Cofnodion

Croesawodd y Llywydd Aled Roberts i’r cyfarfod fel Rheolwr Busnes newydd y Democratiaid Rhyddfrydol, a diolchodd i Peter Black am ei gyfraniad gwerthfawr i’r Pwyllgor Busnes yn ystod ei gyfnod fel Rheolwr Busnes y blaid honno. 

Nodwyd y cofnodion gan y Pwyllgor i’w cyhoeddi.

Ddydd Mawrth, cynhelir y Cyfnod Pleidleisio ar ôl yr eitem olaf o fusnes. Cytunodd y Pwyllgor Busnes y byddai’r Cyfnod Pleidleisio yn cael ei gynnal cyn y Ddadl Fer ddydd Mercher.

Nododd y Pwyllgor amserlen Busnes y Llywodraeth ar gyfer y tair wythnos nesaf.

Cytunodd y Pwyllgor Busnes i gynnal yr eitem a ganlyn ar 13 Mehefin 2012 yn lle 20 Mehefin 2012:

·         Dadl ar adroddiad y Pwyllgor Amgylchedd a Chynaliadwyedd ar Un Corff Amgylcheddol (60 munud)

Cytunodd y Pwyllgor Busnes i gynnal yr eitem a ganlyn ar 20 Mehefin 2012 yn lle 13 Mehefin 2012:

·         Dadl ar Ymchwiliad y Pwyllgor Cymunedau, Cydraddoldeb a Llywodraeth Leol i Ddarpariaeth Tai Fforddiadwy yng Nghymru (60 munud)

Cytunodd y Pwyllgor Busnes i amserlennu’r eitemau o fusnes a ganlyn:

Dydd Mercher 27 Mehefin 2012

·         Dadl ar Adroddiad y Pwyllgor Materion Cyfansoddiadol a Deddfwriaethol ar Roi Pwerau i Weinidogion Cymru yn Neddfau’r DU (60 munud)

·         Dadl ar Ymchwiliad y Pwyllgor Plant a Phobl Ifanc i Weithredu Mesur Dysgu a Sgiliau (Cymru) 2009 (60 munud)

Penderfynodd y Pwyllgor ar drefn Busnes y Cynulliad.

Bu’r Pwyllgor Busnes yn trafod papur gan y Llywodraeth ynghylch Memorandwm Cydsyniad Deddfwriaethol ar y Bil Cyllid Llywodraeth Leol.

Cytunodd y Rheolwyr Busnes i gyfeirio’r Memorandwm Cydsyniad Deddfwriaethol i’r Pwyllgor Cymunedau, Cydraddoldeb a Llywodraeth Leol i’w ystyried. Cytunodd y Pwyllgor Busnes y dylai’r Pwyllgor gyflwyno adroddiad ar y Memorandwm Cydsyniad Deddfwriaethol erbyn dydd Llun 25 Mehefin 2012, fel y gellir cynnal dadl ar y Memorandwm Cydsyniad Deddfwriaethol yn y Cyfarfod Llawn ar 26 Mehefin 2012. 

Cytunodd Arweinydd y Tŷ i roi rhagor o wybodaeth i’r Rheolwyr Busnes am sut y byddai pwerau i sefydlu cynlluniau ar gyfer lleihau’r dreth gyngor a materion eraill yn cael eu defnyddio, ac am y cyfleoedd ar gyfer craffu pellach gan y Cynulliad.

Nododd y Pwyllgor Busnes lythyr a anfonwyd gan y Cwnsler Cyffredinol mewn ymateb i gynigion drafft a gyflwynwyd ar gyfer Rheolau Sefydlog ar Filiau Cydgrynhoi. Nid yw’r Cwnsler Cyffredinol o’r farn y byddai’n briodol i bennu Rheolau Sefydlog ar hyn o bryd, gan ei fod yn bwriadu ystyried y broses gyfan yn fanwl er mwyn paratoi ar gyfer cyflwyno rhaglen o Filiau Cydgrynhoi. Croesawodd y Rheolwyr Busnes y cyfle i weld swyddogion y Cynulliad yn cydweithio’n agos â Swyddfa’r Cwnsler Cyffredinol wrth ddatblygu’r cynigion hyn. 

Cytunodd y Pwyllgor Busnes i gymeradwyo cais y Pwyllgor Amgylchedd a Chynaliadwyedd i gynnal cyfarfod ffurfiol ychwanegol yn ystod Sioe Frenhinol Cymru. Cynhelir y cyfarfod hwn ddydd Mercher 25 Gorffennaf 2012.

Cytunodd y Rheolwyr Busnes ar newidiadau i Reolau Sefydlog 11.10, 17.3, 17.41 a 25.22 er mwyn cywiro anghysonderau neu sicrhau eglurder. Bydd yr Ysgrifenyddiaeth yn paratoi adroddiad drafft i’r Cynulliad i’w ystyried ochr yn ochr â’r Rheolau Sefydlog drafft ar gyfer Biliau Preifat.

Bu’r Rheolwyr Busnes yn trafod cynigion ar gyfer ailwampio ac amrywio busnes y Cynulliad ar brynhawn dydd Mercher. Cytunodd y Rheolwyr Busnes i ailystyried y mater unwaith eto yn dilyn ymgynghori pellach â’u grwpiau.

Cymeradwyodd y Pwyllgor Busnes y trefniadau cyflwyno arfaethedig ar gyfer y Gwasanaeth Deddfwriaeth a Gwasanaeth y Siambr yn ystod toriad y Sulgwyn.