Ymgynghoriad

Mae’r Pwyllgor Cyllid yn cynnal ymchwiliad i Ddyfodol Cyllido. Mae’r dadleuon ynghylch cyllid teg i Gymru wedi cael eu nodi yn adroddiad Comisiwn Holtham yn 2010 ac adroddiad Comisiwn Silk (Rhan 1) yn 2012, a bu datblygiadau mwy diweddar ledled y DU a all effeithio ar setliad datganoli Cymru.

Mae ymchwiliad y Pwyllgor yn canolbwyntio ar:

• Y prif wendidau yn y setliad ariannol i Gymru a sut y gellir mynd i’r afael â’r gwendidau hyn;
• Sut y gallai’r cytundeb ynghylch model cadw pwerau i Gymru, a’r cynigion datganoli Ddydd Gŵyl Dewi eraill, effeithio ar ddyfodol cyllido;
• Adolygu datblygiadau ar y materion cydgyfeirio, tanariannu a diwygio Barnett a nodwyd yn adroddiadau Holtham a Barnett;
• Y wybodaeth ariannol ac economaidd sydd ei hangen ar Lywodraethau Cymru a’r DU er mwyn cefnogi trefniadau cyllido yn y dyfodol.

Byddai’r Pwyllgor yn croesawu’ch sylwadau ar y canlynol:

• Beth yw’r prif wendidau yn y setliad ariannol presennol i Gymru?
• Sut y gellir mynd i’r afael â’r gwendidau hyn?
• Sut y bydd y newidiadau sydd ar y gweill mewn perthynas â:
• model cadw pwerau i Gymru, cynigion datganoli Ddydd Gŵyl Dewi ac
• argymhellion Comisiwn Smith,
• yn effeithio ar drefniadau cyllido Llywodraeth Cymru yn y dyfodol?
• Pa wybodaeth ariannol ac economaidd sydd ei hangen ar Lywodraethau Cymru a’r DU er mwyn cefnogi trefniadau cyllido yn y dyfodol?
• A oes unrhyw faterion o ran datblygiadau ar y materion cydgyfeirio, tanariannu a diwygio Barnett y dylai’r Pwyllgor fod yn ymwybodol ohonynt?
• Sut y gallai Llywodraeth y DU yn y dyfodol ymgorffori gofynion gan Lywodraeth Cymru am ddull ariannu datganoledig sy’n seiliedig ar anghenion?
• A ddylid penderfynu ar setliadau datganoli ariannol Cymru a’r gweinyddiaethau datganoledig eraill mewn modd cydlynol neu fel cyfres o gytundebau dwyochrog?
• Pa egwyddorion y dylid eu mabwysiadu i lywio’r broses o ddatganoli pwerau cyllidol ymhellach mewn modd sy’n sicrhau tegwch a hyblygrwydd?

Gwahoddiad i gyfrannu at yr ymchwiliad

Mae’r Pwyllgor yn croesawu ymatebion yn Gymraeg neu yn Saesneg gan unigolion a sefydliadau, a bydd yn cynnal sesiynau tystiolaeth lafar maes o law.

Ni ddylai’r dystiolaeth fod yn hwy na phum ochr tudalen A4. Dylid rhifo’r paragraffau, a dylai’r dystiolaeth ganolbwyntio ar y materion uchod. Gweler y canllawiau ar gyfer y rhai sy'n darparu tystiolaeth i bwyllgorau.

Datgelu gwybodaeth

Mae polisi'r Cynulliad ynghylch datgelu gwybodaeth ar gael. Gofalwch eich bod yn ystyried y manylion hyn yn ofalus cyn cyflwyno gwybodaeth i'r Pwyllgor.