Agenda a Chofnodion

Cafwyd ymddiheuriadau gan Caroline Jones; roedd David Rowlands yn bresennol yn ei lle.

Cytunwyd ar gofnodion cyfarfod yr wythnos diwethaf i’w cyhoeddi.

Tynnodd y Trefnydd sylw’r Rheolwyr Busnes at y ddau newid i fusnes yr wythnos hon - ychwanegu datganiad am y wybodaeth ddiweddaraf am y mesurau arbennig ym Mwrdd Iechyd Prifysgol Betsi Cadwaladr, a thrafod Rheoliadau Deddf Deddfwriaeth (Cymru) 2019 (Diwygio Atodlen 1) 2020 yn ddiweddarach yn ystod y dydd.

Newid yn y Siambr

Dywedodd y Llywydd wrth y Rheolwr Reolwyr y dylai'r Aelodau hynny sy'n eistedd wrth ymyl y seddi sy'n newid (meinciau’r Ceidwadwyr a’r llywodraeth ar hyn o bryd) hefyd adael y Siambr yn ystod y newid, a dychwelyd dim ond ar ôl i'r gloch ganu, er mwyn rhoi digon o le i’r rhai sy’n rheoli’r newid. 

Zoom

Gofynnodd y Llywydd i’r Rheolwyr Busnes atgoffa'r Aelodau hynny sy'n ymuno â'r Cyfarfod Llawn yn rhithwir wneud hynny mewn da bryd, a hynny oherwydd bod Zoom yn diweddaru ac mae’n bosibl y bydd angen iddynt roi  cyfrinair.

Tynnodd y Trefnydd sylw'r Rheolwyr Busnes at y newidiadau a ganlyn:

Dydd Mawrth 8 Rhagfyr 2020

·                     Datganiad gan Ddirprwy Weinidog yr Economi a Thrafnidiaeth: Y wybodaeth ddiweddaraf am Dasglu’r Cymoedd (45munud)

·                     Y Memorandwm Cydsyniad Deddfwriaethol ar y Bil Meddyginiaethau a Dyfeisiau Meddygol (15 munud)

·                     Dadl:  Adolygiad Blynyddol y Comisiwn Cydraddoldeb a Hawliau Dynol 2019-20 (60 munud)

Tynnodd y Trefnydd sylw’r Rheolwyr Busnes at y ddadl ynghylch y Memorandwm Cydsyniad Deddfwriaethol Atodol ar 15 Rhagfyr a’r cynnig i newid y dyddiad cau i bwyllgorau gyflwyno adroddiad arno i 11 Rhagfyr. 

Cytunodd y Pwyllgor Busnes i gynnwys yr eitemau busnes a ganlyn yn yr amserlen:

Dydd Mercher 2 Rhagfyr 2020 –

• Adroddiad y Pwyllgor Safonau Ymddygiad – Adroddiad 02-20 (15 munud)

Dydd Mercher 16 Rhagfyr 2020 –

• Dadl ar adroddiad y Pwyllgor Plant, Pobl Ifanc ac Addysg: Cadernid Meddwl: ddwy flynedd yn ddiweddarach (60 munud)
• Dadl ar adroddiad y Pwyllgor Diwylliant, y Gymraeg a Chyfathrebu ar effaith y pandemig ar y Gymraeg (30 munud)
• Amser a neilltuwyd i Blaid Cymru (60 munud)

Cytunodd y Pwyllgor Busnes y bydd angen i’r Pwyllgor Deddfwriaeth, Cyfiawnder a’r Cyfansoddiad gyflwyno adroddiad ar y Gorchymyn erbyn dydd Iau 3 Rhagfyr.

Cadarnhaodd y Pwyllgor Busnes y trefniadau ar gyfer gosod dogfennau yn ystod cyfnod y Nadolig, gan gynnwys cytuno ar y cynnig i glercod ar ddyletswydd fod ar alwad i gyhoeddi unrhyw ddogfennau a osodir rhwng y Nadolig a'r Flwyddyn Newydd.

Cadarnhaodd y Pwyllgor hefyd y trefniadau ar gyfer cyflwyno busnes y Cyfarfod Llawn yn ystod wythnos gyntaf y tymor a’r trefniadau ar gyfer cyflwyno gwelliannau i filiau. 

Cytunodd y Pwyllgor hefyd ar y trefniadau ar gyfer cyflwyno Cwestiynau Ysgrifenedig.

Diolchodd y Trefnydd i’r Comisiwn am roi trefniadau ar waith i ganiatáu i’r clercod ar ddyletswydd ymdrin ag unrhyw faterion yn ymwneud â Brexit neu Covid yn ystod y cyfnod y bydd y Senedd ar gau.

Cytunodd y Pwyllgor Busnes ar amserlen ar gyfer cyfarfod ychwanegol o’r Pwyllgor Plant, Pobl Ifanc ac Addysg ddydd Llun, 30 Tachwedd.