Ymgynghoriad

Cynhaliodd y Pwyllgor Diwylliant, Cyfathrebu, y Gymraeg, Chwaraeon a Chysylltiadau Rhyngwladol ymchwiliad i gymryd rhan mewn chwaraeon mewn ardaloedd difreintiedig. Ystyriodd faterion sy’n effeithio ar bobl mewn ardaloedd y nodir eu bod yn gymharol ddifreintiedig yn ôl Mynegai Amddifadedd Lluosog Cymru, gan gynnwys y materion a ganlyn:

• Beth yw'r prif rwystrau sy’n atal pobl rhag cymryd rhan mewn chwaraeon mewn ardaloedd difreintiedig? Sut mae'r rhain yn croestorri â ffactorau eraill, gan gynnwys:
• Oedran,
• Rhyw a rhywedd,
• Statws economaidd-gymdeithasol,
• Daearyddiaeth,
• Anabledd,
• Ethnigrwydd,
• Pa mor glir yw’r darlun sydd gennym o’r lefelau cyfranogiad presennol mewn ardaloedd difreintiedig? A yw'r data presennol yn galluogi ymyriadau polisi i fod yn effeithiol?
• Sut y dylid defnyddio arian cyhoeddus i gynyddu cyfranogiad mewn ardaloedd difreintiedig?
• Pa mor effeithiol yw’r ymyriadau presennol o ran cynyddu cyfranogiad mewn ardaloedd difreintiedig?
• A yw’r pandemig wedi achosi unrhyw newidiadau parhaus i lefelau cyfranogiad mewn ardaloedd difreintiedig?
• Pa mor effeithiol y mae gwahanol sectorau (er enghraifft, addysg ac iechyd) yn cydweithio i wella cyfranogiad mewn chwaraeon mewn ardaloedd difreintiedig?
• A oes enghreifftiau o arfer gorau, o fewn Cymru ac yn rhyngwladol, y dylid dysgu oddi wrthynt i gynyddu cyfranogiad mewn chwaraeon mewn ardaloedd difreintiedig?