Cofnodion

Nododd y Pwyllgor y cofnodion fel rhai a oedd yn barod i’w cyhoeddi. 

Cyhoeddodd Arweinydd y Tŷ y bydd y Prif Weinidog yn gwneud datganiad ynghylch Dulliau Llywodraeth Cymru i Sbarduno’r Economi ddydd Mercher.

Ddydd Mawrth, bydd y cyfnod pleidleisio yn cael ei gynnal ar ôl yr eitem olaf o fusnes. Ddydd Mercher, cytunodd y Pwyllgor Busnes na fyddai’r cyfnod pleidleisio yn cael ei gynnal cyn y ddadl fer.

Nododd y Pwyllgor amserlen Busnes y Llywodraeth ar gyfer y tair wythnos nesaf.

Trefnodd y Pwyllgor Busnes amser ar gyfer yr eitem a ganlyn:

Dydd Mawrth 18 Hydref 2011

·         Dadl fer a ohiriwyd ers 5 Hydref 2011 – Dafydd Elis-Thomas: Diwygio Amodau Deiliadaeth y Sector Rhentu Preifat (30 munud)

Cytunodd y Pwyllgor ar drefn busnes y Cynulliad.

Ystyriodd y Pwyllgor Busnes y cynigion heb ddyddiad trafod a gyflwynwyd gan Aelodau unigol gan ddewis y cynnig a ganlyn i’w drafod ddydd Mercher 19 Hydref 2011:

NNDM4825 Christine Chapman (Cwm Cynon), Julie Morgan (Gogledd Caerdydd), Lindsay Whittle (Dwyrain De Cymru), Kirsty Williams (Brycheiniog a Sir Faesyfed)

Cynnig bod Cynulliad Cenedlaethol Cymru:

Yn annog Llywodraeth Cymru i gyflwyno deddfwriaeth i’r Cynulliad ei hystyried a fyddai’n cael gwared ar y gallu i ddefnyddio ‘cosb gyfreithlon’ fel amddiffyniad yn erbyn cyhuddiad o ymosod ar blentyn.

Ystyriodd y Pwyllgor Busnes y broses o ddewis a blaenoriaethu cynigion yn y dyfodol, o ystyried faint o ddiddordeb a oedd gan Aelodau. Cytunodd y Rheolwyr Busnes i ymgynghori â’u grwpiau ac i drafod y mater eto ar ôl hanner tymor.

Gofynnodd Peter Black am ganllawiau i sut mae’r Llywydd yn penderfynu a ddylid derbyn cwestiwn brys ai peidio. Atgoffodd y Llywydd y Rheolwyr Busnes nad oedd gofyn iddi roi rheswm dros ei phenderfyniad i ganiatáu neu i wrthod cwestiwn brys ond nododd fod angen i gwestiynau fod yn rhai brys ac o bwys i’r cyhoedd.