Manylion y penderfyniad

Dadleuon yw un o'r eitemau busnes a fydd yn digwydd amlaf ar agenda'r Cyfarfod Llawn. Cyflwynir sawl math o ddadl yn y Cyfarfod Llawn, gan gynnwys:

• dadleuon yr Wrthblaid am bwnc o'i dewis;

Y Pwyllgor Busnes a fydd yn pennu faint o amser a neilltuir ar gyfer dadleuon nad ydynt yn ddadleuon y Llywodraeth a'r pwyllgor hwnnw hefyd a fydd yn penderfynu pa mor aml y caiff y dadleuon hyn eu cynnal.

Dechreuodd yr eitem am 17.02

Gohiriwyd y bleidlais ar y cynnig a’r gwelliannau o dan yr eitem hon tan y cyfnod pleidleisio.

Cynhaliwyd pleidlais ar y cynnig heb ei ddiwygio:

NDM5157 William Graham (Dwyrain De Cymru)

 

Cynnig bod Cynulliad Cenedlaethol Cymru:

 

1. Yn nodi bod busnesau bach a chanolig yn cynrychioli 99.2% o stoc busnesau Cymru a bod mynediad at gyllid yn hollbwysig i hirhoedledd busnesau bach a chanolig.

 

2. Yn mynegi pryder nad oedd 64% o fusnesau erioed wedi clywed am Cyllid Cymru yn ôl arolwg gan Ffederasiwn Busnesau Bach Cymru.

 

3. Yn cydnabod y sialensiau economaidd gwahanol sy’n wynebu cymunedau ledled Cymru a phwysigrwydd sicrhau mynediad lleol at gyllid.

 

4. Yn cydnabod gwerth creu partneriaethau rhwng Llywodraeth Cymru a banciau’r stryd fawr, neu sefydliadau ariannol eraill, er mwyn darparu cyllid cyhoeddus i fusnesau lleol yn effeithiol ac yn effeithlon.

 

5. Yn galw ar Lywodraeth Cymru i ystyried rhinweddau’r cynigion sydd wedi’u hamlinellu yn ‘Gweledigaeth ar gyfer Buddsoddi yng Nghymru: Buddsoddi Cymru’ a, phan fo’n briodol, ystyried eu hymgorffori yng nghymorth Llywodraeth Cymru ar gyfer busnesau bach a chanolig yng Nghymru.

 

O blaid	Ymatal	Yn erbyn	Cyfanswm
13	0	41	54

Gwrthodwyd y cynnig heb ei ddiwygio.

Cyflwynwyd y gwelliannau a ganlyn:

Gwelliant 1 - Jane Hutt (Bro Morgannwg)

 

Ychwanegu ar ddiwedd pwynt 3:

 

‘a deall anghenion ariannol busnesau lleol’

 

Cynhaliwyd pleidlais ar welliant 1:

O blaid	Ymatal	Yn erbyn	Cyfanswm
53	0	1	54

Derbyniwyd gwelliant 1.

Gwelliant 2 - Jocelyn Davies (Dwyrain De Cymru)

 

Dileu pwynt 4 a rhoi yn ei le:

 

Yn gresynu wrth ddiffyg cynnydd Llywodraeth y DU i annog banciau’r stryd fawr i fenthyg arian i fusnesau bach a chanolig.

 

Cynhaliwyd pleidlais ar welliant 2:

O blaid	Ymatal	Yn erbyn	Cyfanswm
36	0	18	54

Derbyniwyd gwelliant 2.

Gwelliant 3 - Aled Roberts (Gogledd Cymru)

 

Cynnwys pwynt newydd ar ôl pwynt 4 ac ailrifo’r pwyntiau’n unol â hynny:

 

Yn nodi adolygiad Llywodraeth Cymru o argaeledd cyllid ar gyfer busnesau bach a chanolig yng Nghymru ac yn gresynu wrth y diffyg cynrychiolwyr o fusnesau bach a chanolig ar y panel cynghori.

 

Cynhaliwyd pleidlais ar welliant 3:

O blaid	Ymatal	Yn erbyn	Cyfanswm
27	0	28	55

Fel sy’n ofynnol o dan Reol Sefydlog 6.20, defnyddiodd y Dirprwy Lywydd ei bleidlais fwrw drwy bleidleisio yn erbyn y gwelliant. Felly, gwrthodwyd y gwelliant.

Gwelliant 4 - Jocelyn Davies (Dwyrain De Cymru)

 

Dileu pwynt 5 a rhoi yn ei le:

 

Yn galw ar Lywodraeth Cymru i ystyried rhinweddau banc busnes sy’n eiddo i’r cyhoedd fel rhan o’i hadolygiad i fynediad busnesau bach a chanolig at gyllid.

 

Cynhaliwyd pleidlais ar welliant 4:

O blaid	Ymatal	Yn erbyn	Cyfanswm
36	5	13	54

Derbyniwyd gwelliant 4.

Gwelliant 5 - Aled Roberts (Gogledd Cymru)

 

Ychwanegu pwynt newydd ar ddiwedd y cynnig:

 

Yn galw ar Lywodraeth Cymru i hybu’r defnydd o Funding Circle ac ystyried rhinweddau cynnig cyllid drwy farchnad Funding Circle, fel rhan o’i hadolygiad o gyllid ar gyfer busnesau bach a chanolig.

Cynhaliwyd pleidlais ar welliant 5:

O blaid	Ymatal	Yn erbyn	Cyfanswm
53	0	0	53

Derbyniwyd gwelliant 5.

Cynhaliwyd pleidlais ar y cynnig wedi’i ddiwygio:

NDM5157 William Graham (Dwyrain De Cymru)

 

Cynnig bod Cynulliad Cenedlaethol Cymru:

 

1. Yn nodi bod busnesau bach a chanolig yn cynrychioli 99.2% o stoc busnesau Cymru a bod mynediad at gyllid yn hollbwysig i hirhoedledd busnesau bach a chanolig.

 

2. Yn mynegi pryder nad oedd 64% o fusnesau erioed wedi clywed am Cyllid Cymru yn ôl arolwg gan Ffederasiwn Busnesau Bach Cymru.

 

3. Yn cydnabod y sialensiau economaidd gwahanol sy’n wynebu cymunedau ledled Cymru a phwysigrwydd sicrhau mynediad lleol at gyllid a deall anghenion ariannol busnesau lleol.

 

4. Yn gresynu wrth ddiffyg cynnydd Llywodraeth y DU i annog banciau’r stryd fawr i fenthyg arian i fusnesau bach a chanolig.

 

5. Yn galw ar Lywodraeth Cymru i ystyried rhinweddau banc busnes sy’n eiddo i’r cyhoedd fel rhan o’i hadolygiad i fynediad busnesau bach a chanolig at gyllid.

 

6. Yn galw ar Lywodraeth Cymru i hybu’r defnydd o Funding Circle ac ystyried rhinweddau cynnig cyllid drwy farchnad Funding Circle, fel rhan o’i hadolygiad o gyllid ar gyfer busnesau bach a chanolig.

 

O blaid	Ymatal	Yn erbyn	Cyfanswm
36	0	18	54

Derbyniwyd y cynnig wedi’i ddiwygio.