Cofnodion

Roedd Lindsay Whittle yn dirprwyo ar ran Jocelyn Davies, a anfonodd ymddiheuriadau.

Nodwyd y cofnodion gan y Pwyllgor fel rhai a oedd yn barod i’w cyhoeddi.  

Cytunodd Arweinydd y Tŷ y byddai’r pleidleisio ddydd Mawrth ar y gyllideb ddrafft ac ar y ddadl ar wasanaethau cymdeithasol cynaliadwy yn digwydd ar ddiwedd y dadleuon hynny, yn amodol ar gadarnhad.

Cytunodd y Pwyllgor Busnes y byddai’r Cyfnod Pleidleisio cyn y ddadl fer ddydd Mercher.

Nododd y Pwyllgor amserlen tair wythnos o fusnes y Llywodraeth.

Penderfynodd y Pwyllgor ar drefn busnes y Cynulliad.

Bu’r Pwyllgor Busnes yn ystyried papur gan y Llywodraeth ynghylch Memorandwm Cydsyniad Deddfwriaethol atodol mewn perthynas â’r Bil Diogelu Rhyddidau. Cytunodd y Pwyllgor i gyfeirio’r Memorandwm i’r Pwyllgor Materion Cyfansoddiadol a Deddfwriaethol fel y gall graffu arno cyn iddo fod yn destun dadl yn y Cyfarfod Llawn; y dyddiad terfyn ar gyfer cyflwyno adroddiad yw 24 Ionawr 2012.

Bu’r Pwyllgor Busnes yn ystyried opsiynau wrth-gefn i sicrhau nad oes unrhyw ran o’r busnes sydd wedi’i drefnu gan y Cynulliad yn cael ei golli os oes gweithredu diwydiannol ar 30 Tachwedd.  

Cytunodd y Llywodraeth i ddod â’r cwestiynau llafar a ganlyn yn nes. Byddant, felly, yn cael eu cynnal ddydd Mawrth 29 Tachwedd:

·         Cwestiynau i Weinidog yr Amgylchedd a Datblygu Cynaliadwy (45 munud)

·         Cwestiynau i’r Gweinidog Tai, Adfywio a Threftadaeth (45 munud)

Cytunodd y Rheolwyr Busnes mai’r opsiwn a oedd well ganddynt oedd ymestyn y Cyfarfod Llawn ddydd Mawrth 6 Rhagfyr a dydd Mercher 7 Rhagfyr fel bod amser i ymdrin â’r eitemau sy’n weddill o fusnes y Cynulliad a oedd i’w gynnal ar 30 Tachwedd. Cytunodd y Pwyllgor Busnes i ystyried y cynllun wrth-gefn ymhellach yn ei gyfarfod nesaf.