Cofnodion

Anfonodd y Dirprwy Lywydd ei ymddiheuriadau.

Nododd y Pwyllgor y cofnodion i’w cyhoeddi.

Hysbysodd Arweinydd y Tŷ y Pwyllgor y bydd y datganiad a ganlyn yn cael ei wneud ddydd Mawrth:

·         Datganiad gan y Gweinidog Llywodraeth Leol a Chymunedau: Yr ymateb brys i’r llifogydd mawr yng nghanolbarth a gogledd Cymru (30 munud)

Bydd y Pwyllgor Busnes yn gwneud cynigion i newid aelodaeth Llafur ar bwyllgorau ddydd Mercher.

Ddydd Mawrth, cynhelir y Cyfnod Pleidleisio ar ôl yr eitem olaf o fusnes. Cytunodd y Pwyllgor Busnes y byddai’r Cyfnod Pleidleisio yn cael ei gynnal cyn y Ddadl Fer ddydd Mercher.

Yn absenoldeb y Dirprwy Lywydd, nododd y Pwyllgor Busnes y bydd angen ethol Dirprwy Lywydd neu Gadeirydd dros dro ar gyfer dydd Mawrth a dydd Mercher.

Nododd y Pwyllgor amserlen busnes y Llywodraeth ar gyfer y tair wythnos nesaf.

Cytunodd y Pwyllgor Busnes i drefnu amser ar gyfer yr eitem o fusnes a ganlyn:

Dydd Mercher 20 Mehefin 2012

·         Cynnig i ddiwygio Rheolau Sefydlog mewn perthynas â Biliau Preifat a Gwelliannau Amrywiol (5 munud)

Penderfynodd y Pwyllgor ar drefn busnes y Cynulliad.

Bu’r Pwyllor Busnes yn ystyried argymhellion a wnaed gan y Pwyllgor Materion Cyfansoddiadol a Deddfwriaethol yn ei adroddiad ar ei ymchwiliad i roi pwerau i Weinidogion Cymru yn Neddfau’r DU. Cytunodd y Rheolwyr Busnes mewn egwyddor i’r argymhellion ynghylch gweithdrefnau’r Cynulliad. 

Ynglŷn ag Argymhelliad 11, cytunodd y Rheolwyr Busnes mewn egwyddor i edrych ar sut y gellid ymestyn y weithdrefn dros dro a gytunwyd arni ar gyfer ystyried Gorchmynion y Ddeddf Cyrff Cyhoeddus i gynnwys is-ddeddfwriaeth a wnaed gan Weinidogion y DU sydd yn dod o fewn cymhwysesdd y Cynulliad neu y gallai effeithio ar gymhwysedd y Cynulliad, yn amodol ar gynnal adolygiad o’r weithdrefn dros dro.

Bu’r Pwyllgor Busnes yn ystyried adroddiad drafft ar newidiadau i’r Rheolau Sefydlog mewn perthynas â Biliau Preifat a Gwelliannau Amrywiol, a chymeradwyodd yr adroddiad. Cytunodd y Rheolwyr Busnes i gyflwyno cynnig i ddiwygio’r Rheolau Sefydlog i’r Cynulliad ei ystyried ddydd Mercher 20 Mehefin 2012.

Ceisiadau am Amser y Cynulliad

Er mwyn sicrhau amser ar gyfer holl ddadleuon ar adroddiadau pwyllgorau tuag at ddiwedd y tymor, cytunodd y Rheolwyr Busnes, dros dro, i leihau’r amser ar gyfer holl ddadleuon ar adroddiadau pwyllgorau a dadleuon y gwrthbleidiau ddydd Mercher 11 Gorffennaf o 60 munud i 45 munud.

Memorandwm Cydsyniad Deddfwriaethol y Bil Menter a Diwygio Rheoleiddio

Hysbysodd Arweinydd y Tŷ y Rheolwyr Busnes y bydd papur ar y Memorandwm Cydsyniad Deddfwriaethol ar gyfer y Bil Menter a Diwygio Rheoleiddio yn cael ei gyflwyno i’r Pwyllgor i’w ystyried, yn amodol ar gliriad gan y Gweinidog, ddydd Mawrth 19 Mehefin.

Ailwampio sesiynau Cyfarfod Llawn dydd Mercher

Hysbysodd y Llywydd y Rheolwyr Busnes o’i bwriad i ddychwelyd at y cynnig i ailwampio sesiynau Cyfarfod Llawn dydd Mercher yr wythnos nesaf.