Agenda item
Risgiau corfforaethol
- Cyfarfod Pwyllgor Archwilio a Sicrwydd Risg Comisiwn y Senedd, Dydd Gwener, 18 Mehefin 2021 10.00 (Item 8.)
- Gwybodaeth gefndir i eitem 8.
Cofnodion:
ARAC (03-21) Papur 5 - Risgiau corfforaethol
ARAC (03-21) Papur 5 - Atodiad A - Crynodeb o’r Gofrestr
Risg Gorfforaethol
ARAC (03-21) Papur 5 - Atodiad B - Risgiau
corfforaethol a nodwyd
8.1
Cyflwynodd Dave yr
eitem hon. Amlinellodd y cynnig i ddileu'r risg o amgylch cyfnod pontio
Etholiad y Senedd 2021 o Gofrestr Risg Gorfforaethol y Comisiwn a'r bwriad i
ailasesu'r risg Coronafeirws gan y Bwrdd Gweithredol.
8.2
Rhoddodd Siwan y
wybodaeth ddiweddaraf am yr asesiad parhaus o'r risgiau sy'n gysylltiedig â
newid cyfansoddiadol a diwygio'r Senedd. Ychwanegodd y byddai'r risgiau'n
canolbwyntio ar ymateb y Comisiwn i benderfyniadau gwleidyddol a fyddai'n
dechrau dod i'r amlwg wrth i fusnes y Senedd fynd rhagddo yn dilyn yr etholiad.
8.3
Atgoffodd Dave y
Pwyllgor mai adroddiad cryno oedd hwn o statws y risgiau a bod y Cyfarwyddwyr
a'r Bwrdd Gweithredol yn adolygu adroddiadau manylach yn rheolaidd. Mewn ymateb
i gwestiwn ynghylch perchnogaeth, eglurodd Dave hefyd fod pob risg gorfforaethol
yn eiddo i Gyfarwyddwr arweiniol gyda mewnbwn gan y Penaethiaid Gwasanaethau
perthnasol.
8.4
Mewn perthynas â'r
risgiau sy'n gysylltiedig â Safonau Ymddygiad ar gyfer Aelodau'r Senedd,
gofynnodd Ann Beynon a oedd yn werth i'r Pwyllgor ymgysylltu â'r Comisiynydd
Safonau newydd. Nododd y Cadeirydd y dylai'r Pwyllgor, gan fod y Comisiynydd yn
ddeiliad swydd annibynnol, ganolbwyntio ar adolygu'r broses o reoli risgiau
mewn perthynas â'r cymorth a ddarperir gan y Comisiwn. Atgoffodd Siwan y
Pwyllgor fod y risg hon wedi canolbwyntio ar sut yr oedd swyddogion y Comisiwn
wedi cefnogi'r Senedd i gynnal hyder y cyhoedd yn y gyfundrefn safonau, gan
gynnwys y Cod Ymddygiad diwygiedig ar gyfer Aelodau'r Senedd a phenodi
Comisiynydd Safonau newydd. Ychwanegodd y byddai’r ffocws nawr, gan fod y ddau
hyn bellach ar waith, yn symud tuag at gefnogi'r Pwyllgor Safonau Ymddygiad, ar
ôl ei sefydlu, i gynnal adolygiad o'r weithdrefn gwyno.
8.5
Ychwanegodd Manon,
mewn ymateb i adborth yn ystod cyfnod sefydlu Aelodau newydd, fod briff yn cael
ei baratoi i egluro rolau a chylchoedd gwaith y Comisiynydd Safonau a'r Bwrdd
Taliadau. Byddai hyn hefyd yn cynnwys manylion o ran rheolau'r Swyddog
Cyfrifyddu.
8.6
Croesawodd Suzy unrhyw
eglurder ynghylch dyletswydd y Comisiwn i gefnogi'r Bwrdd Taliadau annibynnol.
8.7
Mewn ymateb i gwestiwn
gan Suzy ynghylch y gyllideb a chefnogaeth i'r Comisiynydd Safonau, atgoffodd
Siwan y Pwyllgor ei bod yn ofyniad statudol i'r Comisiwn ddarparu adnoddau ar
gyfer swydd y Comisiynydd. Esboniodd fod Protocol yn cael ei lunio gyda'r
Comisiynydd newydd yn seiliedig ar yr egwyddor o ddull hyblyg parhaus, lle
roedd staff y Comisiwn yn mynd ar secondiad i’w swyddfa.
8.8
Mewn perthynas â'r
risg o ran Urddas a Pharch staff y Comisiwn, awgrymodd Suzy ychydig o
werthusiad drwy archwiliad mewnol ar effeithiolrwydd yr hyfforddiant a
ddatblygwyd i roi'r hyder i staff herio ymddygiad, a chytunodd y swyddogion i
ystyried hyn.
8.9
Mewn ymateb i bwyntiau
a godwyd gan Aled p ran penderfyniadau gwleidyddol ynghylch diwygio'r Senedd,
rhoddodd Siwan sicrwydd y byddai fframwaith cyfansoddiadol y DU, gan gynnwys
materion fel y gostyngiad yn nifer yr Aelodau Seneddol o Gymru, newidiadau i
ffiniau llywodraeth leol, yn cael ei ystyried wrth asesu'r risgiau i'r
Comisiwn.
8.10
Byddai'r Cadeirydd yn
trafod yr adolygiad sydd ar ddod o Fframwaith Sicrwydd y Comisiwn gyda
swyddogion cyn cyfarfod y Pwyllgor ym mis Gorffennaf, yn benodol ynghylch sut
mae'r Bwrdd Taliadau annibynnol yn cydweddu iddo a rôl y Pwyllgor o ran sicrhau
bod y prosesau i'w gefnogi yn effeithiol.
8.11
Byddai'r Cadeirydd
hefyd yn cynnal trafodaethau gyda Dave ynghylch ailstrwythuro'r wybodaeth
ddiweddaraf a gafodd ar risgiau seiberddiogelwch. Mewn ymateb i ymholiad
penodol gan Aled ynghylch defnyddio cyfrifiaduron Mac, rhoddodd Dave sicrwydd
bod newidiadau i'r ffordd yr oedd y rhain yn cysylltu â'r rhwydwaith yn rhan
o'r mesurau i wella amddiffynfeydd a sicrhau diogelwch y rhwydwaith.
8.12
Diolchodd y Cadeirydd
i'r swyddogion am y sicrwydd a roddwyd ar y pwyntiau a godwyd ac roedd yn hapus
gyda'r adroddiadau risg a'r prosesau rheoli risg.