Cofnodion

Nodwyd y cofnodion gan y Pwyllgor i’w cyhoeddi.

Cytunodd y Pwyllgor Busnes y byddai’r Cyfnod Pleidleisio’n cael ei gynnal cyn y Ddadl Fer ddydd Mawrth a dydd Mercher.

Nododd y Pwyllgor amserlen busnes y Llywodraeth ar gyfer y tair wythnos nesaf.

Cytunodd y Pwyllgor Busnes i roi lle yn yr amserlen i’r eitem a ganlyn:

Dydd Mercher 28 Tachwedd 2012

·         Cynnig i ddiwygio Rheol Sefydlog 6 mewn perthynas â Chadeirydd Dros Dro yn y Cyfarfod Llawn (5 munud)

Cytunodd y Pwyllgor ar drefn busnes y Cynulliad.

Dewisodd y Pwyllgor Busnes y cynnig a ganlyn ar gyfer dadl:

Dydd Mercher 28 Tachwedd 2012

NNDM5096

Ken Skates (De Clwyd)

Eluned Parrott (Canol De Cymru)

David Melding (Canol De Cymru)

Llyr Huws Gruffydd (Gogledd Cymru)

Mae Cynulliad Cenedlaethol Cymru:

1. Yn cydnabod ac yn gresynu bod pobl sydd â phroblemau iechyd meddwl yn dioddef stigma a gwahaniaethu;

2. Yn croesawu Amser i Newid Cymru, sef yr ymgyrch genedlaethol gyntaf i roi terfyn ar y stigma a'r gwahaniaethu y mae pobl sydd â phroblemau iechyd meddwl yng Nghymru yn eu hwynebu;

3. Yn nodi’r gwaith ymchwil a gynhaliwyd yn ddiweddar gan Amser i Newid Cymru, a oedd yn dangos bod:

a) un ym mhob pedwar yn credu na ddylid caniatáu i bobl sydd â phroblemau iechyd meddwl fod mewn swydd gyhoeddus; a

b) un ym mhob 10 yn credu na ddylid caniatáu i bobl sydd â phroblemau iechyd meddwl gael plant;

4. Yn cydnabod bod pobl sydd â materion iechyd meddwl yn chwarae rhan sylweddol mewn cymdeithas, yn gweithio ar draws ystod o sectorau ac yn gwneud cyfraniadau pwysig at yr economi; a

5. Yn galw ar Lywodraeth Cymru i gefnogi’r ymgyrch Amser i Newid Cymru a dangos ymrwymiad i roi terfyn ar y stigma a’r gwahaniaethu sy’n gysylltiedig ag iechyd meddwl.

Cytunodd y Rheolwyr Busnes i gynnal y ddadl nesaf gan Aelod unigol ddydd Mercher 30 Ionawr 2013.

Cytunodd y Rheolwyr Busnes i ymgynghori â’u grwpiau ynghylch y dewis gorau o ran y dewisiadau i adolygu Cwestiynau’r Cynulliad, gyda’r bwriad o’i drafod ymhellach yn ystod cyfarfod y Pwyllgor Busnes ar 4 Rhagfyr 2012.

Cytunodd y Pwyllgor Busnes â chais gan y Pwyllgor Amgylchedd a Chynaliadwyedd i ymweld ag Iwerddon ar 5-6 Rhagfyr 2012, ar yr amod y byddai Aelodau ar gael ar gyfer cyfarfodydd pwyllgor a’r Cyfarfod Llawn ar 5 Rhagfyr.

Cytunodd y Pwyllgor Busnes i gyfeirio’r Bil Trawsblannu Dynol (Cymru) i’r Pwyllgor Iechyd a Gofal Cymdeithasol i’w ystyried. Cytunodd y Pwyllgor Busnes y dylid cyflwyno adroddiad ar egwyddorion cyffredinol y Bil erbyn 22 Mawrth 2013. Ar yr amod bod y Bil yn cael ei gytuno arno yng Nghyfnod 1, cytunodd y Pwyllgor Busnes y dylid cwblhau trafodion Cyfnod 2 erbyn 7 Mehefin 2013.

Cytunodd y Rheolwyr Busnes i gyfeirio’r Gorchymyn yn ffurfiol i’r Pwyllgor Amgylchedd a Chynaliadwyedd i’w ystyried, a nododd y byddai’r Pwyllgor Materion Cyfansoddiadol a Deddfwriaethol yn cyflwyno adroddiad cyn pen 30 diwrnod i’r dyddiad y cafodd y Gorchymyn ei osod.

Ystyriodd y Pwyllgor Busnes adroddiad drafft ar ddiwygio Rheol Sefydlog 6 mewn perthynas â Chadeirydd Dros Dro yn y Cyfarfod Llawn, a chymeradwyodd yr adroddiad. Cytunodd y Rheolwyr Busnes i gyflwyno cynnig i ddiwygio’r Rheol Sefydlog i’r Cynulliad ei ystyried ddydd Mercher 28 Tachwedd 2012.