Agenda a Chofnodion

Croesawodd y Llywydd yr Aelodau i’r cyfarfod.

Cytunwyd ar gofnodion y cyfarfod blaenorol i’w cyhoeddi.

Tynnodd y Trefnydd sylw'r Rheolwyr Busnes at ychwanegu dau ddatganiad at agenda dydd Mawrth:

·         Datganiad gan y Gweinidog Newid Hinsawdd: Fforddiadwyedd, Ail Gartrefi a'r Gymraeg (45 munud)

·         Datganiad gan Weinidog y Gymraeg ac Addysg: Diwygio'r Cwricwlwm – Y Camau Nesaf (45 munud)

Tynnodd y Trefnydd sylw'r Rheolwyr Busnes hefyd at y ffaith mai hi fyddai'n ateb cwestiynau'r Prif Weinidog yr wythnos hon, a byddai'r datganiad ar y Rhaglen Ddeddfwriaethol yn cael ei gyflwyno gan y Cwnsler Cyffredinol, yn absenoldeb y Prif Weinidog.

Dydd Mawrth

·         Ni fydd Cyfnod Pleidleisio.

·         Nid yw'r Cyfarfod Llawn yn debygol o fynd y tu hwnt i 7.05pm.

Dydd Mercher  

·         Caiff y Cyfnod Pleidleisio ei gynnal cyn y Ddadl Fer gyntaf.  

·         Nid yw'r Cyfarfod Llawn yn debygol o fynd y tu hwnt i 6.30pm. 

Tynnodd y Trefnydd sylw'r Rheolwyr Busnes at y newidiadau a ganlyn:

Dydd Mawrth 13 Gorffennaf 2021

·         Datganiad gan y Cwnsler Cyffredinol a Gweinidog y Cyfansoddiad: Confensiwn ar ein Dyfodol Cyfansoddiadol (30 munud)

·         Datganiad gan Weinidog y Gymraeg ac Addysg: Cymraeg 2050 (30 munud)

·         Datganiad gan y Dirprwy Weinidog Newid  Hinsawdd: Coed a Phren (30 munud)

Dydd Mercher 14 Gorffennaf 2021

·         Datganiad gan y Prif Weinidog: Cynllun Rheoli Coronafeirws (45 munud)

Dydd Mawrth 14 Medi 2021

·                     Cynnig Cydsyniad Deddfwriaethol ar Fil yr Amgylchedd (145 munud) 

Cododd Darren Millar a Sian Gwenllian bryderon am gyhoeddiadau polisi sylweddol gan Lywodraeth Cymru sy'n cael eu gwneud i'r cyfryngau yn hytrach nag i'r Senedd.

Dywedodd y Llywydd mai ei barn hi ers tro oedd y dylai cyhoeddiadau polisi sylweddol gael eu gwneud yn y Cyfarfod Llawn, ac y byddai'n parhau i ddefnyddio ei disgresiwn i dderbyn Cwestiynau Amserol yn ymwneud â materion o'r fath. Diolchodd y Trefnydd i'r Rheolwyr Busnes am godi'r mater a chytunodd i gyflwyno eu pryderon i Weinidogion.

Cytunodd y Pwyllgor Busnes i gynnwys yr eitemau o fusnes a ganlyn ar yr amserlen:

Dydd Mercher 22 Medi 2021 –

·         Amser a neilltuwyd i’r Ceidwadwyr Cymreig (60 munud)

·         Amser a neilltuwyd i Blaid Cymru (60 munud)

Nododd y Pwyllgor Busnes y sefyllfa ddiweddaraf o ran y Memoranda, a  chytunodd i gyfeirio'r Memorandwm ar Fil y Lluoedd Arfog at y Pwyllgor Cydraddoldeb a Chyfiawnder Cymdeithasol a’r Pwyllgor Deddfwriaeth, Cyfiawnder a’r Cyfansoddiad gyda dyddiad cau ar gyfer cyflwyno adroddiad ar 21 Hydref 2021.

Dywedodd y Trefnydd wrth y Pwyllgor Busnes fod y Gweinidog Newid Hinsawdd wedi cytuno i fynd i gyfarfod y Pwyllgor Deddfwriaeth, Cyfiawnder a’r Cyfansoddiad ar 12 Gorffennaf, ac wedi cael cais i fynd i gyfarfod y Pwyllgor Newid Hinsawdd, yr Amgylchedd a Seilwaith cyn toriad yr haf, ac y bydd yn ymateb maes o law.

Tynnodd y Trefnydd sylw'r Pwyllgor Busnes at y ffaith bod y llywodraeth wedi ymestyn yr amser ar gyfer y ddadl ar y Memorandwm ar 14 Medi i 45 munud. Bydd y Gweinidog yn ymateb i argymhellion y pwyllgorau yn ystod y ddadl.

Dywedodd y Trefnydd wrth y Pwyllgor Busnes hefyd fod y llywodraeth ar hyn o bryd yn aros am ymateb gan yr Ysgrifennydd Gwladol dros Amaethyddiaeth, Pysgodfeydd a Bwyd i gais i aildrefnu Trydydd Darlleniad yr Arglwyddi er mwyn rhoi mwy o amser i gynnal gwaith craffu yn y Senedd.

Cytunodd y Pwyllgor Busnes i gyfeirio'r Memorandwm at y Pwyllgor Deddfwriaeth, Cyfiawnder a’r Cyfansoddiad, a allai fod yn dymuno gwahodd y Pwyllgor Cydraddoldeb a Chyfiawnder Cymdeithasol i fod yn bresennol, gyda dyddiad cau ar gyfer cyflwyno adroddiad ar 14 Hydref 2021. Gofynnodd y Pwyllgor am bapur i egluro ble y dylai cyfiawnder a phlismona gael eu cynnwys yng nghylchoedd gorchwyl y pwyllgorau.

Cadarnhaodd y Pwyllgor Busnes y trefniadau ar gyfer cyflwyno busnes y Cyfarfod Llawn yn ystod toriad yr haf a chytunodd ar y trefniadau arferol ar gyfer cyflwyno Cwestiynau Ysgrifenedig.

Cytunodd y Pwyllgor Busnes ar ddyraniadau aelodaeth y pwyllgorau, gan gynnwys dyrannu lle i Jane Dodds ar y Pwyllgor Cydraddoldeb a Chyfiawnder Cymdeithasol.

Cytunodd y Pwyllgor Busnes ar amserlen sy'n caniatáu i'r Pwyllgor Deddfwriaeth, Cyfiawnder a’r Cyfansoddiad gyfarfod yn wythnosol, gyda phob pwyllgor arall yn cyfarfod bob pythefnos. Bydd rhai pwyllgorau hefyd yn cael y dewis o slot ychwanegol mewn rhai wythnosau penodol. Cytunodd y Pwyllgor hefyd y gallai'r Pwyllgor Cyllid gynnal cyfarfodydd ychwanegol at ddibenion craffu ar y gyllideb.

Cytunodd y Pwyllgor Busnes hefyd ar amserlen y pwyllgorau ar gyfer wythnos olaf y tymor, gyda disgwyliad y byddai pwyllgorau'n cyfarfod yn gyfan gwbl rithiol.

Cytunodd y Pwyllgor Busnes i gyflwyno cynigion i ethol Aelodau i bwyllgorau yfory.

Cytunodd y Rheolwyr Busnes i drafod gyda'u grwpiau a dychwelyd at y mater yng nghyfarfod yr wythnos nesaf. 

Cytunodd y Pwyllgor Busnes mai'r Dirprwy Lywydd ddylai gadeirio Pwyllgor y Llywydd, ac i ychwanegu cynigion i sefydlu'r pwyllgor a chytuno ar ei aelodaeth i agenda dydd Mercher nesaf.

Cytunodd y Pwyllgor Busnes i ymgynghori â’r Pwyllgor Cyllid ynghylch amserlen y gyllideb a dychwelyd at y mater yn y cyfarfod cyntaf ym mis Medi.

Nododd y Pwyllgor Busnes y llythyrau, gyda'u cynnwys wedi'i drafod o dan eitem amserlen busnes y Llywodraeth ar gyfer y tair wythnos nesaf.

Gwaith gweithdrefnol

Dywedodd y Llywydd wrth y Pwyllgor Busnes y bydd yr ysgrifenyddiaeth yn darparu papur ar ôl toriad yr haf ar ddull y Pwyllgor Busnes o weithredu ar gyfer adolygiad gweithdrefnol. Mynegodd y Llywydd yr hoffai i'r Pwyllgor gynnal sesiynau ychwanegol, yn gyhoeddus, er mwyn ystyried materion gweithdrefnol, o ystyried penderfyniad y Pwyllgor i beidio â chynnwys gweithdrefnau o fewn cylch gwaith pwyllgor arall.

Balot Aelod

Dywedodd y Llywydd wrth y Pwyllgor Busnes y bydd yn cyhoeddi yn y Cyfarfod Llawn y prynhawn yma y cynhelir balot gyntaf y Senedd hon ar gyfer Biliau Aelodau ar 22 Medi. Bydd gwybodaeth am y broses yn cael ei dosbarthu i'r Aelodau cyn diwedd y dydd.

Datganiadau llafar

Dywedodd y Trefnydd fod rhai Aelodau wedi bod yn dyfynnu o destun datganiadau llafar drafft a roddwyd iddynt o dan embargo, yn hytrach na'r datganiad fel y'i cyflwynwyd, ac nad oedd hyn yn briodol. Cytunodd y Rheolwyr Busnes i atgoffa eu Haelodau bod angen gwirio datganiadau yn erbyn y rhai a gyflwynir yn y Siambr.