Agenda item
Cofnodion y cyfarfod ar 15 Mehefin, y camau i'w cymryd a'r materion sy'n codi
- Cyfarfod Pwyllgor Archwilio a Sicrwydd Risg Comisiwn y Senedd, Dydd Gwener, 10 Gorffennaf 2020 09.30 (Item 2.)
- Gwybodaeth gefndir i eitem 2.
Cofnodion:
ARAC (04-20)
Papur 1 – Cofnodion y cyfarfod ar 15 Mehefin 2020
ARAC (04-20)
Papur 2 – Crynodeb o’r camau i’w cymryd
2.1
Cytunwyd ar gofnodion y cyfarfod a gynhaliwyd ar 15
Mehefin.
2.2
Wrth ymateb i gwestiwn gan y Pwyllgor, dywedodd
Arwyn Jones na fu fawr o sylw yn y wasg ynglŷn â chyhoeddi Adroddiad
Blynyddol a Chyfrifon y Comisiwn. Ychwanegodd Manon Antoniazzi fod y cyfarfod
llawn hybrid wedi cael llawer o sylw ar ITV Cymru a oedd yn gadarnhaol dros
ben.
2.3
Croesawodd y Cadeirydd Siwan Davies i'r cyfarfod a
fyddai'n diweddaru'r Pwyllgor ar gam gweithredu 6.4 yn ymwneud â diwygio'r
Senedd, yn benodol ynghylch y trefniadau cyllido ar gyfer y Comisiwn Etholiadol
yn y dyfodol. Esboniodd Siwan fod Llywodraeth Cymru wedi dweud am ei bwriad i
gyflwyno deddfwriaeth bellach yr oedd ei hangen er mwyn gwneud y Comisiwn
Etholiadol yn atebol i'r Senedd ac er mwyn iddo gael ei ariannu'n uniongyrchol
o Gronfa Gyfunol Cymru; fodd bynnag, ni fyddai hyn yn cael ei roi ar waith mewn
pryd ar gyfer etholiadau 2021. Ychwanegodd y cytunwyd ar gytundeb dros dro lle
byddai Llywodraeth Cymru’n gwneud taliadau i’r Comisiwn Etholiadol.
2.4
Disgrifiodd Siwan y broses ar gyfer cyflawni hyn a
oedd yn cynnwys gwneud newidiadau i Reolau Sefydlog y Senedd (i'w gwneud yr
wythnos ganlynol) i sefydlu Pwyllgor y Llywydd (i'w benodi yn nhymor yr hydref)
a nodi prosesau cyllid a rheolaeth ariannol newydd. Ychwanegodd y byddai angen
i gytundebau rhyngsefydliadol gael eu nodi erbyn mis Medi o ran sut y byddai’r
Comisiwn Etholiadol yn cael ei ariannu ac ar gyfer ei atebolrwydd i’r Senedd
(trwy Bwyllgor y Llywydd), Tŷ'r Cyffredin (trwy
Bwyllgor y Llefarydd) a Senedd yr Alban.
2.5
Atgoffodd Nia Morgan y
Pwyllgor am wrthwynebiad cryf y Comisiwn i'r cynigion cychwynnol ar gyfer
ariannu’r Comisiwn Etholiadol drwy Gomisiwn y Senedd yn ystod y cyfnod interim
hwn. Byddai’r cytundeb newydd hwn yn dileu’r goblygiadau o ran y trefniadau ar
gyfer cyllideb Comisiwn y Senedd. Cytunodd y Pwyllgor fod hwn yn ganlyniad da,
a nododd ymdrechion y Comisiwn i barhau â hyn o fewn amserlenni tyn trwy gynnal
deialog parhaus a gofynnodd am gael y wybodaeth ddiweddaraf am y cynnydd maes o
law.
2.6
Fel mater sy’n codi, gofynnodd y Cadeirydd am
gynnal trafodaeth ar sut y gallai'r Pwyllgor chwarae rhan adeiladol wrth reoli
risg gorfforaethol y Comisiwn ar Newid Cyfansoddiadol yn barhaus. Dywedodd ei
fod wedi cael adroddiad wedi'i ddiweddaru, er gwybodaeth iddo y tu allan i'r
pwyllgor yr oedd wedi ei anfon ymlaen at Ann ac Aled er gwybodaeth. Rhoddodd
Siwan sicrwydd i'r Pwyllgor ynghylch y modd y mae’r Comisiwn yn rheoli’r risg
sy’n gysylltiedig â Newid Cyfansoddiadol, gan gynnwys trwy gynllunio senarios
ac ymgysylltu â Chomisiwn y Senedd a'r Pwyllgor Busnes, yn ogystal â thrwy
sianeli gwleidyddol, gan gynnwys grŵp
rhyng-seneddol.
2.7
Mewn ymateb i gwestiynau gan Ann ynghylch effaith
bosibl swm y ddeddfwriaeth funud olaf yn ymwneud â Brexit a'i heffaith ar
graffu ar raglen ddeddfwriaethol bresennol Llywodraeth Cymru, rhoddodd Siwan
sicrwydd pellach y byddai gwaith cynllunio senarios a thrafodaethau parhaus
gyda Llywodraeth Cymru yn ceisio rhagweld hyn gymaint â phosibl i ganiatáu i'r
Senedd gynnal gwaith craffu deddfwriaethol. Tynnodd Suzy Davies sylw at y
potensial ar gyfer problemau ynghylch y berthynas rhwng y Senedd a Llywodraeth
Cymru, yn ogystal â Llywodraeth y DU, o ran cymhwysedd deddfwriaethol.
2.8
Croesawodd y Pwyllgor safbwynt Suzy ar y materion
hyn a'r diweddariad buddiol gan Siwan. Gan y bydd materion cyfansoddiadol wedi
symud ymlaen yn sylweddol cyn cyfarfod nesaf y Pwyllgor ym mis Tachwedd,
gofynnodd y Cadeirydd am ddiweddariad yn gynnar yn nhymor yr hydref gan awgrymu
y gellid cyfuno hyn â diweddariad ar ffyrdd newydd o weithio i gefnogi busnes
Pwyllgorau’r Senedd a’r Cyfarfod Llawn yn yr amgylchedd Covid-19.
Cam i’w gymryd
(2.8) Darparu’r wybodaeth ddiweddaraf am reoli risgiau’n barhaus
ynghylch Newid Cyfansoddiadol yn gynnar yn nhymor yr hydref.