Agenda a Chofnodion

Ni chafwyd ymddiheuriadau

Ni chafwyd datganiadau o fuddiant.

Cytunodd y Comisiynwyr ar gofnodion y cyfarfod ar 29 Ebrill.

Roedd y Comisiynwyr wedi cytuno i drafod y dull arfaethedig o fewnoli gwasanaethau'r Comisiwn â grwpiau'r pleidiau ac adborth. Gofynnodd un Comisiynydd i adborth gael ei gofnodi bod ei grŵp plaid mewn egwyddor yn gwrthwynebu ymrwymo arian pellach neu gynyddu risg, ar sail yr adroddiad dan sylw ar y pryd.

Adolygodd y Comisiynwyr y drafft cyfredol o Adroddiad Blynyddol a Chyfrifon y Comisiwn ar gyfer y cyfnod rhwng 1 Ebrill 2023 a 31 Mawrth 2024 ar gyfer ei ystyried.

Gwnaethant nodi i'r broses o gwblhau fersiwn gyflawn o Adroddiad Blynyddol a Chyfrifon y Comisiwn gael ei gohirio oherwydd effaith nas datryswyd yn ymwneud â dyfarniad McCloud ar gyfrifiadau pensiwn. Mae'r oedi cyn cael y wybodaeth angenrheidiol am bensiynau gan Gynllun Pensiwn y Gwasanaeth Sifil yn fater sy'n effeithio ar yr holl lywodraethau a chyrff cyhoeddus sydd â staff yng Nghynllun Pensiwn y Gwasanaeth Sifil. Dywedodd y Prif Swyddog Cyllid fod Trysorlys EF wedi cyhoeddi FReM diwygiedig yn ddiweddar, gyda diwygiad cydymffurfio neu egluro a'r datgeliad gofynnol a nodir yn y diwygiad i egluro’r oedi. Yng ngoleuni'r newid hwn, byddai Archwilio Cymru yn adolygu geiriad y farn archwilio a’i diwygio i'r Adroddiad Blynyddol a Chyfrifon allu cael eu cwblhau.

Trafododd y Comisiynwyr adrannau naratif yr adroddiad a gofynnwyd am i’r wybodaeth ddiweddaraf am absenoldeb hirdymor oherwydd salwch gael ei darparu mewn cyfarfod yn y dyfodol. Gwnaethant hefyd drafod yr adroddiad gwariant gyda chyflenwyr Cymreig, a gofynnwyd am ragor o waith yn y rhan o'r adroddiad sy’n ymwneud ag Urddas a Pharch.

Cytunodd y Comisiynwyr i gael yr Adroddiad terfynol yn y cyfarfod ym mis Gorffennaf ar gyfer ei gymeradwyo, gyda’r adroddiad terfynol wedyn yn cael ei lofnodi gan Archwilydd Cyffredinol Cymru a’i osod, a’i gyhoeddi ar-lein.

Cafodd Comisiynwyr yr Adroddiad ar berfformiad cynaliadwyedd ystad y Senedd a gweithrediadau dros y flwyddyn ddiwethaf, a dynnodd sylw at gyflawniadau amgylcheddol allweddol, perfformiad yn erbyn targedau, gan gynnwys cynnydd y Strategaeth Carbon Niwtral, y defnydd o gyfleustodau, a chrynodeb o’r gwelliannau arfaethedig ar gyfer y flwyddyn ariannol sydd i ddod.

Cefnogodd y Comisiynydd â’r portffolio datblygu cynaliadwy yr adroddiad a gwnaeth sylwadau ar werth cael tîm sydd â gwir awydd i gyflawni yn y maes hwn. Trafododd y Comisiynwyr y goblygiadau posibl sy’n codi o rywfaint o'r gwaith angenrheidiol sy'n cael ei gynllunio ar gyfer yr ystad, a'r darlun ehangach o effeithiau'r Senedd.

Cytunodd y Comisiynwyr i gyhoeddi'r adroddiad yn amodol ar unrhyw fân gywiriadau neu olygiadau, a nododd iddo gael ei ddarparu i'r Pwyllgor Cyllid yn unol â’i argymhelliad sy’n ymwneud â gwybodaeth am arbed ynni.

Adolygodd y Comisiynwyr yr Adroddiad Blynyddol drafft ar y Cynllun Ieithoedd Swyddogol sy’n manylu’r gwaith a wnaed ar draws y sefydliad yn ystod 2023-24, i ganiatáu i’r Comisiwn gynnal ei ymrwymiad i ddarparu gwasanaethau dwyieithog rhagorol.

Mae'n ofynnol i Gomisiwn y Senedd osod adroddiad gerbron y Senedd yn nodi sut y mae'r Comisiwn wedi rhoi'r Cynllun ar waith yn ystod y flwyddyn dan sylw. 

Diolchodd y Comisiynydd â’r portffolio Ieithoedd Swyddogol i’r Gwasanaeth Cyfieithu a Chofnodi am y polisïau blaengar sydd wedi bod o fudd i’r ystad ac mewn gweithgareddau ymgysylltu. Soniodd y Comisiynwyr am fywiogrwydd ac optimistiaeth y timau sy'n croesawu pobl i'r senedd.

Cytunodd y Comisiynwyr ar yr adroddiad blynyddol drafft, gan gytuno y byddai’r Rhagair gan y Comisiynydd sy'n gyfrifol am yr Ieithoedd Swyddogol yn cael ei ddarparu i'r Comisiynwyr i’w nodi.

Nodwyd hefyd y byddai’r adroddiad terfynol yn cael ei gyhoeddi ar-lein ac y byddai cynnig yn cael ei gyflwyno gan y Llywydd i alluogi i’r ddadl ofynnol yn y Cyfarfod Llawn gael ei chynnal.

Adolygodd y Comisiynwyr gyfres yr Adroddiadau Blynyddol ar Amrywiaeth a Chynhwysiant ar gyfer 2023-24 sy’n adrodd ar gynnydd timau ar draws Comisiwn y Senedd i gyflawni’r amcanion sydd wedi’u nodi yn Strategaeth Amrywiaeth a Chynhwysiant y Comisiwn (2022-26).

Darperir Adroddiad Blynyddol Amrywiaeth a Chynhwysiant 2023-24, ynghyd â’r Adroddiad ar y Gweithlu, Recriwtio, Adrodd ar y Bwlch Cyflog, ac Adroddiad Archwiliad Cyflog Cyfartal ar gyfer 2023-24, a hynny er mwyn bodloni rhwymedigaethau’r Comisiwn o dan Ddyletswyddau Cydraddoldeb y Sector Cyhoeddus (Deddf Cydraddoldeb 2010).

Tynnodd y Comisiynydd â'r portffolio Cydraddoldeb sylw at rai agweddau allweddol ar yr adroddiad, gan gynnwys cyflwyno hyfforddiant Urddas a Pharch gorfodol i staff y Comisiwn; lansiad y rhwydwaith cyfathrebu staff, Engage a Grŵp Llywio Amrywiaeth a Chynhwysiant; a’r ffaith y byddai'r adroddiad yn darparu gwybodaeth ychwanegol ynghylch anabledd, iechyd meddwl a llesiant.

Cymeradwyodd y Comisiynwyr gyhoeddi’r adroddiad, ynghyd â'r gyfres gysylltiedig o adroddiadau data Amrywiaeth a Chynhwysiant a fyddai'n cyflawni dyletswyddau'r sector cyhoeddus a nodir yn Neddf Cydraddoldeb 2010.

Nododd y Comisiynwyr y fersiwn ddiweddaraf o’r Fframwaith Adnoddau Tymor Canolig.

Cytunodd y Comisiynwyr ar lythyr at y Pwyllgor Cyfrifon Cyhoeddus a Gweinyddiaeth Gyhoeddus mewn ymateb i argymhellion y Pwyllgor i’r Comisiwn ei fod yn darparu gwybodaeth a diweddariadau mewn perthynas â’r rhaglen Ffyrdd o Weithio ac allbynnau o’r Fframwaith Adnoddau Tymor Canolig.

Cafodd y Comisiynwyr ddiweddariad ar statws presennol y trafodaethau cyflog ac, yn benodol, y ffaith bod ymateb i’r cynnig diweddaraf yn ddisgwyliedig, ac y byddai opsiynau ar gyfer y Comisiwn yn cael eu darparu cyn gynted â phosibl.

Cafodd y Comisiynwyr ddiweddariad ar y cynlluniau presennol ar gyfer diwrnod cwrdd i ffwrdd y Comisiwn, y cytunwyd ar ei gynnal ar 15 Gorffennaf.

Nododd y Comisiynwyr lythyr y Bwrdd Taliadau sy’n gofyn am sylwadau ar y goblygiadau i Gomisiwn y Senedd yn sgil trywydd arfaethedig y Bwrdd mewn perthynas â newidiadau i’r fframwaith cyflogau a graddau ar gyfer staff cymorth y Senedd. Cytunodd y Comisiynwyr i gytuno ar ymateb y tu allan i'r cyfarfod.

Nododd y Comisiynwyr lythyr y Pwyllgor Cyllid a oedd yn gofyn am ragor o wybodaeth am sut y mae'r Comisiwn yn bwriadu ymgysylltu ag Aelodau ynghylch darparu gwasanaethau yn y dyfodol, a hynny er mwyn sicrhau eu bod yn adlewyrchu eu blaenoriaethau a bod modd eu rheoli o fewn yr adnoddau presennol. Cytunodd y Comisiynwyr i gytuno ar ymateb y tu allan i'r cyfarfod. 

Nododd y Comisiynwyr y llythyr a ddaeth i law yn dilyn y gwaith craffu ar Fil Senedd Cymru (Rhestrau Ymgeiswyr Etholiadol) yng Nghyfnod 1. Roedd y Pwyllgor yn nodi dau argymhelliad i Gomisiwn y Senedd. Cytunodd y Comisiynwyr i drafod y materion sy’n codi yn sgil yr argymhellion mewn cyfarfod yn y dyfodol.

Nododd y Comisiynwyr y fersiwn ddiweddaraf o’r strategaeth TGCh a Darlledu, sy’n cael ei hadolygu yn flynyddol er mwyn caniatáu i’r Comisiwn gadw i fyny â'r newidiadau parhaus ym myd technoleg.

Nododd y Comisiynwyr gofnodion cyfarfod ARAC a gynhaliwyd ar 3 Mai.

Nododd y Comisiynwyr y crynodeb o benderfyniadau diweddar o ran recriwtio.

Yn y cyfnod ers y cyfarfod diwethaf, mae’r Comisiynwyr wedi nodi llythyr at y Bwrdd Taliadau yn ymwneud â Chynllun Pensiwn yr Aelodau.