Agenda a Chofnodion

Croesawodd y Llywydd yr Aelodau i’r cyfarfod. Cafwyd ymddiheuriadau gan Darren Millar AS. Roedd Paul Davies AS yn bresennol fel dirprwy ar ei ran.

Cytunwyd ar gofnodion y cyfarfod blaenorol i’w cyhoeddi.

Dydd Mawrth

Rhoddodd y Trefnydd wybod i’r Rheolwyr Busnes am y newidiadau a ganlyn:

·       Datganiad gan Ysgrifennydd y Cabinet dros Drafnidiaeth a Gogledd Cymru: Porthladd Caergybi (45 munud)

·       Datganiad gan Ysgrifennydd y Cabinet dros Iechyd a Gofal Cymdeithasol: Pwysau'r Gaeaf ar y GIG (45 munud)

·       Datganiad gan Ysgrifennydd y Cabinet dros yr Economi, Ynni a Chynllunio: Grŵp Gorchwyl a Gorffen Gwynt ar y Môr (45 munud)

·       Datganiad gan Ysgrifennydd y Cabinet dros Gyllid a’r Gymraeg: Technoleg a’r Gymraeg (45 munud) Datganiad Ysgrifenedig 

Rhoddodd y Llywydd wybod i’r Rheolwyr Busnes y byddai’n talu teyrnged i Jenny Randerson ar ddechrau’r Cyfarfod Llawn heddiw, cyn gwahodd Jane Dodds i siarad fel Arweinydd Democratiaid Rhyddfrydol Cymru.

Yn dilyn ymddiswyddiad Paul Davies fel Cadeirydd Pwyllgor yr Economi, Masnach a Materion Gwledig, cytunodd y Pwyllgor Busnes y dylai cadeiryddiaeth y Pwyllgor hwnnw barhau i gael ei ddyrannu i grŵp y Ceidwadwyr. Cytunodd y Pwyllgor Busnes y byddai’r Llywydd yn gwahodd enwebiadau ar gyfer y rôl hon ar ddechrau’r Cyfarfod Llawn heddiw, gyda chanlyniad unrhyw bleidlais gyfrinachol yn cael ei gyhoeddi ar ddiwedd y cyfarfod. 

Hefyd, cytunodd y Pwyllgor Busnes i gyflwyno cynigion i newid yr aelodau Ceidwadol ar nifer o bwyllgorau i'w hystyried yn y Cyfarfod Llawn ddydd Mawrth.

O ganlyniad, cytunwyd ar y newidiadau ychwanegol a ganlyn i agenda ddydd Mawrth:  

·       Cynnig i ethol Aelodau i bwyllgorau (5 munud)

·       Enwebiadau ar gyfer Cadeirydd Pwyllgor (5 munud)

·       Ni fydd Cyfnod Pleidleisio.

·       Nid yw'r Cyfarfod Llawn yn debygol o fynd y tu hwnt i 6.00pm

Dydd Mercher

Rhoddodd y Llywydd wybod i’r Rheolwyr Busnes am y newid a ganlyn:

• Cwestiynau i Gomisiwn y Senedd (30 10 munud) 

• Caiff y Cyfnod Pleidleisio ei gynnal cyn y Ddadl Fer.  
• Nid yw'r Cyfarfod Llawn yn debygol o fynd y tu hwnt i 6.20pm

Rhoddodd y Trefnydd wybod i’r Rheolwyr Busnes am y newidiadau a ganlyn i amserlen Busnes y Llywodraeth ar gyfer y tair wythnos nesaf:

Dydd Mawrth 14 Ionawr 2025

·       Datganiad gan Ysgrifennydd y Cabinet dros Lywodraeth Leol a Thai: Cartrefi Cynnes (45 munud)

·       Datganiad gan Ysgrifennydd y Cabinet dros Iechyd a Gofal Cymdeithasol: Pwysau Gaeaf y GIG (45 munud)

Dydd Mawrth 21 Ionawr 2025

·       Datganiad gan y Dirprwy Brif Weinidog ac Ysgrifennydd y Cabinet dros Newid Hinsawdd a Materion Gwledig: Adfer natur yng Nghymru (45 munud)

·       Rheoliadau Cynlluniau Gostyngiadau’r Dreth Gyngor (Gofynion Rhagnodedig a’r Cynllun Diofyn) (Diwygiadau Amrywiol) (Cymru) 2025 (5 munud)

·       Rheoliadau Treth Trafodiadau Tir (Addasu Rhyddhad ar gyfer Safleoedd Treth Arbennig) (Cymru) 2025 (5 munud)

·       Rheoliadau Treth Trafodiadau Tir (Bandiau Treth a Chyfraddau Treth) (Cymru) (Diwygio) 2024 (15 munud)

Cytunwyd ar y newidiadau a ganlyn i amserlen busnes y Senedd ar gyfer y tair wythnos nesaf:

Dydd Mercher 22 Ionawr 2025 –

• Dadl ar NNDM8756: Mabon ap Gwynfor AS (Dwyfor Meirionnydd) (60 munud)

Dydd Mercher 29 Ionawr 2025 –

• Dadl ar adroddiad y Pwyllgor Cyllid: Cyfalaf Trafodion Ariannol (30 munud)
• Amser a neilltuwyd i’r Ceidwadwyr Cymreig (60 munud)
• Amser a neilltuwyd i Blaid Cymru (60 munud)
• Dadl Fer: Delyth Jewell AS (Dwyrain De Cymru) (30 munud)

Trafododd y Pwyllgor Busnes bapur ar Femoranda Cydsyniad Deddfwriaethol a chytunodd i:

• gyfeirio'r Memorandwm Cydsyniad Deddfwriaethol ar y Bil Hawliau Cyflogaeth at Bwyllgor yr Economi, Masnach a Materion Gwledig; y Pwyllgor Cydraddoldeb a Chyfiawnder Cymdeithasol; a’r Pwyllgor Deddfwriaeth, Cyfiawnder a’r Cyfansoddiad ar gyfer craffu arno, gyda dyddiad cau ar gyfer cyflwyno adroddiad o 7 Mawrth 2025;
• cyfeirio’r Memorandwm Cydsyniad Deddfwriaethol ar y Bil Data (Defnydd a Mynediad) at y Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol; Pwyllgor yr Economi, Masnach a Materion Gwledig; y Pwyllgor Newid Hinsawdd, yr Amgylchedd a Seilwaith; y Pwyllgor Cydraddoldeb a Chyfiawnder Cymdeithasol; a’r Pwyllgor Deddfwriaeth, Cyfiawnder a’r Cyfansoddiad ar gyfer craffu arno, gyda dyddiad cau ar gyfer cyflwyno adroddiadau o 7 Mawrth 2025. Nododd y Trefnydd y gallai fod yn bosibl ymestyn y terfyn amser hwn, yn amodol ar amserlen y Bil yn Senedd y DU; ac
• ymestyn y dyddiad cau ar gyfer adrodd ar y Memorandwm Cydsyniad Deddfwriaethol ar y Bil Hawliau Rhentwyr tan 31 Ionawr 2025.

Nododd y Pwyllgor hefyd y byddai swyddogion y Senedd a Llywodraeth Cymru yn trafod y posibilrwydd o ymestyn y dyddiad cau ar gyfer adrodd ar y Memorandwm Cydsyniad Deddfwriaethol ar y Bil Dŵr (Mesurau Arbennig) o 10 Ionawr 2025, o gofio bod y ddadl ar gydsyniad ar hyn o bryd wedi’i threfnu ar gyfer 28 Ionawr a’i bod yn bosibl y gallai Memorandwm Cydsyniad Deddfwriaethol atodol ychwanegol gael ei osod.

Cytunodd y Pwyllgor Busnes i gyfeirio'r Rheoliadau Treth Trafodiadau Tir (Bandiau Treth a Chyfraddau Treth) (Cymru) (Diwygio) 2024 at y Pwyllgor Cyllid a’r Pwyllgor Deddfwriaeth, Cyfiawnder a'r Cyfansoddiad i graffu arnynt, ac i ofyn i'r pwyllgorau adrodd erbyn 20 Ionawr 2025, cyn y ddadl ar y rheoliadau yn y Senedd, a drefnwyd ar gyfer 21 Ionawr 2025.