Agenda a Chofnodion

Croesawodd y Llywydd yr Aelodau i’r cyfarfod. Cafwyd ymddiheuriadau gan Jane Dodds.

Cytunwyd ar gofnodion y cyfarfod blaenorol i’w cyhoeddi.

Dydd Mawrth

• Caiff y Cyfnod Pleidleisio ei gynnal fel yr eitem olaf o fusnes.
• Nid yw'r Cyfarfod Llawn yn debygol o fynd y tu hwnt i 6.00pm.

Dydd Mercher 

• Caiff y Cyfnod Pleidleisio ei gynnal cyn y Ddadl Fer.
• Nid yw'r Cyfarfod Llawn yn debygol o fynd y tu hwnt i 7.10pm. 

Dywedodd y Llywydd wrth y Rheolwyr Busnes ei bod yn bwriadu dod â’r egwyl cyn y cyfnod pleidleisio i ben, gan ddechrau o'r Cyfarfod Llawn yr wythnos hon. Gofynnodd i Reolwyr Busnes atgoffa Aelodau eu grwpiau mai eu cyfrifoldeb nhw fydd sicrhau eu bod yn bresennol ac yn barod i bleidleisio cyn dechrau'r cyfnod pleidleisio, a nododd y gall hyn fod yn gynharach na'r amseru dangosol ar yr agenda.

Tynnodd y Trefnydd sylw'r Rheolwyr Busnes at y newidiadau a ganlyn:

Dydd Mawrth 18 Hydref –

·         Datganiad gan Weinidog y Gymraeg ac Addysg: Model Addysg Gyflenwi (30 munud)  Tynnwyd yn ôl

·         Datganiad gan Weinidog y Gymraeg ac Addysg: Taith – cyflwyno rhaglen gyfnewid dysgu rhyngwladol arloesol Cymru (30 munud)

Dydd Mawrth 25 Hydref –

·         Dadl: Adroddiad Blynyddol 2021-22 Comisiynydd y Gymraeg (60 munud) wedi’i symud o 8 Tachwedd

Cytunodd y Pwyllgor Busnes i gynnwys yr eitemau o fusnes a ganlyn ar yr amserlen:

Dydd Mercher 9 Tachwedd 2022 –

• Dadl ar adroddiad Pwyllgor yr Economi, Masnach a Materion Gwledig: Codi'r Bar - Sicrhau dyfodol y sectorau lletygarwch, twristiaeth a manwerthu (60 munud)
• Dadl ar Adroddiad Blynyddol 2021/22 y Pwyllgor Deddfwriaeth, Cyfiawnder a'r Cyfansoddiad (60 munud)
• Amser a neilltuwyd i Blaid Cymru (60 munud)

Cafodd y Pwyllgor Busnes gais gan y Pwyllgor Deisebau i gynnal dadl frys ar ddeiseb P-06-1294: Peidiwch â gadael cleifion â chanser y fron metastatig yng Nghymru ar ôl, a gafodd 14,106 o lofnodion, a chytunwyd i drefnu dadl 30 munud ddydd Mercher 19 Hydref.  

Nododd y Pwyllgor Busnes yr ymateb a gafwyd gan y Pwyllgor a chytunodd na fyddai angen addasu'r amserlen bresennol ar gyfer craffu ar y Bil.

Cytunodd y Pwyllgor Busnes mewn egwyddor i gyfeirio'r Bil at y Pwyllgor Newid Hinsawdd, yr Amgylchedd a Seilwaith ar gyfer trafodion Cyfnod 2, pe bai'r Senedd yn cytuno ar yr egwyddorion cyffredinol.

Cytunodd y Pwyllgor Busnes i gyfeirio'r Rheoliadau at y Pwyllgor Deddfwriaeth, Cyfiawnder a'r Cyfansoddiad gyda dyddiad cau ar gyfer cyflwyno adroddiad dydd Llun 7 Tachwedd 2022, er mwyn galluogi'r rheoliadau hyn i gael eu hystyried gan y Senedd ddydd Mawrth 8 Tachwedd.  

Trafododd y Pwyllgor Busnes ddiweddariad gan Lywodraeth Cymru a chytunodd i gyfeirio'r Memorandwm Atodol ar y Bil Tai Cymdeithasol (Rheoleiddio) at y Pwyllgor Llywodraeth Leol a Thai a’r Pwyllgor Deddfwriaeth, Cyfiawnder a’r Cyfansoddiad ar gyfer craffu arno, gyda dyddiad cau ar gyfer cyflwyno adroddiad ar 1 Rhagfyr;

Nododd y Pwyllgor Busnes y llythyr.