Agenda a Chofnodion

Croesawodd y Dirprwy Lywydd yr Aelodau i'r cyfarfod a chadeirio eitemau 1-5.1. Cadeiriodd y Llywydd eitemau 5.2 a 5.3. Ni chafwyd dim ymddiheuriadau.

Cytunwyd ar gofnodion y cyfarfod blaenorol i’w cyhoeddi

Dydd Mawrth

·         Caiff y Cyfnod Pleidleisio ei gynnal fel yr eitem olaf o fusnes.

·         Nid yw'r Cyfarfod Llawn yn debygol o fynd y tu hwnt i 7.45pm.

Dywedodd y Dirprwy Lywydd wrth y Rheolwyr Busnes fod y Llywydd yn bwriadu talu teyrnged i'r cyn-Aelod Alison Halford a chynnig cydymdeimlad ar ran y Senedd ar ddechrau'r Cyfarfod Llawn heddiw.

Dydd Mercher

·         Caiff y Cyfnod Pleidleisio ei gynnal cyn y Ddadl Fer.  

·         Nid yw'r Cyfarfod Llawn yn debygol o fynd y tu hwnt i 7.10pm.

Dywedodd y Dirprwy Lywydd wrth y Rheolwyr Busnes fod dehongliad byw o Iaith Arwyddion Prydain (BSL) wedi’i drefnu ar gyfer Dadl yr Aelodau Mark Isherwood ddydd Mercher.

Rhoddodd y Trefnydd wybod i’r Rheolwyr Busnes am y newidiadau canlynol i amserlen Busnes y Llywodraeth ar gyfer y tair wythnos nesaf:

Dydd Mawrth 11 Mawrth 2025

·         Datganiad gan Ysgrifennydd y Cabinet dros Iechyd a Gofal Cymdeithasol: Trefniadau uwchgyfeirio ac ymyrryd GIG Cymru (45 munud)

·         Datganiad gan Ysgrifennydd y Cabinet dros Gyfiawnder Cymdeithasol, y Trefnydd a’r Prif Chwip: Diwrnod Rhyngwladol y Menywod (45 munud)

·         Dadl: Diwrnod Rhyngwladol y Menywod – cyflymu gweithredu (60 munud)

Dydd Mawrth 18 Mawrth 2025

·         Datganiad gan y Gweinidog Diwylliant, Sgiliau a Phartneriaeth Gymdeithasol: Rhaglenni cymorth cyflogadwyedd yng Nghymru (45 munud) gohiriwyd

Gofynnodd Heledd Fychan pryd y byddai dadleuon ar Ystâd y Goron a'r Mesur Teithio i Ddysgwyr yn digwydd, yn dilyn ymrwymiadau blaenorol a wnaed gan y Llywodraeth. Cadarnhaodd y Trefnydd y bydd y ddwy ddadl yn cael eu trefnu ar gyfer dydd Mawrth 1 Ebrill.

Cytunwyd i ychwanegu’r eitemau a ganlyn i Amserlen Busnes y Senedd ar gyfer y tair wythnos nesaf:

Dydd Mercher 26 Mawrth 2025 –

·         Dadl ar Gynnig Deddfwriaethol gan Aelod (30 munud) Aildrefnwyd o 12 Mawrth

·         Dadl ar adroddiad y Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol - Degawd o doriadau: Effaith gostyngiadau cyllid ar ddiwylliant a chwaraeon (60 munud)

·         Amser a neilltuwyd i’r Ceidwadwyr Cymreig (60 munud)

·         Dadl Fer: Heledd Fychan AS (Canol De Cymru) (30 munud)

Gofynnodd y Dirprwy Lywydd i Reolwyr Busnes atgoffa Aelodau eu grwpiau mai'r dyddiad cau ar gyfer cyflwyno'r cynigion cyntaf ar gyfer pynciau Dadl Agored yw dydd Iau 6 Mawrth.

Trafododd y Pwyllgor Busnes ddau argymhelliad iddo ystyried cynnal adolygiadau gweithdrefnol a wnaed gan y Pwyllgor Deddfwriaeth, Cyfiawnder a'r Cyfansoddiad yn ei adroddiad ar Egwyddorion Cyffredinol y Bil Deddfwriaeth (Gweithdrefn, Cyhoeddi a Diddymu) (Cymru).

Cytunodd y Pwyllgor Busnes i ymateb i'r Pwyllgor Deddfwriaeth, Cyfiawnder a'r Cyfansoddiad i nodi y bydd yn rhoi ystyriaeth bellach i'r cynigion wrth ystyried blaenoriaethau ei raglen waith weithdrefnol ar gyfer gweddill y Chweched Senedd yn gynnar yn nhymor yr Haf.

Nododd y Pwyllgor Busnes ohebiaeth bellach gan y Pwyllgor Deddfwriaeth, Cyfiawnder a'r Cyfansoddiad at y Cwnsler Cyffredinol a'r Gweinidog Cyflawni ynghylch yr amserlenni ar gyfer Biliau arfaethedig i gydgrynhoi cyfraith gynllunio, cyn ei drafodaeth ei hun â'r Cwnsler Cyffredinol a'r Gweinidog Cyflawni a gynhelir yn ddiweddarach yn yr un cyfarfod.

Trafododd y Pwyllgor Busnes ddiweddariad ar Femoranda Cydsyniad Deddfwriaethol a:

• nodi'r diweddariad mewn perthynas â’r Bil Great British Energy a'i fod eisoes wedi penderfynu peidio â gosod dyddiad i bwyllgorau gyflwyno adroddiad ar Femorandwm Cydsyniad Deddfwriaethol Atodol (Rhif 3), ond bod pwyllgorau'n parhau i allu adrodd i'r Senedd os ydynt yn dymuno gwneud hynny;
• nodi'r sefyllfa ddiweddaraf mewn perthynas â'r Bil Dŵr (Mesurau Arbennig) ac y byddai pwyllgorau'n gallu adrodd i'r Senedd ar Femorandwm Cydsyniad Deddfwriaethol Atodol (Rhif 7) pe baent yn dewis gwneud hynny, ond cytunodd i beidio â gosod dyddiad ar gyfer cyflwyno adroddiad yng ngoleuni'r ffaith bod y Bil wedi cael Cydsyniad Brenhinol;
• nodi bod Llywodraeth Cymru wedi gwrthod cyflwyno cynnig ar gyfer dadl bellach ar gydsyniad deddfwriaethol ar y Bil Dŵr (Mesurau Arbennig) cyn y toriad hanner tymor. Nododd y Trefnydd fod yr amserlen ar gyfer y Bil yn San Steffan wedi golygu nad oedd yn bosibl i'r Senedd roi barn bellach ar gydsyniad ar yr adeg honno.

Cydnabu'r Trefnydd eto y sefyllfa annerbyniol y mae hyn yn rhoi’r Senedd ynddi ac y bydd y Llywodraeth yn parhau i gyfeirio at bwysigrwydd y broses gydsynio deddfwriaethol fel ffactor i Lywodraeth y DU fod yn ymwybodol ohono wrth amserlennu ei deddfwriaeth.

·       Julie James AS, Cwnsler Cyffredinol a’r Gweinidog Cyflawni, Llywodraeth Cymru

·       Charlie Thomas, Dirprwy Gyfarwyddwr, Is-adran Ddeddfwriaeth, Llywodraeth Cymru

Cafodd y Pwyllgor Busnes friff gan y Cwnsler Cyffredinol a'r Gweinidog Cyflawni ar gynnig gan y Llywodraeth i addasu'r broses cyn cyflwyno ar gyfer Biliau. Amlinellodd y Cwnsler Cyffredinol mai nod y newid fyddai cynorthwyo pwyllgorau'r Senedd yn eu hystyriaethau a helpu'r Pwyllgor Busnes i benderfynu ar amserlenni ar gyfer Biliau’r Llywodraeth a gyflwynir ym mlwyddyn olaf y rhaglen ddeddfwriaethol.

Holodd y Rheolwyr Busnes y Cwnsler Cyffredinol am y dull arfaethedig a nododd y byddai briff pellach ar oblygiadau posibl yn cael ei ddarparu mewn cyfarfod yn y dyfodol.