Manylion y penderfyniad

Cynhaliodd y Pwyllgor Menter a Busnes ymchwiliad i ddyfodol Masnachfraint Rheilffyrdd Cymru a'r Gororau.

Y cylch gorchwyl

• Pa wersi y gellir eu dysgu o'r fasnachfraint bresennol?
• Pa flaenoriaethau y gellir eu nodi i sicrhau bod gwasanaethau i deithwyr rheilffyrdd yng Nghymru a'r gororau yn darparu'r gwasanaeth gorau posibl i deithwyr o 2018 ymlaen?
• Sut y gall gwasanaethau ar ôl 2018 sicrhau cysylltedd a gwerth am arian i deithwyr a lleihau baich ar y trethdalwyr?

Y materion allweddol

Mae'r materion y mae'r Pwyllgor yn eu hystyried fel rhan o'r cylch gwaith hwn yn cynnwys:

• A yw'r fasnachfraint bresennol yn diwallu anghenion teithwyr a pha wersi y gellir eu dysgu ohoni?
• Sut y dylid cynnwys teithwyr yn y gwaith o ddatblygu a chyflawni'r fasnachfraint?
• Sut y dylid cynnwys cymunedau a llywodraeth leol / Consortia Trafnidiaeth Rhanbarthol? A ellid eu cynnwys yn y gwaith o bennu'r fasnachfraint neu hyd yn oed ddarparu gwasanaethau?
• Pa fodel rheoli y dylid ei fabwysiadu, gan gynnwys cynnig Llywodraeth Cymru ar gyfer masnachfraint ddi-ddifidend?
• Sut y dylai manyleb y fasnachfraint wella profiad teithwyr, gan gynnwys materion fel hyd y fasnachfraint, targedau / cymhellion a'r safonau gwasanaeth craidd y dylid eu cynnwys?
• Pa lwybrau, yn arbennig llwybrau trawsffiniol, y dylid eu cynnwys?
• Pa gerbydau y bydd eu hangen ar gyfer y fasnachfraint newydd? Pa ffactorau y mae angen eu hystyried a sut y dylid caffael y cerbydau hyn? A fydd angen cerbydau newydd?
• A oes angen rheilffyrdd ychwanegol, gwella rheilffyrdd presennol, gorsafoedd newydd neu seilwaith arall?
• A oes modd i'r fasnachfraint gefnogi gwell perthynas rhwng Network Rail a gweithredwr y fasnachfraint a pha fanteision posibl a ddaw yn sgil hyn?

4.1 Craffodd y Pwyllgor ar waith Gweinidog yr Economi, Gwyddoniaeth a Thrafnidiaeth.

4.2 Cytunodd y Gweinidog i ddarparu’r hyn a ganlyn:

·         Gwybodaeth am gyflenwi tocynnau clyfar / integredig yng Nghymru;

·         Gwybodaeth ynghylch y camau sydd wedi’u cynllunio i sicrhau bod rheilffyrdd Cymru yn hygyrch i bobl â phroblemau symudedd – y fanyleb dechnegol o ran gallu i ryngweithredu (PRM-TSI), a chydymffurfedd â Deddf Cydraddoldeb 2010;

·         Gwybodaeth am gynigion o ran cerbydau erbyn haf 2015, a chynigion manwl erbyn Nadolig 2015.

4.3 Cytunodd y Pwyllgor i barhau i adolygu’r mater.