Cyfarfodydd

Mynegodd y Pwyllgor bryder ynghylch nifer y menywod sy’n cael eu sgrinio am ganser y fron, gan nodi pwysigrwydd sicrhau bod menywod yn derbyn eu gwahoddiad cyntaf, gan fod hyn yn fwy tebygol o sicrhau presenoldeb dro ar ôl tro. Cytunodd yr Aelodau i ysgrifennu at Ysgrifennydd y Cabinet dros Iechyd a Gofal Cymdeithasol i ofyn am ragor o wybodaeth ar y canlynol:

•       Y defnydd presennol o’r 12 o ganolfannau sgrinio symudol yng Nghymru, ac a ellid cynyddu hynny;

•       Data ar wahaniaethau yn y nifer sy'n manteisio ar y cynllun, er enghraifft, ffactorau economaidd-gymdeithasol neu oedran;

•       Eglurhad o'r nifer arbennig o isel o bobl sy'n cael eu sgrinio yn Ynys Môn;

•       Y mesurau sy'n cael eu cymryd i roi adnoddau i Brawf Bron Cymru ac Iechyd Cyhoeddus Cymru i gynyddu'r nifer sy'n cael prawf, ac i godi ymwybyddiaeth y cyhoedd, gan gynnwys a yw’r syniad o gynnwys menywod blaenllaw o Gymru wedi'i ystyried;

•       Pa ystyriaeth sy'n cael ei rhoi i'r gwersi a ddysgwyd ac arfer gorau o waith codi ymwybyddiaeth diweddar GIG Lloegr;

•       Pryd y bydd y strategaeth tegwch sgrinio newydd yn cael ei chyhoeddi a'i dwyn i sylw Aelodau o'r Senedd a'r cyhoedd, a beth sy'n cael ei wneud i gynnwys menywod o oedran sgrinio a grwpiau sydd heb ddigon o wasanaeth wrth ddatblygu'r strategaeth honno?

Nododd y Pwyllgor fod tegwch sgrinio yn ymestyn y tu hwnt i ganser y fron, a chytunodd i anfon copi o’r ohebiaeth at Gadeirydd y Pwyllgor Iechyd a Gofal Cymdeithasol. Byddai'r ddeiseb yn aros ar agor tra’n disgwyl am yr ymateb hwnnw. Nodwyd bod amser cyfyngedig ar ôl yn nhymor presennol y Senedd i’r Aelodau drafod y mater yn y Siambr, fodd bynnag gallai Aelodau unigol dynnu sylw at ei bwysigrwydd o hyd.