Cytunodd y Pwyllgor Cydraddoldeb, Llywodraeth Leol a Chymunedau i gynnal ymchwiliad i hawliau dynol yng Nghymru. Mae hyn yn dilyn ymchwiliad byr Pwyllgor Cymunedau, Cydraddoldeb a Llywodraeth Leol y Pedwerydd Cynulliad i Ddyfodol Cydraddoldeb a Hawliau Dynol yng Nghymru, ac mae hefyd wedi’i lywio gan ymgynghoriad y Pwyllgor ar flaenoriaethau a gynhaliwyd yn ystod haf 2016.

Cylch gorchwyl:

Roedd y cylch gorchwyl yn cynnwys ystyried y canlynol:

• yr effaith ar y modd yr amddiffynnir hawliau dynol yng Nghymru wrth i'r DU adael yr Undeb Ewropeaidd,
• effaith cynnig Llywodraeth y DU i ddiddymu Deddf Hawliau Dynol 1998 a chyflwyno Deddf Hawliau Prydeinig i gymryd ei le, a
• chanfyddiadau'r cyhoedd ynglŷn â hawliau dynol yng Nghymru, yn arbennig pa mor ddealladwy a pherthnasol ydynt i bobl Cymru.

Casglu tystiolaeth

I ddechrau, cynhaliodd y Pwyllgor sesiynau tystiolaeth y ceir manylion amdanynt yn y tabl isod. Ymgynghorodd y Pwyllgor ar y pwnc hefyd; mae’r ymatebion wedi’u cyhoeddi.

Yn dilyn y sesiynau tystiolaeth, cytunodd y Pwyllgor i gyfyngu ar gwmpas yr ymchwiliad i ganolbwyntio ar effaith Brexit ar hawliau dynol.

O ganlyniad i hyn, gwnaeth y Pwyllgor waith ar y cyd â’r Pwyllgor Materion Allanol a Deddfwriaeth Ychwanegol i ddeall effaith Brexit ar gydraddoldeb a hawliau dynol. Yn dilyn y gwaith hwn, cyhoeddodd y Pwyllgorau eu canfyddiadau ar y cyd (PDF, 1MB).

Bydd y Pwyllgor yn parhau i fonitro cynnydd Brexit i sicrhau y cydymffurfir â’n hegwyddorion mewn perthynas â hawliau dynol. Mae egwyddorion craidd y Pwyllgor ar gael yn ein gohebiaeth isod, dyddiedig 12 Rhagfyr 2017.

Os bydd y Pwyllgor yn penderfynu cynnal rhagor o sesiynau tystiolaeth yn y dyfodol, bydd yn cyfleu hyn ar ei dudalen hafan a thrwy ei gyfrif Twitter.

Cadw mewn cysylltiad

Os hoffech wybod rhagor am waith y Pwyllgor Cydraddoldeb, Llywodraeth Leol a Chymunedau, ewch i’w dudalen hafan, dilynwch ei gyfrif Twitter neu cysylltwch â'r tîm sy'n cynorthwyo'r Pwyllgor yn SeneddCymunedau@cynulliad.cymru