Agenda a Chofnodion

Nid oedd dim ymddiheuriadau.

Nid oedd dim datganiadau o fuddiant.

Cytunodd y Comisiynwyr ar Gofnodion y cyfarfod ar 28 Ebrill 2025.

Trafododd y Comisiynwyr y prif dybiaethau yn y gyllideb ddrafft ar gyfer 2026-27 sydd â goblygiadau ariannol, a’r hyn y dylid ei adlewyrchu yn y cyflwyniad cyllidebol i'r Pwyllgor Cyllid ym mis Hydref.

Rhoddodd y comisiynwyr eu barn gychwynnol ar y sail y bydd cyllideb ddrafft fanwl 2026/27 yn cael ei pharatoi; a chadarnhau fod y rhagdybiaethau gweithio yn briodol.

Byddai'r Gyllideb Ddrafft yn cael ei pharatoi ar gyfer cyfarfod y Comisiwn ym mis Medi, cyn cael ei gosod.   

Rhoddwyd diweddariad i'r Comisiynwyr ar brosiect Bae 32, a nodwyd y cynnydd a wnaed.

Rhoddwyd crynodeb i’r Comisiynwyr o'r materion sy'n debygol o godi ar gyfer Comisiwn y Senedd o adroddiad Pwyllgor Senedd y Dyfodol ar Fusnes Seneddol yn y Seithfed Senedd.

Yng ngoleuni'r cais gan Bwyllgor Senedd y Dyfodol, nododd y Comisiynwyr fod y Bwrdd Gweithredol wedi cytuno mewn egwyddor i sefydlu astudiaeth ddichonoldeb ar ailgyflwyno gwasanaeth crèche, a byddai manylion hyn yn destun cymeradwyaethau pellach maes o law. Gofynnodd Janet Finch Saunders AS am nodi ei gwrthwynebiad i crèche a ddarperir gan y Comisiwn.

Cafodd y crynodeb ei nodi gan y Comisiynwyr, a bydd papurau i lywio trafodaeth ar sut y gallai'r Comisiwn fod am ymateb yn cael eu darparu mewn cyfarfodydd yn y dyfodol.

Rhoddwyd canfyddiadau i’r Comisiynwyr yn deillio o adolygiad y gwasanaeth Addysg. Nod yr adolygiad oedd deall a yw’r ddarpariaeth bresennol yn cyd-fynd â gweithrediad y Cwricwlwm i Gymru, a deall yn well yr heriau y mae addysgwyr yn eu hwynebu, hygyrchedd ein cynnig, a’r rhwystrau gwirioneddol neu ganfyddedig sy’n bodoli wrth ymgysylltu â’n gwasanaethau .

Nododd y Comisiynwyr ddarpariaeth y dyfodol a chytunwyd gyda mwyafrif:

·         y dylai pob grŵp, gan gynnwys y rhai o fewn cwmpas 10 milltir i’r Senedd, fod yn gymwys i gael y cymhorthdal teithio;

·         i barhau â’r broses neilltuo lle â blaenoriaeth ar gyfer Sesiynau Addysg Fewnol o flwyddyn academaidd 2026/27 i fod ar gael i grwpiau sydd â chanran uwch o ddisgyblion sy’n gymwys i gael prydau ysgol am ddim; ac

·         yr Opsiwn a argymhellir i weithredu cynnydd o 50% yn y cymhorthdal teithio.

Cafodd y Comisiynwyr werthusiad o fformat Y Farchnad fel digwyddiad, a lansiwyd ym mis Mai 2024 fel cynllun peilot yn dilyn trafodaeth gan y Comisiynwyr ar nifer o gynigion i wneud defnydd mwy pwrpasol ac effeithiol o ystad y Senedd.

Cafodd y canlyniadau eu trafod gan y Comisiynwyr a chytunwyd ar yr opsiwn a argymhellir, i wneud Y Farchnad yn gynnig parhaol yn sgil llwyddiant y cynllun peilot, a fydd hefyd yn cynorthwyo i ddarparu ar gyfer y cynnydd yn y galw am ystafelloedd cyfarfod wrth i'r Senedd ehangu.

Trafododd y Comisiynwyr ymateb drafft i Ran Dau yr Ymgynghoriad ar Adolygiad y Bwrdd Taliadau Annibynnol o'r Penderfyniad ar Gyflogau a Lwfansau’r Aelodau ar gyfer y Seithfed Senedd.

Cytunodd y Comisiynwyr ar yr ymateb i ymgynghoriad y Bwrdd; a nododd yr ymateb a fydd yn cael ei anfon gan y Swyddog Cyfrifyddu.

Bydd y llythyr yn cael ei ddarparu i’r Bwrdd. Nid yw ymatebion yn cael eu cyhoeddi fel mater o drefn gan y Bwrdd, er y gallai ymatebion neu safbwyntiau cryno gael eu cynnwys yn yr adroddiad a gyhoeddir ar yr adolygiad blynyddol.

Yng nghyfarfod y Comisiynwyr ar 24 Mawrth, cytunwyd y dylai'r Gwasanaeth Adnoddau Dynol gynnal adolygiad o ganlyniadau llofnodi Cyfamod y Lluoedd Arfog a/neu Gynllun Cydnabod Cyflogwyr y Weinyddiaeth Amddiffyn. Ymateb oedd hyn, i gais gan Samuel Kurtz AS ar ran Grŵp y Ceidwadwyr Cymreig.

Cafodd y Comisiynwyr amlinelliad o ystyriaethau pellach i’w cynorthwyo i benderfynu a ddylai Comisiwn y Senedd wneud hynny.

Cytunodd y Comisiynwyr ar yr argymhelliad y dylai’r Comisiwn, ar sail y wybodaeth a ddarparwyd, lofnodi Cyfamod y Lluoedd Arfog, ond ymatal rhag ymrwymo i’r Cynllun Cydnabod Cyflogwyr am y tro oherwydd y polisïau adnoddau dynol sydd eisoes ar waith. 

Bydd llythyr yn cael ei anfon at Sam Kurtz AS i’w hysbysu o’r penderfyniad.

Nododd y Comisiynwyr y polisïau newydd i helpu i reoli absenoldeb staff y Comisiwn yn effeithiol, yn dilyn adolygu’r Polisi Rheoli Presenoldeb, nad oedd yn cynnwys camau gweithdrefnol allweddol o ran sut y dylid rheoli absenoldeb salwch hirdymor, a’i ddisodli gan bolisi newydd. Bydd y polisïau'n cael eu cyhoeddi a'u gweithredu ar gyfer staff y Comisiwn. Gofynnodd y Pwyllgor Cyfrifon Cyhoeddus a Gweinyddiaeth Gyhoeddus hefyd am gopi o'r polisi salwch hirdymor yn Argymhelliad 5 o'i adroddiad Craffu ar Adroddiad Blynyddol a Chyfrifon 2023-24.

Nododd y Comisiynwyr y Fframwaith Adnoddau Tymor Canolig wedi'i ddiweddaru, a gymeradwywyd gan y Bwrdd Gweithredol ar 15 Mai 2025, yn adlewyrchu cytundeb y Comisiwn yn ystod cyfarfod 28 Ebrill i ddiwygio'r amserlen amlinellol ar gyfer adolygu rhai gwasanaethau penodol sydd ar gontract allanol.

Nododd y Comisiynwyr y broses lywodraethu ar gyfer cymeradwyo'r polisïau templed (ac eithrio'r rhai sy’n orfodol gan Fwrdd Taliadau Annibynnol y Senedd) a gynhwysir yn y Llawlyfr Staff Cymorth a ddarperir i Aelodau o'r Senedd, i'w cefnogi yn eu rôl fel cyflogwyr staff cymorth.

Nododd y Comisiynwyr y crynodeb o benderfyniadau recriwtio a ddarperir fel mater o drefn i bob cyfarfod o'r Comisiwn.

Yn y cyfnod ers y cyfarfod diwethaf, roedd y Comisiynwyr wedi cytuno ar:

• naratif drafft Adroddiad Blynyddol y Comisiwn a gylchredwyd ar gyfer adolygu ac adborth ar 14 Mai 2025
• y papur cynigion a gylchredwyd ar 20 Mai 2025, ar gyfer y cwmpas a'r dull gorau posibl o gyflawni ar gyfer yr archwiliad senedd sy'n sensitif o ran rhywedd, o dan arweiniad Joyce Watson (fel y cytunwyd yn ei gyfarfod ar 25 Hydref 2024).

Nodasant hefyd:

Lythyrau gan y Bwrdd Taliadau mewn ymateb i Hefin David ar ran y Comisiwn, y Llywydd, a'r Prif Weithredwr, dyddiedig 10 Ebrill.