Cyfarfodydd

Cafodd y Comisiynwyr ddau lythyr a oedd wedi’u hanfon gan y Bwrdd Taliadau.

Roedd y llythyr cyntaf yn tynnu sylw at ymgynghoriad presennol y Bwrdd ynghylch newidiadau arfaethedig i'r Penderfyniad ar Gyflogau a Lwfansau Aelodau ar gyfer 2023/24. Cytunodd y Comisiwn i ymateb i’r ymgynghoriad i dynnu sylw at y goblygiadau i gyllideb y Comisiwn. Cytunodd y Comisiynwyr i gwblhau eu hymateb y tu allan i’r cyfarfod.

Roedd yr ail lythyr yn ymwneud â chais gan y Bwrdd i gynnal trafodaeth â’r Comisiwn ynghylch y modd y bydd y cymorth a gaiff yr Aelodau i gyflawni eu dyletswyddau yn y dyfodol yn cael eu darparu drwy wasanaethau’r Comisiwn a Phenderfyniad y Bwrdd.

Trafododd y Comisiynwyr bwysigrwydd cadw’r ddau gorff ar wahân gan bwysleisio bod angen osgoi dryswch ynghylch  rolau'r naill gorff a’r llall a diogelu'r gwahaniaeth rhyngddynt.

Cytunodd y Comisiynwyr ar yr egwyddor y byddai system i gynnal trafodaeth yn ddefnyddiol er mwyn cael dealltwriaeth gyffredin o gyfeiriad y gwaith a chytunwyd y byddai swyddogion y Comisiwn yn gweithio gyda’r rhai sy’n cynorthwyo’r Bwrdd Taliadau i fwrw ymlaen â hyn.

Cafodd y Comisiynwyr wybod hefyd fod y Pwyllgor Cyfrifon Cyhoeddus a Gweinyddiaeth Gyhoeddus wedi ysgrifennu at Ken Skates ynghylch atebolrwydd y Bwrdd Taliadau.     

Nododd y Comisiynwyr lythyr ac ymgynghoriad gan y Bwrdd Taliadau.

Caiff penodiadau i'r Bwrdd Taliadau eu gwneud gan y Comisiwn. Cadarnhaodd y Comisiynwyr ddau benodiad newydd a dau ailbenodiad i'r Bwrdd Cydnabyddiaeth annibynnol, ar y sail a nodwyd ym Mesur Cynulliad Cenedlaethol Cymru (Taliadau) 2010. Wrth wneud hynny fe wnaethant gadarnhau eu bod yn fodlon nad oedd yr un o'r rhai a gynigiwyd i'w penodi wedi'u gwahardd rhag bod yn aelodau o'r Bwrdd. Bydd y penodiadau newydd yn dechrau ar 21 Medi 2020.

Penododd y Comisiynwyr Elizabeth Haywood yn Gadeirydd, a Hugh Widdis yn aelod o'r Bwrdd i lenwi swyddi sydd ar fin bod yn wag, am dymor o bum mlynedd, ac ailbenodwyd Mike Redhouse a'r Fonesig Jane Roberts yn aelodau o'r Bwrdd am ail dymor o bum mlynedd.

Bu'r Comisiynwyr yn trafod llythyrau gan y Bwrdd Taliadau ynghylch ymgynghoriad y Bwrdd ar y Penderfyniad drafft ar gyfer y Chweched Senedd, ac ynghylch ystyriaeth bellach y Bwrdd o'r materion mewn perthynas â chostau a ysgwyddwyd gan Aelodau am redeg eu swyddfeydd, ac eithrio'r rhai y mae’r Penderfyniad yn darparu ar eu cyfer, lle gwnaethant ddau argymhelliad.

Cytunodd y Comisiynwyr i ysgrifennu yn ôl at y Bwrdd gyda'u casgliadau mewn perthynas â'r argymhellion, gan gytuno, drwy fwyafrif, i ddwyn ymlaen cyhoeddi data o ran defnydd i ddechrau'r flwyddyn ariannol nesaf, ac i ddarparu gwybodaeth i gefnogi gwaith y Bwrdd tuag at gynnwys y darpariaethau hyn yn y Penderfyniad. Ar ôl trafod barn y Bwrdd ynghylch cyflwyno 'cap', cytunwyd i gadw’r status quo ar gyfer y flwyddyn ariannol sydd i ddod.

Cytunwyd hefyd i dynnu sylw at ddau fater sy'n codi o'r ymgynghoriad ar y Penderfyniad, sef esboniad ynghylch y ddwy elfen gyllido a nodwyd i gefnogi ymgysylltu ag etholwyr, a statws yr eiddo a ariennir gan y Comisiwn.

Nododd y Comisiynwyr lythyr gan y Bwrdd Taliadau a oedd yn rhoi’r wybodaeth ddiweddaraf iddynt yn dilyn cyfarfod y Bwrdd ym mis Tachwedd. Gofynnodd y llythyr am wybodaeth bellach a manylion ynghylch presenoldeb swyddogion mewn un o gyfarfodydd y Bwrdd yn y dyfodol; roedd hyn yn ymwneud â chostau swyddfa a ddarperir gan Gomisiwn y Cynulliad, ac Yswiriant Atebolrwydd Arferion Cyflogaeth.

Cytunodd y Comisiynwyr i ofyn i’r Bwrdd Taliadau ystyried darparu Yswiriant Atebolrwydd Arferion Cyflogaeth ar gyfer Aelodau’r Cynulliad.

Trafododd y Comisiynwyr ddau fater y tynnodd Cadeirydd y Bwrdd Taliadau eu sylw atynt mewn perthynas ag ymgynghoriad y Bwrdd yn dilyn ei Adolygiad o’r Penderfyniad ar gyfer y Chweched Cynulliad, 

Nododd y Comisiynwyr y llythyr gan y Bwrdd Taliadau a chytunwyd y dylai'r Llywydd ymateb i gadarnhau y byddent yn ystyried gwasanaethau All-leoli fel rhan o'r gwaith o gynllunio ar gyfer etholiad 2021; ac yn cytuno, mewn egwyddor, ar y modd y mae’r Bwrdd Taliadau yn bwriadu egluro’r cymorth a roddir i Aelodau ag anableddau yn y Penderfyniad. Wrth wneud hyn, roedd y Comisiynwyr am dynnu sylw at gwmpas llawn Cronfa Cydraddoldeb a Mynediad y Comisiwn.

Wrth drafod eto’r costau sy’n gysylltiedig â Swyddfeydd Aelodau a ariennir yn ganolog gan y Comisiwn, nododd y Comisiynwyr yr adborth a gafwyd gan grwpiau a chytunwyd i fwrw ymlaen â’r cynigion a drafodwyd yn eu cyfarfod ym mis Medi:

•          ymgynghori â'r Bwrdd Taliadau ynghylch cynnwys darparu / costau deunydd ysgrifennu Lyreco yn y Penderfyniad yn y dyfodol;

•          y Comisiwn i barhau i ddarparu deunydd ysgrifennu rhagdaledig, a thalu am bostio a swmp-bostio ac argraffu; a pharhau i fonitro unrhyw gostau y gellir eu priodoli i Aelodau unigol a’u cyhoeddi’n rheolaidd o fis Mai 2021 ymlaen, i wella tryloywder; a 

•          defnyddio dulliau gwahanol o ddarparu rhai gwasanaethau, i leihau costau ac i sicrhau gwerth am arian.

Byddai’r Bwrdd Taliadau yn darparu rhagor o wybodaeth maes o law.

papur 2

Cyfarfu’r Comisiwn yn ffurfiol am y tro cyntaf gydag aelodau o’r Bwrdd Taliadau yn dilyn cyfnewid llythyrau ynghylch gwaith y Bwrdd. Ymunodd Sandy Blair, Cadeirydd y Bwrdd, Laura McAllister a Stuart Castledine â’r Comisiynwyr i drafod syniadau’r Comisiwn o ran y materion strategol sy’n ymwneud â her, maint a chymhlethdod y cyfrifoldebau sy’n cael eu hysgwyddo gan Aelodau’r Cynulliad. Blaenoriaeth y Comisiwn yw ystyried anghenion hirdymor y Cynulliad fel sefydliad democrataidd effeithiol, a sicrhau y gall Aelodau’r Cynulliad gyflawni eu cyfrifoldebau yn effeithiol.

Teimlai’r Comisiynwyr ei bod yn bwysig tynnu sylw aelodau’r Bwrdd at y materion hyn, gan y bydd y gwaith a wneir ganddynt yn chwarae rhan bwysig yng nghapasiti Aelodau’r Cynulliad i ymdrin â’r heriau hyn yn y dyfodol.

Dywedodd aelodau’r Bwrdd eu bod yn awyddus i gefnogi capasiti’r Aelodau, yn enwedig tra bod yr Aelodau o dan bwysau ychwanegol oherwydd maint bach y Cynulliad. Pwysleisiodd y Comisiynwyr mor bwysig oedd sicrhau bod hyblygrwydd ac eglurder yn y lwfansau a allai fod ar gael, ac roeddent yn cydnabod yr her o ganfod y cydbwysedd cywir. Roeddent hefyd yn rhoi pwyslais ar gyfleu gwybodaeth am newidiadau yn effeithiol i’r Aelodau.

Trafododd y Comisiynwyr ac aelodau’r Bwrdd gronfa ymgysylltu, a’r ystyriaethau a fyddai’n angenrheidiol pe bai ‘cynllun peilot’ yn cael ei sefydlu a’i gynnal.

Trafododd yr aelodau o’r ddau gorff y berthynas rhwng lwfansau cyfrifoldeb a hyfforddiant / datblygiad proffesiynol ar gyfer deiliaid swyddi, gan ddefnyddio cadeirio pwyllgorau fel enghraifft. Eu gobaith oedd, gyda’i gilydd, bod modd iddynt greu amgylchedd lle mae datblygiad proffesiynol parhaus yn cael ei ystyried yn normal ac yn berthnasol i bawb. Yn gysylltiedig â’r cynnig ynghylch ehangu cynllun prentisiaeth y Comisiwn, nododd y Comisiynwyr hefyd y posibilrwydd o neilltuo peth cyllid ar gyfer rolau intern gydag Aelodau’r Cynulliad.

Cytunodd y Comisiynwyr ac aelodau’r Bwrdd Taliadau bod y drafodaeth wedi bod yn ddefnyddiol, a chytunwyd i gyfarfod eto.

Gwnaeth y Bwrdd Taliadau ei Benderfyniad cyntaf ym mis Mawrth 2011, ond ar y pryd nid oedd yn gallu gwneud penderfyniadau terfynol o ran y cyflogau ychwanegol sy’n daladwy i rai deiliaid swyddi yn y Cynulliad. Mae’r Penderfyniad bellach wedi cael ei ddiweddaru i adlewyrchu penderfyniadau ar gyflogau ychwanegol sy’n daladwy i Gomisiynwyr, arweinwyr y pleidiau, cadeiryddion pwyllgorau a rheolwyr busnes, a derbyniwyd y Penderfyniad yn ffurfiol yng nghyfarfod y Comisiwn. Roedd y Comisiynwyr o’r farn nad oedd y trefniadau cyflog ychwanegol i reolwyr busnes y pleidiau yn ddigonol o ran adlewyrchu gwahaniaethau yn y nifer o seddi sydd gan bob plaid.

Codwyd materion gyda’r Llywydd a’r Comisiynwyr eraill am y cap misol ar lety ar rent ac am y meini prawf o ran pellter i fod yn gymwys i gael cymorth llety yn seiliedig ar yr etholaeth neu’r rhanbarth y mae’r Aelod yn ei gynrychioli. Cytunodd y Comisiwn y byddai’r Llywydd yn ysgrifennu at Gadeirydd y Bwrdd Taliadau.

Camau i’w cymryd: Yr Ysgrifenyddiaeth i drefnu gosod y Penderfyniad a’r adroddiad, ac anfon y dogfennau i Aelodau'r Cynulliad a’u staff.

Y Llywydd i ysgrifennu at Gadeirydd y Bwrdd Taliadau yn nodi pryderon yr Aelodau am y cyfyngiadau ar gymhwyster ar gyfer cymorth llety.