Cymdeithasol a'r Gweinidog Iechyd Meddwl a Llesiant.

Nododd y Pwyllgor Busnes y newid canlynol i fusnes dydd Mawrth:

• Datganiad gan Ysgrifennydd y Cabinet dros Iechyd a Gofal Cymdeithasol: Atal Afiechyd (45 munud) Datganiad ysgrifenedig

• Caiff y Cyfnod Pleidleisio ei gynnal fel yr eitem olaf o fusnes.
• Nid yw'r Cyfarfod Llawn yn debygol o fynd y tu hwnt i 6.15pm.

Dydd Mercher

• Caiff y Cyfnod Pleidleisio ei gynnal cyn y Ddadl Fer.  
• Nid yw'r Cyfarfod Llawn yn debygol o fynd y tu hwnt i 7.45pm.

Dywedodd y Llywydd wrth y Rheolwyr Busnes ei bod wedi cytuno i gais am bleidlais drwy ddirprwy am resymau salwch hirdymor gan Rhianon Passmore AS. Bydd y trefniant ar waith rhwng 10 Mehefin 2025 a 30 Medi 2025 a Jane Hutt AS fydd yn cynnal y bleidlais drwy ddirprwy. 

Rhoddodd y Trefnydd wybod i’r Rheolwyr Busnes am y newid a ganlyn i amserlen Busnes y Llywodraeth ar gyfer y tair wythnos nesaf:

Dydd Mawrth 17 Mehefin 2025

·       Datganiad gan y Gweinidog Iechyd Meddwl a Llesiant: Diweddariad Ap GIG Cymru (45 munud) Gohiriwyd

Cytunodd y Rheolwyr Busnes ar y newidiadau canlynol i amserlen Busnes y Senedd ar gyfer y tair wythnos nesaf:

Dydd Mercher 2 Gorffennaf 2025 -

• Dadl ar Gynnig Deddfwriaethol gan Aelod (30 munud)
• Dadl ar adroddiad Pwyllgor yr Economi, Masnach a Materion Gwledig: Difrod a chau Porthladd Caergybi oherwydd storm - Canfyddiadau cychwynnol (60 munud)
• Amser a neilltuwyd i’r Ceidwadwyr Cymreig (60 munud)
• Dadl Fer: Julie Morgan AS (Gogledd Caerdydd) (30 munud)

Datganodd Heledd Fychan AS fuddiant gan ei bod wedi cyflwyno un o'r cynigion i'w ystyried. Trafododd y Pwyllgor Busnes y cynigion a chytunodd i amserlennu’r cynnig canlynol ar 18 Mehefin 2025:  

Heledd Fychan: NNDM8914 Diwylliant a'r Celfyddydau - braf i'w cael neu'n allweddol i ddyfodol Cymru? 

Trafododd y Pwyllgor Busnes ddiweddariad gan y Trefnydd a chytunodd i:

• Gyfeirio'r Memorandwm ar Y Bil Cŵn (Diogelu Da Byw) (Diwygio) at Bwyllgor yr Economi, Masnach a Materion Gwledig a'r Pwyllgor Deddfwriaeth, Cyfiawnder a'r Cyfansoddiad, i graffu arno, gyda dyddiad cau ar gyfer cyflwyno adroddiad ar 19 Medi 2025.

Opsiynau ar gyfer craffu ar adroddiadau Ymchwiliad Covid y DU yn y dyfodol

Rhoddodd y Llywydd ddiweddariad i Reolwyr Busnes ar drafodaeth â Fforwm y Cadeiryddion ynglŷn ag ystyriaeth y Pwyllgor Busnes o opsiynau y gwaith craffu ar adroddiadau Ymchwiliad Covid y DU yn y dyfodol. Nododd hefyd ei bod wedi ysgrifennu at Gadeirydd y Pwyllgor Cyfrifon Cyhoeddus a Gweinyddiaeth Gyhoeddus i ofyn i'r Pwyllgor ystyried arwain ar graffu ar adroddiadau Modiwl 1 a 2  Ymchwiliad Covid y DU. Bydd ymateb y Pwyllgor yn cael ei ddwyn gerbron y Pwyllgor Busnes i'w ystyried pan ddaw i law.

Cynigiodd y Llywydd efallai y byddai’r Pwyllgor Busnes am osod adroddiad byr yn cynnwys ei ffordd arfaethedig o symud ymlaen ar ôl cytuno ar hyn, a chynnal dadl yn y Cyfarfod Llawn ar gynnig i nodi'r adroddiad hwnnw ac adroddiad Pwyllgor Diben Arbennig Ymchwiliad Covid-19 Cymru ar ei ystyriaeth o Fodiwl 1 Ymchwiliad Covid-19 y DU.