Cyfarfodydd

Trafododd y Pwyllgor y ddeiseb a nododd y gwahaniaeth barn sylweddol rhwng y deisebydd a’r Ysgrifennydd Cabinet, a bod dau o geisiadau’r deisebydd – iawndal posibl ac ymchwiliad cyhoeddus – y tu hwnt i bwerau’r Pwyllgor. Yn sgil hyn, cytunodd yr Aelodau i ysgrifennu at yr Ysgrifennydd Cabinet yn gofyn a fyddai’n fodlon cyfarfod â’r deisebwyr, gyda’r Cadeirydd ar gael i fynychu unrhyw gyfarfod o’r fath os oes angen, ac yna cau’r ddeiseb.

Yn dilyn trafodaeth, o gofio ei bod yn annhebygol y byddai unrhyw bwyllgor arall yn gallu edrych ar y mater hwn, cytunodd y Pwyllgor y dylid cadw llygad ar y mater cyn trafod y ddeiseb eto, yn ogystal ag unrhyw gynnydd a wnaed yn erbyn y cynlluniau presennol, yn gynnar yn y flwyddyn newydd.

Cytunodd y Pwyllgor i: ysgrifennu at Lywodraeth Cymru i gadarnhau’r safbwynt o ran cais y deisebwyr am ymchwiliad cyhoeddus; ysgrifennu at y Pwyllgor Cydraddoldeb a Chyfiawnder Cymdeithasol i ofyn i ba raddau yr oedd wedi edrych ar y sefyllfa yng Nghaerau a sut yr oedd hynny wedi dylanwadu ar y Llywodraeth o ran ei rhaglen Cartrefi Clyd newydd; gwahodd y deisebwyr a’r cynghorydd lleol sy’n cefnogi eu hymgyrch i ddod i gwrdd â’r Pwyllgor; ac ysgrifennu at Gyngor Bwrdeistref Sirol Pen-y-bont ar Ogwr i ofyn am gynnydd y gwaith adfer a ariennir gan Lywodraeth Cymru a Llywodraeth y DU. Yn sgil y camau hynny y cytunwyd arnynt, byddai'r Pwyllgor yn cadw'r ddeiseb ar agor.