Agenda a Chofnodion

Croesawodd y Llywydd yr Aelodau i’r cyfarfod.

Dywedodd y Llywydd wrth y Pwyllgor Busnes mai hwn fyddai cyfarfod olaf Clerc presennol y Pwyllgor Busnes cyn symud i'r Swyddfa Gyflwyno. Diolchodd y Rheolwyr Busnes i'r Clerc am y gefnogaeth a'r cyngor a roddwyd i'r pwyllgor dros y blynyddoedd.

Cytunwyd ar gofnodion y cyfarfod blaenorol i’w cyhoeddi.

Busnes yr wythnos hon

Dydd Mawrth

·         Caiff y Cyfnod Pleidleisio ei gynnal fel yr eitem olaf o fusnes.

·         Nid yw'r Cyfarfod Llawn yn debygol o fynd y tu hwnt i 7.05pm.

Dydd Mercher  

·         Caiff y Cyfnod Pleidleisio ei gynnal cyn y Ddadl Fer.  

·         Nid yw'r Cyfarfod Llawn yn debygol o fynd y tu hwnt i 7.50pm. 

Cododd y Rheolwyr Busnes bryderon eto am gyhoeddiadau polisi sylweddol gan Lywodraeth Cymru sy'n cael eu gwneud i'r cyfryngau yn hytrach nag i'r Senedd.

Ailadroddodd y Llywydd mai ei barn hi ers tro oedd y dylai cyhoeddiadau polisi sylweddol gael eu gwneud yn y Cyfarfod Llawn, ac y byddai'n parhau i ddefnyddio ei disgresiwn i dderbyn Cwestiynau Amserol yn ymwneud â materion o'r fath.

Cytunodd y Pwyllgor Busnes i weithio ar y sail na fyddai unrhyw adalw dros doriad yr haf, oni bai bod consensws gwleidyddol i wneud hynny. Byddai unrhyw Gyfarfod Llawn a gaiff ei adalw yn gyfarfod rhithwir.

Cytunodd y Pwyllgor Busnes i gynnwys yr eitemau o fusnes a ganlyn ar yr amserlen:

Dydd Mercher 29 Medi 2021 –

·         Dadl Aelodau o dan Reol Sefydlog 11.21(iv): (60 munud)

·         Amser a neilltuwyd i’r Ceidwadwyr Cymreig (60 munud)

Memoranda Cydsyniad Deddfwriaethol ar Fil yr Asiantaeth Ymchwil a Dyfeisio Blaengar, y Bil Sgiliau ac Addysg Ôl-16 a'r wybodaeth ddiweddaraf am Femoranda Cydsyniad Deddfwriaethol cyfredol

Nododd y Pwyllgor Busnes y sefyllfa ddiweddaraf o ran Memoranda Cydsyniad Deddfwriaethol, a chytunodd i gyfeirio'r Memorandwm ar Fil yr Asiantaeth Ymchwil a Dyfeisio Blaengar at Bwyllgor yr Economi, Masnach a Materion Gwledig, y Pwyllgor Plant, Pobl Ifanc ac Addysg a'r Pwyllgor Deddfwriaeth, Cyfiawnder a’r Cyfansoddiad gyda dyddiad cau ar gyfer cyflwyno adroddiad ar 21 Hydref 2021.

Cytunodd y pwyllgor hefyd i gyfeirio’r Memorandwm ar y Bil Sgiliau ac Addysg Ôl-16 at Bwyllgor yr Economi, Masnach a Materion Gwledig, y Pwyllgor Plant, Pobl Ifanc ac Addysg a'r Pwyllgor Deddfwriaeth, Cyfiawnder a’r Cyfansoddiad gyda dyddiad cau ar gyfer cyflwyno adroddiad ar 21 Hydref 2021.

Cytunodd y Pwyllgor Busnes ar yr amserlen, a chytunodd hefyd i ganiatáu i'r Pwyllgor Deisebau gael cyfarfod ychwanegol fore Llun yn wythnos 1 i'w helpu i glirio unrhyw ddeisebau a dderbyniwyd dros yr haf.

Cytunodd y Pwyllgor Busnes mai’r Dirprwy Lywydd ddylai gadeirio'r pwyllgor, ac y byddai tri aelod Llafur, dau aelod o’r Ceidwadwyr ac un aelod o Blaid Cymru ar y pwyllgor.

Cytunodd y Rheolwyr Busnes i drafod cylch gwaith ac aelodaeth y pwyllgor ymhellach, a dychwelyd at y mater yn eu cyfarfod nesaf.

Ystyriodd y Pwyllgor Busnes y papur a chytunodd y dylid neilltuo materion polisi cyfiawnder lefel uchel, megis datganoli cyfiawnder a phlismona, ac unrhyw faterion sy'n ymwneud â deddfu, i'r Pwyllgor Deddfwriaeth, Cyfiawnder a’r Cyfansoddiad.  Dylai materion eraill sy'n ymwneud â chymhwyso polisi cyfiawnder yn ymarferol fod yn agored i waith craffu gan bwyllgorau polisi a deddfwriaeth priodol.

Nododd y Pwyllgor Busnes y llythyr, a chytunodd y dylai'r ddadl flynyddol ar flaenoriaethau'r gyllideb ddychwelyd i fod yn ddadl a arweinir gan y pwyllgor yn y dyfodol.

Cytunodd y Rheolwyr Busnes i drafod y tu allan i'r pwyllgor pa effaith y byddai unrhyw newidiadau i reoliadau Coronafeirws, a gyhoeddir gan y Prif Weinidog y diwrnod canlynol, yn ei chael ar fformat busnes y Senedd o fis Medi.